Live
Home
အနုပညာ
ရုပ်ရှင်ဝါသနာအိုးတို့အတွက် ဘယ်ရုံမှာ ဘာကားတွေ ပြနေသလဲ (ရုပ်သံ)
DVB
·
July 5, 2018
ဒီတပတ်ရဲ့Movie Crazy - DVB အစီအစဉ်မှာ ရုပ်ရှင်ဝါသနာအိုးတွေအတွက် ပုံမှန် တင်ဆက်နေကျဖြစ်တဲ့ နိုင်ငံတကာနဲ့ ပြည်တွင်းက ကောင်းနိုးရာရာ ရုပ်ရှင်ဇာတ်ကားတွေကို ရွေးချယ် ဖော်ပြပေးလိုက်ပါတယ်။ မူဗီခရေဇီတွေကို ပထမဆုံး မိတ်ဆက်ပြောပြပေးချင်တဲ့ ဇာတ်ကားကတော့ Ant- Man and the Wasp ဆိုတဲ့ ရုပ်ရှင်ကား ဖြစ်ပါတယ်။ ဒါဟာ American Superhero ရုပ်ရှင်ပရိသတ်တွေ အကြိုက်တွေ့စေမယ့် ရုပ်ရှင်ကားတကားဖြစ်ပြီး Marvel Comics တွေကို ရုပ်ရှင်အဖြစ် ပြန်အသက်သွင်းထားတဲ့ ရုပ်ရှင် Series အနေနဲ့ ထွက်ရှိလာခဲ့တာပါ။ ဒီကားကိုတော့ လာမယ့် ၂၀၁၉ ခုနှစ်မှာ နောက်ထပ် ထွက်လာမယ့် Avengers ဇာတ်ကားနဲ့ ချိတ်ဆက်သွားမှာ ဖြစ်တယ်လို့လည်း ကြော်ငြာထားပါတယ်။ ဒီရုပ်ရှင်ကားကိုတော့ အမေရိကန်ရုပ်ရှင် ဒါရိုက်တာ Peyton Reed က ရိုက်ကူး ပုံဖော်ထားပြီး Marvel Studios က ထုတ်လုပ်ပြီး Walt Disney Studio Motion Pictures က ဖြန့်ချိလိုက်တာပါ။ Marvel Comics ဇာတ်ကောင် Ant Man နေရာမှာတော့ အမေရိကန်မင်းသား Paul Rudd က သရုပ်ဆောင်ထားပြီး Supervillain ဇာတ်ကောင် Red Queen နေရာမှာတော့ ကနေဒီယန်းမင်းသမီး Evangeline Lilly က အပြိုင်ပါဝင် သရုပ်ဆောင်ထားပြီး ဘယ်လို စွန့်စားခန်းတွေ၊ တိုက်ခိုက်မှုတွေနဲ့ ပုံဖော်ရိုက်ကူးထားမလဲ ဆိုတာကို ပရိသတ်တွေက မကြာခင်မှာ ကြည့်ရှုရတော့မှာပါ။ ဒီကားအထူးပွဲကိုတော့ ပြီးခဲ့တဲ့ ဇွန်လ ၂၅ ရက်နေ့မှာ ကနဦးပြသခဲ့ပြီး ချီးကျူးမှုတွေလည်း ရရှိထားတာ ဖြစ်ပါတယ်။ ဒီရုပ်ရှင်ကားကို Box Office က ရုံတင်တဲ့ ပထမပတ်မှာတင် ဝင်ငွေ ၆၉ သန်းကနေ သန်း ၈၀ ထိ ရရှိနိုင်မယ်လို့ ခန့်မှန်းထားတာပါ။ ကြာမြင့်ချိန် ၁၁၈ မိနစ်ရှိတဲ့ ဒီရုပ်ရှင်ကားကိုတော့ လာမယ့် ဇူလိုင်လ ၆ ရက်နေ့မှာ ရုံတင်ပြသတော့မှာမို့ စောင့်မျှော်ကြည့်ရှုနိုင်ဖို့ ပြောပြပေးလိုက်ပါတယ်။ နောက်ထပ် မိတ်ဆက်ပြောပြပေးမယ့် ရုပ်ရှင်ကားကတော့ မြန်မာပရိသတ်တွေ သိကြပြီးဖြစ်တဲ့ ဟောင်ကောင်မင်းသားကြီး Jackie Chan ရဲ့ ရုပ်ရှင်ကား Bleeding Steel ဖြစ်ပါတယ်။ ဒီကားကိုတော့ ဒါရိုက်တာ Leo Zhang က ရိုက်ကူးထားတာ ဖြစ်ပြီး Science Fiction Cyberpunk Action Film အမျိုးအစားကြိုက်တဲ့ ပရိသတ်တွေ အကြိုက်တွေ့စေမှာ ဖြစ်ပါတယ်။ ဒီကားထဲမှာ Jackie Chan ဟာ Hong Kong အထူးရဲအရာရှိ Special Agent - Lin Dong နေရာက ပါဝင်သရုပ်ဆောင်ထားတာ ဖြစ်ပြီး Cyborg လို ကြမ်းတမ်းရက်စက်တဲ့ ရန်သူပြိုင်ဘက်ဂိုဏ်းကို ဖြိုခွင်းတဲ့အခါမှာ ဘာတွေ ကြုံတွေ့ရမလဲ၊ နောက်ပြီး ပျောက်ဆုံးသွားတဲ့ Leukemia ရောဂါသည် သမီးဖြစ်သူကို စွန့်စားကယ်တင်တဲ့ ဒရာမာဆန်ဆန် ရိုက်ချက်တွေကိုပါ သိပ္ပံအထူးပြုလုပ်ချက်တွေနဲ့ ဒီကားထဲမှာ ရှုစားကြရမှာ ဖြစ်ပါတယ်။ ဇာတ်ဝင်ခန်းတွေထဲမှာ ကြမ်းတမ်းတဲ့ တိုက်ခိုက်မှုတွေ၊ ပြောစကား Dialog တွေ ပါဝင်နေတာမို့ ဒီကားကိုတော့ Rated R အဆင့် သတ်မှတ်ထားပါတယ်။ ကြာမြင့်ချိန် ၁၁၀ မိနစ်ရှိတဲ့ ဒီရုပ်ရှင်ကားထဲမှာ Mandarin နဲ့ English ဘာသာစကားတွေကို အသုံးပြုထားပြီး လာမယ့် ဇူလိုင်လ ၆ ရက်နေ့မှာ ရုံတင်ပြသတော့မှာဖြစ် တယ်လို့ ကြော်ငြာထားပါတယ်။ မူဗီခရေဇီတွေကို နောက်ထပ် မိတ်ဆက်ပြောပြပေးချင်တဲ့ ရုပ်ရှင်ကားကတော့ မထွက်ခင်ကတည်းက နာမည်ကြီးနေတဲ့ ‘တိုးကျော်မန်းနဲ့ နန်းဆန်တဲ့ရွာ’ မြန်မာရုပ်ရှင်ကား ဖြစ်ပါတယ်။ ဒီကားကိုတော့ Celebrity ရုပ်ရှင်ထုတ်လုပ်ရေးက စီစဉ်ပြီး ဒါရိုက်တာ ကျော်သားကြီးက ပုံဖော်ရိုက်ကူးထားတာ ဖြစ်ပါတယ်။ ဇာတ်လမ်းကတော့ ယောက်ျားမမြင်ဖူးတဲ့ ပဲခူးရိုးမတောနက်ထဲက အပျိုစင်လို့ အမည်ရတဲ့ ရွာထဲကို ရောက်သွားကြတဲ့ ဂေါ်မစွံလူပျိုသိုးကြီး ၃ ယောက်နဲ့ ချောမောလှပတဲ့ ရွာသူတွေ တွေ့ကြတဲ့အချိန်မှာ ဘယ်လို ကမောက်ကမတွေ ဖြစ်ကြမလဲဆိုတာကို ဟာသဆန်ဆန် ရိုက်ကူးထားတာ ဖြစ်ပါတယ်။ ပြေတိုး၊ ကျော်ရန်အောင်နဲ့ လူမန်း ဆိုတဲ့ အဲဒီဂေါ်မစွံလူပျိုသိုးကြီး ၃ ယောက်နေ ရာမှာတော့ ပြေတီဦး၊ ကျော်ရဲအောင်နဲ့ ဟာသသရုပ်ဆောင် ဗေလုဝတို့က ခေါင်းဆောင် ပါဝင်ထားကြတာ ဖြစ်ပါတယ်။ သရုပ်ဆောင် မင်းသမီး အေးမြတ်သူကတော့ အပျိုစင်ရွာရဲ့ အကြီးအကဲ သခင်မ နေရာမှာ ပါဝင်သရုပ်ဆောင်ထားပြီး သင်ဇာဝင့်ကျော်ကတော့ ရွာသူအပျိုချော ဖြူဖွေးအဖြစ် သရုပ်ဆောင်ထားကြတာ ဖြစ်ပါတယ်။ အချစ်၊ ဟာသဒရာမာ ဇာတ်လမ်းဇာတ်ကွက်တွေနဲ့ ပုံဖော်ရိုက်ကူးထားတဲ့ ဒီရုပ်ရှင်ကားထဲက ပြောစကား Dialog တွေဟာလည်း ပရိသတ်တွေကြားမှာ ရေပန်းစားနေပြီး မထွက်ခင်ကတည်းက နာမည်ကြီးနေခဲ့တာပါ။ ဒီရုပ်ရှင်ကား Trailer ဟာ လက်ရှိအချိန်ထိ ဖေ့စ်ဘွတ်ခ်ပေါ်မှာ ဝင်ရောက်ကြည့်ရှုကြတဲ့ အကြိမ်ရေ ၃ သန်းနီးပါးရှိနေခဲ့ပြီဖြစ်ကာ လာမယ့် ဇူလိုင်လ ၆ ရက်နေ့မှာ ရုံတင် ပြသတော့မှာ ဖြစ်ပါတယ်။ နောက်ထပ်တကား မိတ်ဆက်ပြောပြပေးချင်တာကတော့ ဘောလိဝုဒ်ရုပ်ရှင်ကား တကား ဖြစ်တဲ့ Tik Tik Tik ဖြစ်ပါတယ်။ ဒီကားကတော့ ထူးထူးခြားခြား Science Fiction Thriller အမျိုးအစား ရုပ်ရှင် ကားတကားဖြစ်ပြီး အိန္ဒိယရဲ့ ပထမဆုံးသော Space Film အမျိုးအစားဖြစ်တယ်လို့ ကြော်ငြာထားတာပါ။ (ဒါပေမယ့် ၁၉၆၃ ခုနှစ်တုန်းကလည်း Kalai Arasi အမည်နဲ့ ခုလို Space Film အမျိုးအစား ရုပ်ရှင်ကားတကား ထွက်ခဲ့ဖူးပါတယ်။) အိန္ဒိယဒါရိုက်တာ Shakti Soundar Rajan ရိုက်ကူးထားတဲ့ ဒီရုပ်ရှင်ကားထဲမှာတော့ ဘောလိဝုဒ်စတား သရုပ်ဆောင်မင်းသား Jayam Ravi က ခေါင်းဆောင်ပါဝင်ထားတာ ဖြစ်ပါတယ်။ ဇာတ်လမ်းအကျဉ်းကတော့ အိန္ဒိယနိုင်ငံ၊ Channai မြို့နားက