မူဆယ်မြို့က တိုက်ခိုက်မှုတွေကြောင့် အမျိုးသမီး ၂ ယောက်အပါအဝင် အရပ်သား ၁၅ ယောက် သေဆုံးပြီး ရဲနဲ့ ပြည်သူ့စစ် ၄ ယောက် သေဆုံးခဲ့တယ်လို့ နိုင်ငံတော် အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေးက ဆိုပါတယ်။ ဒီနေ့ မနက် ၅ နာရီ ၁၅ မိနစ်လောက်မှာ အင်အား ၁၀၀ လောက်ရှိတဲ့ တအာင်းပလောင် လွတ်မြောက်ရေး တပ်မတော် (တီအန်အယ်လ်အေ) နဲ့ ကချင်လွတ်မြောက်ရေးတပ်တော် (ကေအိုင်အေ) တို့က  ပန်ခမ်းတံတား လုံခြုံရေး ရဲကင်းကို တိုက်ခိုက်ခဲ့တာလို့ သူ့ရဲ့ ဖေ့စ်ဘွတ်ခ်မှာ ဖော်ပြထားတာပါ။ ကနဦး သတင်းတွေအရ အရာရှိတယောက်သေဆုံးပြီး ရဲတပ်ဖွဲ့ဝင် ၃ ယောက် ဒဏ်ရာရ၊ ပြည်သူ့စစ် ၃ ယောက် သေဆုံးပြီး ၆ ယောက် ဒဏ်ရာရ၊ အရပ်သား အယောက် ၂၀ ဒဏ်ရာရတယ်လို့ ဆိုပါတယ်။ ရဲကင်း လုံခြုံရေးတာဝန်ကျ ရဲတပ်ဖွဲ့ဝင်တွေဟာ ပန်ဆေးပြည်သူ့စစ် ၄ ယောက်၊ မြို့မ ပြည်သူ့စစ် ၁၀ ယောက်တို့နဲ့ ပူးပေါင်းတိုက်ခိုက်ခဲ့ပေမယ့် ပန်ခမ်းတံတားတဖက် မြို့မ ပြည်သူ့စစ် လုံခြုံရေးယူထားတဲ့ ဘန်ကာကို တီအန်အယ်လ်အေ တို့ ရယူသွားတဲ့အတွက် ပြည်သူ့စစ် ၅ ယောက်ဟာ ရဲတပ်ဖွဲ့ဝင်တွေနဲ့ ပူးပေါင်းပြီး ပြန်လည် ခုခံခဲ့တယ်လို့ ဆိုပါတယ်။ မနက် ၈ နာရီ ၁၀ မိနစ်မှာ တီအန်အယ်လ်အေ တပ်ဖွဲ့က ယာဉ်ရပ်နားကွင်းမှာ ရပ်ထားတဲ့ ကားတစီးကို မီးရှို့ပြီး တံတားတောင်ဘက် တောင်ကြောပေါ် ဆုတ်ခွာသွားခဲ့ရာမှာ တပ်မတော်က လိုက်လံရှင်းလင်းနေတယ်လို့လည်း ရေးသားထားပါတယ်။