မြင်းခြံ မီးရထား အရှုံးပေါ်နေ၊ အဆင့်မြှင့်တင်ရန် လိုအပ်
DVB
·
June 24, 2018
မန္တလေးတိုင်းဒေသကြီး မြင်းခြံမြို့ရှိ မြင်းခြံ ဘူတာမှ နေ့စဉ်ပြေးဆွဲနေတဲ့ မီးရထားတွေဟာ ခရီးသွားပြည်သူတွေ စီးနင်းမှု သိသိသာသာ လျော့နည်းသွားတာကြောင့် အရှုံးပေါ်နေပြီး မီးရထားကိုလည်း ပြန်လည်အဆင့်မြှင့်တင်ဖို့ လိုအပ်နေတယ်လို့ ဇွန်လ ၂၃ ရက်နေ့က မြင်းခြံဘူတာ ရုံပိုင်တာဝန်ခံ ဦးသန်းဌေးဝင်း က ပြောပါတယ်။
ဦးသန်းဌေးဝင်းက “နေ့စဉ် ပြေးဆွဲနေတဲ့ အစုန်အဆန် မီးရထားက လုံလောက်မှု ရှိပါတယ်။ ဒါပေမယ့် လက်ရှိပြေးဆွဲနေတဲ့ မီးရထားတွေ ပြန်ပြီးအဆင့်မြှင့်ဖို့တော့ လိုအပ်ပါတယ်။ တခုရှိတာက မီးရထားဟာ အချိန်ကန့်သတ်မှုရှိတယ်။ ခုနောက်ပိုင်းမှာ လမ်းပန်းဆက်သွယ်ရေးတွေ ကောင်းလာတာဆိုတော့ ကား ဆိုင်ကယ် စတာတွေ ပိုပြီး စီးနင်းလာကြတာ များလာတယ်။ ပြီးခဲ့တဲ့ ၅ နှစ်လောက်ကတော့ မီးရထား ပြေးဆွဲနေတဲ့ လမ်းဘူတာတွေမှာ ခရီးသည် အဆင်းအတက် နေ့စဉ် ၅ဝဝ ဝန်းကျင် စီးနင်းနေခဲ့ပြီး ခုချိန်မှာတော့ ၁ဝဝ ဝန်းကျင်သာ စီးနင်းသူ ရှိသလို မီးရထားဖြင့် ကုန်ပစ္စည်း တင်ပို့မှုကလည်း မရှိသလောက် ဖြစ်နေပြီး၊ နေ့စဉ် အရှုံးနဲ့ ပြေးဆွဲနေရတယ်လို့ ဒီဗွီဘီကို ပြောပါတယ်။
မြင်းခြံ - ရန်ကုန်၊ ညောင်ဦး - မန္တလေး၊ မြင်းခြံ - မြို့သာ စတဲ့ နေရာတွေကို နေ့စဉ် အစုန် အဆန် ပြေးဆွဲနေတာ ဖြစ်ပြီး မီးရထား စီးနင်းသူ သိသိသာသာ လျော့နည်းနေတာ ဖြစ်ပါတယ်။
“မီးရထားတော့ မစီးဖြစ်တော့ဘူး။ ဘာလို့လည်းဆိုတော့ အချိန်ကျန့်ကြာမှုတွေရှိတယ်။ ပြီးတော့ မီးရထားတွဲတွေက ညစ်ပတ်တယ်၊ မသန့်ရှင်းဘူး။ အနံ့အသက်မကောင်းတာဆိုတော့ မစီးဖြစ်တော့ဘူး။ ခုနောက်ပိုင်းမှာ ခရီးသွားတွေအတွက် ရွေးချယ်စရာ ကားဂိတ်တွေ အများကြီး ရှိလာတာဆိုတော့ မီးရထားကို မစီးချင်တော့တာပေါ့။ ဟိုအရင်ကတော့ ခရီးသွားတွေဟာ မီးရထားကိုပဲ အားကိုးပြီး သွားလာနေကြရတာဆိုတော့ စီးဖြစ်တယ်။ ဒါပေမယ့် မီးရထားတွဲတွေ သန့်ရှင်းပြီး အဆင့်မြှင့်တင်ပေးမယ်ဆိုရင်တော့ မီးရထားစီးသူတွေ ပြန်ရှိလာဦးမှာပါ” လို့ မြင်းခြံမြို့ခံတဦးက ပြောပါတယ်။
မြင်းခြံကနေ ရန်ကုန်ကို ရထားတွဲ ၁ တွဲအား သာစည်ဘူတာမှနေ ပြန်လည် ချိတ်ဆက်ထားတာဖြစ်ပြီး မြင်းခြံ-ရန်ကုန် တဦးကို ၃၄ဝဝ ကျပ် နှုန်း သတ်မှတ်ထားတာ ဖြစ်ပါတယ်။
မြင်းခြံ-မန္တလေး အထက်တန်းတွဲ တဦးကို ၁၉၅ဝ ကျပ် နဲ့ ရိုးရိုးတန်းအား ၁ဝဝဝ ကျပ် သတ်မှတ်ထားပြီး မြင်းခြံဘူတာမှာ မီးရထားဝန်ထမ်း အင်အား ၁၆ ဦးရှိတာ ဖြစ်ပါတယ်။
သတင်း - ရီရီထွန်း (မြင်းခြံ)