Ennore ဆိုတဲ့ နေရာကို ဥက္ကာပျံခဲတခုက တိုက်ခိုက်ခံရပြီး မကြာခင်မှာပဲ အရွယ်အစား 60 Square Kilometer နီးပါးရှိတဲ့ နောက်ထပ်ဥက္ကာပျံတခုက အိန္ဒ်ိယနိုင်ငံဆီ ဦးတည်လာနေတယ်။ အဲဒီဥက္ကာပျံခဲဟာ အချိန် ၆ ရက်အတွင်းမှာ ကမ္ဘာမြေဆီ ရောက်ရှိလာပြီး ထိခိုက် ပျက်စီးတော့မယ့် အခြေအနေ ဖြစ်လာလိမ့်မယ်လို့ အိန္ဒ်ိယ အာကာသဆိုင်ရာ သုတေသနအဖွဲ့က ခန့်မှန်းထားကြပါတယ်။ အဲဒီအချိန်မှာ ဒါကို ကမ္ဘာမြေဆီ ရောက်မလာခင်မှာ ဖျက်ဆီးပစ်နိုင်ဖို့ M.Vasu အမည်ရတဲ့ အာကာသယာဉ်မှူးတဖြစ်လဲ မျက်လှည့်ဆရာကို အာကာသထဲ စေလွှတ်ဖို့ ဆုံးဖြတ်ခဲ့ကြတယ်။ သူ ပါဝင်တဲ့အဖွဲ့နဲ့ သိပ္ပံပညာရှင်တွေဟာ ဒီအန္တရာယ်ကနေ ဘယ်လို ကာကွယ်ပေးသွားမလဲ။ ဘယ်လိုတွေ ဆက်ဖြစ်လာမလဲ ဆိုတာတွေကို သည်းထိတ်ရင်ဖို စွန့်စားခန်းတွေနဲ့ ကြည့်ရှုကြရမှာပါ။ အဓိကဇာတ်ကောင် M.Vasu နေရာမှာတော့ မင်းသား Jayam Ravi က သရုပ်ဆောင်ထားပြီး သူနဲ့အတူ အိန္ဒိယမင်းသမီး Nivetha Pethuraj နဲ့ Singapore မင်းသား Aaron Aziz တို့ကလည်း တွဲဖက် ပါဝင်ထားကြတာ ဖြစ်ပါတယ်။ ကြာမြင့်ချိန် ၁၃၁ မိနစ်ရှိတဲ့ Tamil ဘာသာစကားပြော ဒီရုပ်ရှင်ကားကိုတော့ ပြီးခဲ့တဲ့ ဇွန်လ ၂၂ ရက်နေ့တည်းက ရုံတင်ပြသနေတာ ဖြစ်ပါတယ်။ မူဗီခရေဇီတွေကို နောက်ဆုံး မိတ်ဆက်ပြောပြပေးချင်တဲ့ ဇာတ်ကားကတော့ Sicario: Day Of the Soldado ဆိုတဲ့ ရုပ်ရှင်ကားပါ။ ဒီကားကတော့ American Action Thriller အမျိုးအစား ရုပ်ရှင်ကားတကားဖြစ်ပြီး အမေရိကန် ဇာတ်ညွှန်းရေးဆရာ၊ သရုပ်ဆောင်၊ ဒါရိုက်တာတဦးဖြစ်တဲ့ Taylor Sheridan ရဲ့ ဇာတ်လမ်းကို အီတလီဒါရိုက်တာ Stefano Sollima က ရိုက်ကူးထားတာ ဖြစ်ပါတယ်။ မက္ကဆီကိုနိုင်ငံ မူးယစ်ဆေးဝါးဂိုဏ်းတွေကနေ အကြမ်းဖက်သမားတွေကို အမေရိကန်နိုင်ငံ နယ်စပ်ထဲထိ ခိုးသွင်းတာတွေ လုပ်လာကြတဲ့အတွက် CIA Agent တယောက်ဖြစ်တဲ့  