အန်စီအေတွင် ကရင်နီတပ်ဖွဲ့ အမြန်ဆုံး ပါဝင်လက်မှတ်ထိုးနိုင်ရေး ကြိုးပမ်းရန်သဘောတူ
DVB
·
April 27, 2018
ကရင်နီအမျိုးသား တိုးတက်ရေးပါတီ (ကေအန်ပီပီ)အနေနဲ့ တနိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (အန်စီအေ)မှာ အမြန်ဆုံး ပါဝင်လက်မှတ်ထိုးနိုင်ဖို့ ကြိုးပမ်းဆောင်ရွက်ဖို့ သဘောတူညီမှု ရရှိသွားပါတယ်။
ဧပြီ ၂၆ ရက်က စတင်ပြီး ကယားပြည်နယ်၊ လွိုင်ကော်မြို့မှာ နှစ်ရက်ကြာ ဆွေးနွေးခဲ့တဲ့ ကေအန်ပီပီနဲ့ အစိုးရ ငြိမ်းချမ်းရေးကော်မရှင်တို့ တရားဝင်တွေ့ဆုံပွဲမှာ သဘောတူညီခဲ့တာလို့ ဆွေးနွေးပွဲအပြီး ထုတ်ပြန်တဲ့ နှစ်ဖက် ပူးတွဲကြေညာချက်မှာဖော်ပြပါတယ်။
အန်စီအေ လက်မှတ်မထိုးခင် နှစ်ဖက်တပ်ဖွဲ့တွေ သွားလာမှု၊ ဆက်သွယ်မှု ပြည်နယ်အဆင့်မှာ ညှိနှိုင်းရေးကိစ္စ၊ ပြည်နယ်အစိုးရနဲ့ ကေအန်ပီပီတို့အကြား ပုံမှန်ဆွေးနွေးညှိနှိုင်းဖို့၊ ပြည်နယ်နဲ့ ပြည်ထောင်စုအဆင့်တွေမှာ ဆက်ဆံရေးတာဝန်ခံတွေ ပြန်ထားရှိဖို့အပြင် တပ်ပိုင်း ဆိုင်ရာကိစ္စနဲ့ ပတ်သက်ပြီးလည်း ဆက်လက်ဆောင်ရွက်ဖို့ စတာတွေ သဘောတူခဲ့ကြပါတယ်။
ဒါ့အပြင် ပြည်နယ်အဆင့်နဲ့ ဒေသအဆင့် ပူးတွဲစောင့်ကြည့်ရေး လူ့အခွင့်အရေးဆိုင်ရာ စောင့်ကြည့်လေ့လာရေး၊ မူးယစ်ဆေးဝါး၊ သစ်တောပြုန်းတီးမှု၊ လူကုန်ကူးမှုနဲ့ တပ်ပိုင်းဆိုင်ရာ စတဲ့ ကိစ္စတွေကိုလည်း ဆွေးနွေးခဲ့ကြတာ ဖြစ်ပါတယ်။
ဆွေးနွေးပွဲမှာ အစိုးရဘက်က ဦးဆောင်တက်ရောက်တဲ့ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန၊ ဒုဥက္ကဋ္ဌ၊ ပြည်ထောင်စုဝန်ကြီး ဦးကျော်တင့်ဆွေက ဒီဆွေးနွေးပွဲဟာ မြန်မာနိုင်ငံအလယ်ပိုင်းကနေ အောက်ပိုင်းတစ်ခုလုံး ငြိမ်းချမ်းရေး အလင်းရောင်တွေ ထွန်းလင်းတောက်ပနိုင်ဖို့ အလားအလာ ရှိ၊ မရှိကို အဆုံးအဖြတ်ပေးမယ့် ဆွေးနွေးပွဲဖြစ်မယ်လို့ မနေ့က ပြောပါတယ်။
“ဒီကနေ့ ဆွေးနွေးပွဲက ကယားပြည်နယ် ငြိမ်းချမ်းရေးအတွက် အားတက်ဖွယ်ရာ ရလဒ်တွေ ထွက်ပေါ်လာမလား၊ အရင်လိုပဲ မသဲမကွဲ၊ မရေမရာ အခြေအနေတွေပဲ ထွက်ပေါ်လာမလား ဆိုတာကတော့ ဒီကနေ့ စားပွဲဝိုင်းမှာ ရောက်ရှိနေကြသူ အားလုံးနဲ့ သူတို့ရဲ့ စိတ်ရင်း စေတနာအပေါ်မှာ မူတည်နေပါတယ်၊ ဒီကနေ့ ဆွေးနွေးပွဲဟာ မြန်မာနိုင်ငံအလယ်ပိုင်းကနေ အောက်ပိုင်းတခုလုံး ငြိမ်းချမ်းရေး အလင်းရောင်တွေ ထွန်းလင်းတောက်ပနိုင်ဖို့ အလားအလာ ရှိ၊ မရှိကို အဆုံးအဖြတ် ပေးတော့မှာ ဖြစ်ပါတယ်”
