ရုရှားကမ္ဘာ့ဖလားပွဲနှင့် စပ်လျဉ်း၍ မီဒီယာဒါရိုက်တာ ဦးဇော်မင်းထိုက်နှင့် မေးမြန်းချက်

ဓာတ်ပုံ - Zaw Minn Htike Facebook
ကမ္ဘာ့ဖလားဘောလုံးပွဲ ကျင်းပရာ ရုရှားနိုင်ငံ မော်စကိုမြို့မှာ ဖွင့်ပွဲပြုလုပ်မယ့် ဇွန်လ ၁၄ ရက် ဒီနေ့မှာ မိုးဖွဲရွာနေပြီး လုံခြုံရေးအတော်များများ ချထားတယ်။ ရုရှားအစိုးရကလည်း ဘောလုံးပွဲလုံခြုံရေးအတွက် အာမခံချက် ပေးထားတယ်လို့ မြန်မာနိုင်ငံဘောလုံးအဖွဲ့ချုပ် မီဒီယာဒါရိုက်တာ ဦးဇော်မင်းထိုက်က ပြောပါတယ်။ ရုရှား ကမ္ဘာ့ဖလားပွဲ အတွေ့အကြုံတွေနဲ့ ပတ်သက်ပြီး မြန်မာနိုင်ငံဘောလုံးအဖွဲ့ချုပ် တာဝန်ရှိသူတွေနဲ့အတူ မော်စကိုမြို့မှာ ရောက်နေတဲ့ အဖွဲ့ချုပ် မီဒီယာဒါရိုက်တာ ဦးဇော်မင်းထိုက်ကို ဒီဗွီဘီက ဆက်သွယ်မေးမြန်းထားပါတယ်။ မေး - မော်စကိုမှာ ဒီနေ့ မြင်ရကြားရတာလေးတွေ ပြောပြပေးပါဦး။ ဖြေ - အုပ်စုပွဲစဉ်တွေအနေနဲ့ ဒီနေ့ကတော့ အဖွင့်ပွဲပေါ့။ ကမ္ဘာ့ဖလား အဖွင့်ပွဲအနေနဲ့ ရုရှားနဲ့ ဆော်ဒီပေါ့နော်။ ဘရာဇီးတို့၊ မက္ကဆီကိုတို့ ချီလီတို့က ပရိသတ်တော်တော်များများကတော့ ရောက်နေကြတယ်။ ပျော်ပျော်ပါးပါး သီချင်းတွေဆိုရင်းနဲ့ ပျော်ပျော်ပါးပါးရှိတာကို တွေ့ရတယ်ခင်ဗျ။ တရုတ်ဆိုရင်လည်း သူတို့အုပ်စုလိုက် သူတို့အစီအစဉ်နဲ့သူတို့ မော်စကိုကို ရောက်နေတာ တွေ့ရတယ်။ မိုးကတော့ နည်းနည်း ဖွဲဖွဲ ဖွဲဖွဲ ရွာတာရှိတယ်။ အရမ်းအဆိုးကြီးတော့ မရှိပါဘူး။ မေး - လုံခြုံရေးနဲ့ပတ်သက်လို့ရော အစိုးရက ဘယ်လိုဆောင်ရွက်ထားတာမြင်တွေ့ရလဲ၊ တချို့ စိုးရိမ်တာက ရုရှား ဘောလုံးဆိုးသွမ်းပရိသတ်တွေရဲ့ အန္တရာယ်ကို စိုးရိမ်တာရှိတယ်။ အဲ့ဒီအပိုင်းရော။ ဖြေ - ကမ္ဘာ့ဖလားနဲ့ ပတ်သက်ပြီးတော့ လုံခြုံရေးကို လုံးဝ အပြည့်အဝ အာမခံတယ်လို့ သူတို့က ကတိပေးထားပြီးသားလေ။ လမ်းမှာလည်း လုံခြုံရေးတွေ တော်တော်များများ ရှိတယ်။ ရဲတပ်ဖွဲ့တွေ၊ စစ်တပ်တွေ၊ လုံခြုံရေးနဲ့ ပတ်သက်ပြီး စေတနာ့ဝန်ထမ်းတွေလည်း ရှိပါတယ်။ ကွင်းနားတော့ မရောက်သေးဘူး။ မေ်ာစကို ပတ်ဝန်းကျင်မှာတော့ လုံခြုံရေး တင်းတင်းကျပ်ကျပ်ရှိတယ်။ လက်ရှိသမ္မတ ပူတင်လက်ထက်မှာလည်း လမ်းပေါ်မှာ ဆိုးသွမ်းတဲ့ အုပ်စုတွေ တော်တော်များများကို နှိပ်ကွပ်ခဲ့တယ်လို့ ကျနော်တို့ သတင်းကြားရတယ်။ အဲတော့ အဲဒီအုပ်စုတွေလည်း သိပ်မရှိတော့ဘူးပြောတယ်။ မေး - မြန်မာနိုင်ငံ ဘောလုံးအဖွဲ့ချုပ်ကရော အဲ့ဒီမှာ ဘာတွေလုပ်ကြသေးလဲ။ ဖြေ - ကျနော်တို့ မြန်မာနိုင်ငံ ဘောလုံးအဖွဲ့ချုပ် အနေနဲ့တော့ မနက်ကလုပ်ခဲ့တဲ့ ကမ္ဘာ့ဘောလုံးအဖွဲ့ချုပ် ဖီဖာကွန်ဂရက်ညီလာခံ အဲဒါတက်တယ်။ ကျနော်တို့ ၂၀၂၆ ကမ္ဘာ့ဖလားပွဲအတွက်ကို မဲပေးခဲ့ရတာရှိတယ်။ နောက်ပြီးတော့ ဘောလုံးအဖွဲ့ချုပ်ကနေပြီးတော့ နှစ်စဉ် အစီရင်ခံတဲ့ ဖွံ့ဖြိုးရေးနဲ့ပတ်သက်တဲ့ စီမံကိန်းတွေ၊ ဘောလုံးနဲ့ပတ်သက်တဲ့ အထောက်အပံ့ အကူအညီတွေနဲ့ ပတ်သက်ပြီးတော့ သူတို့တင်ပြတာတွေရှိတယ်။ အသေးစိတ်ကိုတော့ ကျနော် သေချာမသိဘူး။ ဘာကြောင့်လဲဆို ကျနော် မတက်ရဘူး။ အဖွဲ့ချုပ် ဥက္ကဋ္ဌနဲ့ အထွေထွေအတွင်းရေးမှူးနဲ့ ဒုတိယဥက္ကဋ္ဌနဲ့ တက်ရတယ်။ ၂၀၂၂ ကမ္ဘာ့ဖလားနဲ့ ပြင်သစ်နိုင်ငံမှာ ၂၀၁၉ ခုနှစ်ကျင်းပမယ့် ဖီဖာညီလာခံပေါ့နော်။ အဲဒီအကြောင်းတွေကို အဓိက ဆွေးနွေးသွားတယ်လို့ သိရတယ်။ မေး - မြန်မာနိုင်ငံကနေ ကမ္ဘာ့ဖလားဘောလုံးပြိုင်ပွဲကို ရောက်နေကြတဲ့ ကလေးနှစ်ယောက်ရော မြန်မာလူငယ် ဘောလုံးသမား မောင်မင်းခန့်သူနဲ့ လူငယ်သတင်းထောက် မောင်သန့်တေဇာတို့  ဘာလုပ်နေကြလဲ။ ဖြေ - Football for Friendship  လူငယ်ဘောလုံးပွဲတော်နဲ့ လူငယ်ဖိုရမ် အစီအစဉ်မှာ ကျနော်က အဖွဲ့ခေါင်းဆောင်အနေနဲ့ ပါတယ်။ ပြီးတော့ ကလေးနှစ်ယောက်ရှိတယ်၊ စုစုပေါင်း လေးယောက်ပေါ့။ ကျနော်တို့လိုပဲ ကိုယ်စားလှယ်အဖွဲ့တွေ စုစုပေါင်း ၂၀၀၀ ကျော်လောက်ရှိတယ်။ အတူတူနေရတယ်။ အတူတူစားသောက်တယ်။ ဘောလုံးပွဲတော်တွေ၊ ဘောလုံးဖိုရမ်တွေ နောက်ပြီးတော့ နိုင်ငံတကာ ဘောလုံးချန်ပီယံရှစ်ပြိုင်ပွဲ အဲဒါတွေ ကျနော်တို့ ပါဝင်ယှဉ်ပြိုင်ရတယ်။ ဒီညနေမှာဆိုရင် World Cup ဖွင့်ပွဲအခမ်းအနား တက်ရမှာပေါ့နော်။ ဘောလုံးသမား ကလေးက မင်းခန့်သူ၊ ဒီနေ့ညနေ ဖွင့်ပွဲအခမ်းအနားမှာ နိုင်ငံတကာတွေရဲ့ အလံတွေ ကိုင်ဖို့ရှိတယ်။ သူက မြန်မာအလံ ကိုင်ရမှာပေါ့နော်။ ပြီးရင် ရုရှားနဲ့ ဆော်ဒီပွဲကို