Matt Graver ဟာ Alejandro ရဲ့ အကူအညီကို ယူခဲ့ပါတယ်။ ဒါပေမယ့် Alejandro ဟာ ဘိန်းရာဇာတယောက်ရဲ့ သမီးကို ပြန်ပေးဆွဲပြီး အခြေအနေတွေ ပိုတင်းမာလာအောင် လုပ်လိုက်တဲ့ အချိန်မှာ ဘာတွေ ဆက်ဖြစ်လာမလဲဆိုတာကို ဒီကားထဲမှာ ရှုစားကြရမှာပါ။ အဓိက သရုပ်ဆောင်တွေဖြစ်တဲ့ CIA Agent Matt Graver နေရာမှာတော့ အ မေရိကန် သရုပ်ဆောင်မင်းသား Josh Brolin က ပါဝင်သရုပ်ဆောင်ထားပြီး Alejandro နေရာမှာတော့ Puerto Rican မင်းသား Benicio del Toro က ပါဝင်ထားခဲ့တာ ဖြစ်ကာ တခြား သရုပ်ဆောင်တွေလည်း ပါဝင်ထားကြတာ ဖြစ်ပါတယ်။ ဒီကားဟာ ၂၀၁၅ ခုနှစ်က ထွက်ရှိခဲ့တဲ့ Sicario ရုပ်ရှင်ရဲ့ နောက်ဆက်တွဲအနေနဲ့ ထွက်ရှိလာတာဖြစ်ပြီး ကြမ်းတမ်းတဲ့ ပြကွင်းပြကွက်တွေ၊ တိုက်ခိုက်မှုတွေနဲ့ ဇာတ်ဝင်ခန်းတွေ ပါဝင်နေတာမို့ Rated R အဆင့် သတ်မှတ်ထားတာ ဖြစ်ပါတယ်။ ကြာမြင့်ချိန် ၁၂၂ မိနစ်ရှိပြီး English နဲ့ Spanish ဘာသာစကားတွေကို အသုံးပြုထားတဲ့ ဒီရုပ်ရှင်ကားကိုတော့ ပြီးခဲ့တဲ့ ဇွန်လ ၂၉ ရက်နေ့တည်းက ရုံတင်ပြသနေတာ ဖြစ်ပြီး Box Office မှာတော့ ၂၇ ဒသမ ၄ သန်းထိ ရရှိထားခဲ့ပါတယ်။
Movie Crazy - DVB အစီအစဉ်ကို အပတ်စဉ် ဗုဒ္ဓဟူးနေ့ ညတိုင်း ၇း၃၀ နာရီမှာ ထုတ်လွှင့်ပြသနေတာ jဖစ်ပါတယ်။
ကြည့်ရှုဖို့ မမီလိုက်တဲ့ ပရိသတ်တွေအနေနဲ့ ကြာသပတေးနေ့ည ၉း၃၀ နာရီ၊ စနေနေ့ နေ့လယ် ၁၂း၁၅ နာရီနဲ့ တနင်္ဂနွေနေ့မနက် ၉း၁၅ နာရီတို့မှာ ပြန်လည် ထုတ်လွှင့်ပေးနေတာ ဖြစ်ပါတယ်။ ဒီအစီအစဉ်မှာ Movie Crazy တွေအတွက် နိုင်ငံတကာနဲ့ မြန်မာရုပ်ရှင်ကားတွေကို ကောင်းနိုးရာရာ ရွေးချယ်တင်ဆက်ပေးနေတာဖြစ်ပြီး Movie Crazy - DVB ဆိုတဲ့ Facebook စာမျက်နှာကနေတဆင့်လည်း Like, Share နဲ့ Comment တွေပေးပြီးတော့ အားပေးနိုင်ပါတယ်။

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024