ကယားပြည်နယ် ပြည်သူလူထုအတွက် အထူးပဲ လိုလားတောင့်တနေတဲ့ အရေးကြီးလှတဲ့ သမိုင်းမှတ်တမ်းဝင် ဆွေးနွေးပွဲ ဖြစ်တယ်လို့လည်း ဝန်ကြီးက ပြောပါတယ်။
ဒါ့အပြင် အန်စီအေ လက်မှတ်ထိုးလိုက်တာနဲ့ လက်နက်တွေ အပ်နှံရမယ်ဆိုတာမျိုး ထင်ယောင်ထင်မှား ဖြစ်နေတာတွေလည်း ရှိတယ်၊ တကယ်တော့ အန်စီအေ ဆိုတာ လက်နက်ကိုင် ပဋိပက္ခတွေ မဖြစ်ပွားဖို့ ပစ်ခတ်တိုက်ခိုက်မှုတွေကို ရပ်စဲလိုက်ပြီး ရပ်စဲလိုက်တဲ့ ပစ်ခတ်တိုက်ခိုက်မှု ရပ်စဲရေး လုပ်ငန်းစဉ် ခိုင်မာအောင် စနစ်တကျ ဆောင်ရွက်ခြင်းဖြစ်သလို တစ်ဖက်မှာလည်း နိုင်ငံရေးဆွေးနွေးပွဲတွေ ကနေပြီးတော့ နိုင်ငံရေး ပြဿနာတွေကို ညှိနှိုင်းအဖြေရှာနိုင်ဖို့ အစပျိုးလိုက်ခြင်းပဲ ဖြစ်တယ်လို့လည်း ပြောပါတယ်။
အစိုးရနဲ့ ကေအန်ပီပီတို့ရဲ့ နှစ်ရက်ကြာ ဆွေးနွေးပွဲကို ဧပြီ ၂၆ရက်နဲ့ ၂၇ရက်မှ ကယားပြည်နယ်၊ လွိုင်ကော်မြို့မှာ ပြုလုပ်နေပြီး ကေအန်ပီပီဘက်ကတော့ ဗဟိုအလုပ်အမှုဆောင် ကော်မတီဝင် ဦးဘီထူး ခေါင်းဆောင်တက်ရောက်ဆွေးနွေးခဲ့ပါတယ်။
ပြီးခဲ့တဲ့ မတ်လ ၇ ရက်က ရန်ကုန်မြို့၊ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေး ဗဟိုဌာနမှာ ပြုလုပ်ခဲ့တဲ့ ကေအန်ပီပီကိုယ်စားလှယ်တွေနဲ့ အစိုးရ ငြိမ်းချမ်းရေးကော်မရှင်တို့ အလွတ်သဘော ဆွေးနွေးပွဲပြီးနောက် အခုလို တရားဝင်ဆွေးနွေးပွဲကို ပြုလုပ်တာဖြစ်ပါတယ်။
ဒီဆွေးနွေးပွဲမှာ ပြည်နယ်တွင်းက ဒေသခံ နိုင်ငံရေးပါတီတွေက ကိုယ်စားလှယ်တွေ၊ အရပ်ဘက်အသင်းအဖွဲ့ ကိုယ်စားလှယ်တွေ၊ ဘာသာရေးအဖွဲ့အစည်း ခေါင်းဆောင်တွေနဲ့ အန်စီအေ လက်မှတ်ရေးထိုးထားပြီး တိုင်းရင်းသားလက်နက်ကိုင် အဖွဲ့ကိုယ်စားလှယ်တွေက လေ့လာသူအဖြစ် တက်ရောက်ခဲ့ပါတယ်။
ကေအန်ပီပီအနေနဲ့ ၂၀၁၂ ခုနှစ်မှာ ပြည်နယ်အဆင့်နဲ့ ပြည်ထောင်စုအဆင့်တွေမှာ အပစ်အခတ်ရပ်စဲရေး သဘောတူ လက်မှတ်ရေးထိုးထားတဲ့ တိုင်းရင်းသားလက်နက်ကိုင် အဖွဲ့ဖြစ်ပြီး ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ(ယူအန်အက်ဖ်စီ) အဖွဲ့ဝင်လည်း ဖြစ်ပါတယ်။
သတင်း၊ ဓာတ်ပုံ - ခွန်းတူးတူးလေး
