ထိုင်းနိုင်ငံသား တရားခံပြေးကို တာချီလိတ်မြို့တွင် ဖမ်းမိ
DVB
·
June 3, 2018
ငွေကြေးခဝါချမှု၊ မူးယစ်ဆေးဝါးအမှုတို့နဲ့ ထိုင်းနိုင်ငံက အလိုရှိနေတဲ့ မစ္စတာ ကျလွန်ကို တာချီလိတ်မြို့မှာ ဖမ်းဆီးမိခဲ့တယ်လို့ ပြည်ထဲရေးသတင်းမှာ ဖော်ပြထားပါတယ်။
ထိုင်းနိုင်ငံသား ကျလွန်(ခ)ဝိုင်(ခ)ကော့ကိတိဖွန်ဖာနိ (Mr Charoen Kiattiphonphanit) နဲ့ ပတ်သက်ပြီး ကူညီစုံစမ်းဖမ်းဆီးပေးဖို့ သတင်းဖလှယ်ဆက်သွယ်ပေးပို့မှုအရ မေ ၃၁ ရက်နေ့ ည ၁၁ နာရီကျော်မှာ မူးယစ်တပ်ဖွဲ့စု ၃၀ တာချီလိတ်မှ တပ်ဖွဲ့ဝင်တွေ ပါဝင်တဲ့ ပူးပေါင်းအဖွဲ့ဟာ မစ္စတာ ကျလွန် တည်းခိုနေတဲ့ တာချီလိတ်မြို့၊ ဝိန်းကျောက်ရပ်ကွက်၊ တော်ကော့(တွင်း) ကျေးရွာရှိ အမှတ် (တကတ-၈၇)၊ အခန်းအမှတ် ၁ ကို ရှာဖွေရာမှ ဖမ်းဆီးမိခဲ့တာပါ။
မစ္စတာ ကျလွန်နဲ့အတူ ကျောက်ပါ ရွှေလက်စွပ် ၆ ကွင်း၊ ရွှေဆွဲကြိုး ၁ ကုံး၊ ရွှေဟန်းချိန်း ၂ ခု၊ ရွှေလက်ကောက် ၁ ကွင်း၊ လိပ်ပုံရွှေပြား ၁ ပြား၊ I Pad ၁ လုံး၊ Laptop ၁ လုံး၊ ထိုင်းဘတ်ငွေ ၄၂ သိန်း၊ ငွေကျပ် ၈၄ ဒသမ ၄၅ သိန်း၊ ALPHARD မော်တော်ယာဉ် ၁ စီးနဲ့ လက်ကိုင်ဖုန်း ၇ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။
မစ္စတာကျလွန် ၄၂ နှစ်အား ဥပဒေနဲ့အညီ အရေးယူဆောင်ရွက်နိုင်ရေးအတွက် ထိုင်းနိုင်ငံ မူးယစ်ဆေးဝါးထိန်းချုပ်ရေးအဖွဲ့ရုံး (ONCB) နဲ့ ပူးပေါင်းဆောင်ရွက်နေကြောင်း သိရပါတယ်။