ကရင်နီပြည်လူငယ်များသမဂ္ဂ ဖွဲ့စည်းတည်ထောင်ခြင်း ၁၀ ပြည့်အထိမ်းအမှတ်ပြုလုပ်
DVB
·
April 22, 2018
ကယားပြည်နယ်နဲ့ ကယန်းဒေသကို အခြေပြုပြီး လူငယ်နိုင်ငံရေး အစုအဖွဲ့တစ်ခုဖြစ်တဲ့ ကရင်နီပြည်လူငယ်များ သမဂ္ဂ(ယူကေအက်ဝိုင်)အဖွဲ့ ဖွဲ့စည်းတည်ထောင်ခြင်း ၁၀ နှစ်ပြည့် အထိမ်းအမှတ် အခမ်းအနားကို လွိုင်ကော်မြို့နယ် ထေးဌားလျား ကျေးရွာရှိ ယူကေအက်ဝိုင် ရုံးမှာ ဧပြီလ ၂၁ ရက်နေ့က ပြုလုပ်ခဲ့ပါတယ်။
ဒီအထိမ်းအမှတ် အခမ်းအနားမှာ သမဂ္ဂအဖွဲ့ဝင် အဖွဲ့အစည်းတွေ၊ အခြားသော လူငယ် မဟာမိတ်အဖွဲ့အစည်း၊ ကယန်းအမျိုးသားပါတီ၊ ကရင်နီပြည် လူမျိုးပေါင်းစုံ ပြည်သူ့ လွတ်မြောက်ရေးတပ်ဦး အဖွဲ့တွေက ကိုယ်စားလှယ်တွေ တက်ရောက်ခဲ့ပြီး သမဂ္ဂသမိုင်းကို ဖတ်ကြားခြင်း၊ အမှတ်တရစကားပြောကြားခြင်းနဲ့ ကဗျာရွတ်ဖတ်ခြင်း အစီအစဉ်တွေကို ပြုလုပ်ခဲ့ပါတယ်။
အဆိုပါ သမဂ္ဂအဖွဲ့အစည်းဟာ ကရင်နီပြည်နယ်တွင်း လူ့အခွင့်အရေး ကာကွယ်မြှင့်တင် ရေး၊ ဒီမိုကရေစီရေးထွန်းကားရေးတွေအပြင် အမျိုးသားတန်းတူရေး၊ ငြိမ်းချမ်းရေးနဲ့ ဖက်ဒရယ် ပြည်ထောင်စုစနစ်ပေါ်ပေါက်လာရေး ကိစ္စရပ်တွေမှာ လုပ်ကိုင်ဆောင်ရွက်နေတဲ့ အဖွဲ့အစည်း ဖြစ်ပါတယ်။
ကရင်နီပြည်လူငယ်များ သမဂ္ဂအဖွဲ့ အထွေထွေ အတွင်းရေးမှူးချုပ် ခွန်းဘားနဒ်ဘုတ်က "ကျနော်တို့တွေ ညီညွှတ်ရေးတွေ တည်ဆောက်မှ သာလျှင် ကျနော်တို့ တိုင်းရင်းသားဒေသမှာ ဒီမိုကရေစီအကူးအပြောင်းကာလမှာ ကျနော်တို့ လူငယ်တွေအနေနဲ့ ကျရာကဏ္ဍကနေ ပါဝင်ဝန်းရံမှုတွေနဲ့ ဒီမိုကရေစီရေး၊ ဖက်ဒရယ်ရေးနဲ့ ပတ်သက်ပြီး ကျနော်တို့ လုပ်ဆောင်နေ ပါတယ်" လို့ပြောပါတယ်။
ကရင်နီပြည်လူငယ်များ သမဂ္ဂကို ၂၀၀၇ ခုနှစ်တွင် စတင်ဖွဲ့စည်းခဲ့ပြီး ဒီသမဂ္ဂအဖွဲ့မှာ ကယားပြည်နယ် ကျောင်းသားများသမဂ္ဂ၊ ကယန်းမျိုးဆက်သစ်လူငယ်၊ ကရင်နီအမျိုးသား လူငယ်အစည်းအရုံး၊ ကယန်းအမျိုးသမီးအစည်းအရုံးနဲ့ တသီးပုဂ္ဂလ နိုင်ငံရေး တက်ကြွ လှုပ်ရှားသူတွေနဲ့ ဖွဲ့စည်းထားပါတယ်။
သတင်း၊ ဓာတ်ပုံ- ခွန်းတူးတူးလေး