ခြင်္သေ့ပုံပါ စစ်ကိုင်းတိုင်းအမှတ်တံဆိပ်ကို ပြောင်းလဲရန် တိုင်းလွှတ်တော်အတည်ပြု
Aung Ko Latt
·
June 13, 2018
စစ်ကိုင်းတိုင်းဒေသကြီးကို ကိုယ်စားပြုတဲ့ တံဆိပ်၊ အလံ၊ ရင်ထိုးတွေက ပါတီကြီးတခုရဲ့ သင်္ကေတနဲ့ ခပ်ဆင်ဆင်တူညီနေတာကြောင့် သိသာထင်ရှားကွဲလွဲတဲ့ ဒီဇိုင်းပုံစံနဲ့ ပြင်ဆင်ပြောင်းလဲသတ်မှတ်ဖို့ ဒီကနေ့ တိုင်းလွှတ်တော်က အတည်ပြုလိုက်ပါတယ်။
ဒီအဆိုကို မုံရွာမြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်အမာကြည်က ဇွန် ၁၁ ရက်က စစ်ကိုင်းတိုင်းဒေသကြီးလွှတ်တော်မှာ တင်သွင်းခဲ့ပြီး အဆိုနဲ့ပတ်သက်လို့ လွှတ်တော်ကိုယ်စားလှယ် ၁၃ ဦးက ဆွေးနွေးခဲ့ပါတယ်။
အဲဒီထဲက အမျိုးသားဒီမိုကရေစီပါတီ ကိုယ်စားပြု လွှတ်တော်ကိုယ်စားလှယ် ၁၀ ဦးက ထောက်ခံဆွေးနွေးခဲ့ကာ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ကိုယ်စားပြု လွှတ်တော်ကိုယ်စားလှယ် ၂ ဦးက ကန့်ကွက်ဆွေးနွေးခဲ့ပြီး တပ်မတော်သားလွှတ်တော် ကိုယ်စားလှယ် ၁ ဦးက အကြံပြုဆွေးနွေးခဲ့ပါတယ်။
ကြံ့ခိုင်ရေးပါတီ မင်းကင်းအမတ် ဒေါက်တာဆန်းဝင်းက “အဆိုရှင်တင်ပြတဲ့ စစ်ကိုင်းတိုင်းဒေသကြီး ကိုယ်စားပြုအလံ၊ အမှတ်အသား၊ ရင်ထိုး တံဆိပ်တို့က ပွင့်လင်းစွာပြောရရင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီရဲ့ ကိုယ်စားပြု အလံ၊ အမှတ်အသားတံဆိပ်၊ ရင်ထိုးတွေနဲ့ ထပ်တူနီးပါးတူညီနေတယ်လို့ ဆိုလိုခြင်းဖြစ်ပါ တယ်။ ဇေယျာရွှေမြေခေါ်တဲ့ စစ်ကိုင်းတိုင်းရဲ့ အမှတ်အသားတံဆိပ်က အခုမှအသုံးပြုတာ မဟုတ်ဘူး။ မြန်မာ့ဆိုရှယ်လစ်လမ်းစဉ်ပါတီခေတ် တိုင်းနှင့်ပြည်နယ် အားကစားပြိုင်ပွဲတွေမှာ အသုံးပြုဖို့ ဆုံးဖြတ်ရာကနေ စစ်ကိုင်းတိုင်းအမှတ်အသားအဖြစ် ဒီနေ့ထိ သုံးစွဲလာတာပါ။ အခုလို ဆင်တူယိုးမှားဖြစ်မှုကလည်း တမင်ကြံရွယ်လုပ်ဆောင်တာမဟုတ်ဘဲ တိုက်ဆိုင်မှုသာ ဖြစ်ပါတယ်။”လို့ လွှတ်တေ်ာမှာ ဆွေးနွေးခဲ့ပါတယ်။
တံဆိပ်အတွက် ငြင်းခုန်နေကြရမယ့်အစား တနိုင်ငံလုံး တိုးတက်ဖွံ့ဖြိုးရေးအတွက် စုပေါင်းအားနဲ့ ဝိုင်းဝန်းလုပ်ဆောင်ကြရမယ့် အချိန်ကာလဖြစ်တယ် လို့လည်း ပြောဆိုခဲ့ ပါသေးတယ်။
ဒီအလံအမှတ်တံဆိပ်တွေက မဆလခေတ် လွန်ခဲ့တဲ့ ၄၄ နှစ်ကျော်အချိန်ကတည်းက အသုံးပြုခဲ့တာဖြစ်လို့ ပြည်သူတွေကြားထဲမှာ စွဲထင်နေပြီဖြစ်တဲ့အတွက် ပြောင်းလဲဖို့ မသင့်သလို ပြောင်းလဲမယ်ဆိုရင် စစ်ကိုင်းတိုင်းအတွင်းရှိ ပြည်သူ ၅ သန်းကျော်ရဲ့ သဘောထားကို ရယူသင့်တယ်လို့ တပ်မတော်သားလွှတ်တော်ကိုယ်စားလှယ် ဗိုလ်မှူး သက်နိုင်အေးက အကြံပြုဆွေးနွေးခဲ့ပါတယ်။
အဆိုနဲ့ပတ်သက်ပြီး ကန့်ကွက်သူရှိတဲ့အတွက် လျှို့ဝှက်မဲပေးစနစ်နဲ့ မဲခွဲဆုံးဖြတ်ရာ မဲပေးခွင့်ရှိသူ ၅၈ ဦးရှိတဲ့အထဲက ထောက်ခံမဲ ၅၇၊ ကန့်ကွက်မဲ ၄၊ ကြားနေ ၂၃ နဲ့ ပယ်မဲ ၁ မဲတို့ရှိခဲ့ပြီး ထောက်ခံမဲများတဲ့အတွက် စစ်ကိုင်းတိုင်းဒေသကြီး ကိုယ်စားပြုအလံ၊ အမှတ်အသား၊ ရင်ထိုးတံဆိပ်တွေကို ပြောင်းလဲဖို့ အတည်ပြုခဲ့ပါတယ်။
“တတိုင်းလုံးကို ဒီလိုဂိုနဲ့ပတ်သက်ပြီးတော့ ပြိုင်ပွဲဖိတ်ခေါ်မယ်။ ပညာရှင်တွေနဲ့ ရွေးချယ်မယ်။ စိတ်ကူးထားတာပေါ့။ ရွေးချယ်ပြီး ဆုပေးမယ်။ ဒီဟာကို အများသဘောကျ ရွေးချယ်ပြီး အတည်ပြုမယ်။ ဒါကိုလည်း လွှတ်တော်ကိုတင်ပြီး အတည်ပြုမယ်”လို့ အဆိုရှင် ဒေါ်အမာကြည်က ပြောပါတယ်။
ဒီကိစ္စနဲ့ပတ်သက်ပြီး လွှတ်တော်က အတည်ပြုခဲ့ပြီဖြစ်ပေမယ့် ဘယ်အချိန်မှာ အကောင်အထည်ဖော်မယ်ဆိုတာတော့ မသိရသေးပါဘူး။
