ဖားကန့်တွင် မြေစာပုံပြိုကျ၍ ၁ ဦးသေ၊ ၆ ဦးဒဏ်ရာရ
DVB
·
May 21, 2018
ကချင်ပြည်နယ်၊ ဖားကန့်မြို့နယ်၊ ဝှေခါကျေးရွာအနီးရှိ ရတနာကြယ် ကျောက်မျက်ကုမ္ပဏီလုပ်ကွက်မှာ မေ ၂၀ ရက် ညနေ ၆ နာရီလောက် မြေစာပုံပြိုကျတဲ့ အတွက် ၁ ဦးသေဆုံးခဲ့ပြီး ၆ ဦး ဒဏ်ရာရရှိခဲ့တယ်လို့ ဖားကန့်မြို့နယ် ဆိပ်မူရဲကင်းစခန်းမှူး ရဲအုပ်အောင်ဇင်ကျော်က ပြောပါတယ်။
“ရတနာကြယ် ကျောက်မျက်ကုမ္ပဏီလုပ်ကွက်အတွင်း အမြင့်ပေ ၁၀၀ အကျယ် ၅၀ ပေလောက်ရှိတဲ့ ကမ်းပါးမြေစာတွေ ရုတ်တရက်ပြိုကျတဲ့အတွက် ရေမဆေး ကျောက်ရှာဖွေသူ ဦးအောင်ဌေး မြေစာတွေနဲ့ရေတွေ ရောနေတဲ့ အိုင်ထဲ ပါးစပ်နဲ့ နှာခေါင်းမှာ သဲတွေ နစ်မြုပ်သေဆုံးနေပြီး ကျန်တဲ့ ၆ ဦး မစိုးရိမ်ရဒဏ်ရာတွေ ရရှိခဲ့တာ”လို့ ဆိပ်မူရဲကင်းစခန်းမှူး ရဲအုပ်အောင်ဇင်ကျော်က ပြောပါတယ်။
မြေစာပုံပြိုကျရာနေရာကို မီးသတ် တပ်ဖွဲ့ဝင် ၅ ဦး၊ အရန် မီးသတ် ၁၀ ဦးနဲ့ ရှာဖွေ ကယ်ဆယ်ရေးလုပ်ငန်းတွေ ဆောင်ရွက်ခဲ့ပြီး ဒဏ်ရာရရှိသူတွေကို ဝှေခါလူမှုကူညီရေးအသင်း ကားနဲ့ ဖားကန့်ပြည်သူ့ဆေးရုံသို့ ပို့ဆောင်ပေးခဲ့တယ်လို့ ရှာဖွေရေးလုပ်ငန်း ဆောင်ရွက်ခဲ့တဲ့ ဖားကန့်မြို့နယ်မီးသတ်ဦးစီးမှူး ဦးပြေငြိမ်းကပြောပါတယ်။
မြေစာပုံပြိုကျလို့သေဆုံးခဲ့တဲ့ ဦးအောင်ဌေးကို ဓမ္မတာအတိုင်းသေဆုံးတာ ဟုတ်မဟုတ် သိရှိနိုင်ဖို့ ဖားကန့်မြို့မရဲစခန်းက သေမှုသေခင်းအမှတ်စဉ် ၃၃/၂၀၁၈ အမှုဖွင့် ဆောင်ရွက်နေပါတယ်။
ကိုကိုလင်း(အင်းတော်)