ကြည့်မယ်ပေါ့နော်။ နောက်တယောက် Young Journalist ကလေးကတော့ အောက်ဆင်းစရာမလိုဘူး။ သူကတော့ ကျနော်တို့နဲ့အတူ ပွဲကြည့်စင်မှာပဲရှိမယ်။ ဘောလုံးပွဲ ကြည့်မယ်ပေါ့နော်။ မေး - ဒီနေ့ ဖွင့်ပွဲပြီးရင်ရော ဘာလုပ်ကြဖို့ ရှိသေးလဲ။ ဖြေ- ကျနော်တို့ကတော့ ဒီနေ့ ဖွင့်ပွဲအခမ်းအနား ပြီးပြီဆိုရင် မနက်ဖြန် ပြန်မှာပေါ့။ မြန်မာနိုင်ငံကလာတဲ့ ကလပ်အသင်း ပိုင်ရှင်တွေ၊ အသင်းဥက္ကဋ္ဌတွေ သူတို့အဖွဲ့တွေကတော့ မနက်ဖြန် ပေါ်တူဂီပွဲကို ကြည့်ပြီးတော့မှ သူတို့ပြန်မှာ။ သူတို့က ၁၆ ရက်နေ့မှပြန်မှာ။ ကျနေ်ာတို့က ၁၅ ရက်နေ့ ပြန်မှာ။ မေး - မြန်မာပြည်က ကလေးနှစ်ယောက်နဲ့ရော ဖုန်းဆက်သွယ်လို့ ရနိုင်လား။ ဖြေ - လောလောဆယ်တော့ ကလေးနှစ်ယောက်လုံးကို ဆက်လို့မရဘူး။ တယောက်က ညနေ ဘောလုံးဖွင့်ပွဲအတွက်ကို မနက်ကတည်းက သွားပြီး ကြိုတင်ပြင်ဆင်နေတာပေါ့။ မပြီးသေးဘူး။ Young Journalist ကလေးကလည်း လက်မှတ်ထုတ်တာတို့ ဘာတို့ သွားလုပ်နေရတော့ သူတို့နှစ်ယောက်လုံးမရှိဘူး အနီးအနားမှာ။ မေး - ဘာများ ဖြည့်စွက်ပြောချင်သေးလဲ။ ဖြေ - ရုရှားက ဒီနှစ်မှာ ကမ္ဘာ့ဖလား ကျင်းပတယ်ပေါ့နော်။ ကျင်းပတော့  သူတို့နိုင်ငံအတွက်ကတော့ စီးပွားရေးအတွက် ဒီကမ္ဘာ့ဖလားကြောင့် ပိုပြီး တောင့်တင်း လာမယ်ထင်တယ်။ နိုင်ငံတကာကလည်း ရုရှားကို ပိုပြီး အာရုံစိုက်လာမယ် ထင်တယ်။ သမ္မတ ပူတင်အစိုးရကလည်း ဒီဟာကို ပိုပြီး အားစိုက်တာ တွေ့ရတယ်။ နိုင်ငံတကာကလာတဲ့ ပရိသတ်တွေ၊ ခြေစစ်ပွဲအောင်တဲ့ နိုင်ငံတွေရော ခြေစစ်ပွဲမအောင်တဲ့ နိုင်ငံတွေပါ လာကြည့်ကြတာပေါ့။ ကျနော်တို့နိုင်ငံကဆိုရင် ကျနော်တို့လောက်ပဲ ရှိတယ်။ သူတို့ကိုကြည့်ပြီး အားကျတယ်။ အရမ်းလည်း မျက်နှာငယ်ရတာပေါ့လေ။ တနေ့နေ့ တချိန်ချိန်မှာလည်း မြန်မာနိုင်ငံက ဒီလိုမျိုး ကမ္ဘာ့ဖလား မဟုတ်ရင်တောင် အာရှဖလားလိုဟာမျိုး နိုင်ငံတကာ ပြိုင်ပွဲကြီးတွေကို အိမ်ရှင်ပီပီသသနဲ့ လက်ခံကျင်းပချင်တာပေါ့။ ကျနော်တို့နိုင်ငံရဲ့ ဂုဏ်သိက္ခာကို ပြချင်တာပေါ့။ အဲဒီ ခံစားချက်လေးတော့ ဖြစ်တယ်။ ရွှေအောင်

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up