မိုးကုတ်တွင် အထက ၃ ကျောင်းခွဲ ကော်ရစ်တာ ပြိုကျ
DVB
·
June 2, 2018
မိုးကုတ်မြို့နယ် ပန်လင်ကျေးရွာရှိ အောင်ချမ်းသာ အထက ၃ ကျောင်းခွဲမှာ ဇွန် ၁ ရက်နေ့ မနက် ၉ နာရီလောက်အချိန်က နှစ်ထပ်စာသင်ဆောင် ကော်ရစ်တာပြိုကျမှု ဖြစ်ပွားခဲ့ပါတယ်။
အခုလို စာသင်ဆောင် ကော်ရစ်တာပြိုကျတာဟာ ၂၀၁၈ - ၂၀၁၉ ပညာသင်နှစ်အတွက် ကျောင်းစဖွင့်တဲ့ရက်မှာ ဖြစ်ပွားခဲ့တာပါ။
စာသင်ကျောင်းဆောင်ပြိုကျမှုကြောင့် ကျောင်းသားတဦး အနည်းငယ် ဒဏ်ရာရရှိသွားပြီး တခြားအသေပျောက်တော့ မရှိခဲ့ဘူးလို့ မိုးကုတ်မြို့နယ် ပြောင်ခေါင်းလူမှုကူညီရေးအသင်းမှ တာဝန်ရှိသူတဦးက ပြောပါတယ်။
"အသေပျောက်မရှိပါဘူး။ ဒဏ်ရာရတဲ့ ကလေးကို ဓာတ်မှန်ရိုက်တယ်။ စိုးရိမ်စရာ မရှိဘူးလို့ သိရတယ်။ စာသင်ဆောင်သက်တမ်းကတော့ ကြာပါပြီ " လို့ ပြောပါတယ်။
အဆိုပါ စာသင်ဆောင်အဆောက်ဦရှိ ဒုတိယထပ်မှာ စာသင်ခန်း ၆ ခန်းရှိပြီး ကော်ရစ်တာပြိုကျတာဟာ စာသင်ခန်း ၂ ခန်းရဲ့ ရှေ့ဘက်အခြမ်းနေရာက ပြိုကျတာ ဖြစ်ပါတယ်။
ကော်ရစ်တာပြိုကျတဲ့ စာသင်ကျောင်းဆောင်ဟာ ၁၉၇၄ ခုနှစ်က တည်ဆောက်ထားတဲ့ အဆောက်ဦလို့ သိရပါတယ်။
ရန်နိုင်စိုး