ရခိုင်သင်္ကြန်တွင် လုံခြုံရေးရဲအင်အား ၃၀၀၀ ခန့် တိုးမြှင့်ချထား
DVB
·
April 14, 2018
ဒီနှစ် ရခိုင်သင်္ကြန် ရခိုင်ပြည်နယ် ၁၇ မြို့နယ်လုံးကို ပြဿနာတွေ တစုံတရာမဖြစ်ရအောင် ရဲတပ်ဖွဲ့အင်အား ၃၀၀၀ ဝန်းကျင်နဲ့ လမ်းဆုံးလမ်းခွတွေ ဗဟိုမဏ္ဍပ်တွေမှာ တာဝန်ယူဆောင်ရွက်နေတယ်လို့ ရခိုင်ပြည်နယ် ရဲတပ်ဖွဲ့မှူး ရဲမှူးကြီး အောင်မြတ်မိုးက ပြောပါတယ်။
“ရခိုင်ပြည်နယ်၊ စစ်တွေမြို့အပါအဝင် မြို့ ၁၇ မြို့နယ်မှာ မဏ္ဍပ်အကြီး အသေး ၄၅ ခုရှိပါတယ်။ အဲ့ဒီမှာ ကျနော်တို့ လမ်းကြောင်းလုံခြုံရေး၊ မဏ္ဍပ်လုံခြုံရေးစတဲ့ ရဲအင်အား ၃၀၀၀ နီးပါးနဲ့ ဆောင်ရွက် နေပါတယ်။ စစ်တွေမြို့မှာဆိုရင်တော့ ဗဟိုမဏ္ဍပ်ကြီး၊ နောက်ပြီး မိဇံမဏ္ဍပ်၊ လမ်းဆုံလမ်းခွတွေမှာ အရေးပေါ်မြို့လုံခြုံရေးအတွက် လုပ်ထားပါတယ်။ သံတွဲမြို့မှာ ဆိုရင်လည်း ဗဟိုမဏ္ဍပ် အပါအဝင် အားလုံး လုံခြုံရေး ယူထားပါတယ်” လို့ဒီဗွီဘီကိုပြောပါတယ်။
စစ်တွေအပါအဝင် မြို့နယ်တွေက နာမည်ကြီးမဏ္ဍပ်တွေရဲ့ အဝင်အထွက်တွေကို စစ်ဆေးတာ၊ မိုင်းရှာဖွေတာတွေ လုပ်နေတယ်လို့လည်း ရဲမှူးကြီးက ဆက်ပြောပါတယ်။
“ကျနော်တို့ မိုင်းတွေ ဘာတွေရှာဖွေတာတွေရှိတယ်။ ဗဟိုမဏ္ဍပ် အဝင်အထွက်တွေမှာလည်း ရှာဖွေရေး အဖွဲ့တွေရှိပါတယ်ခင်ဗျ၊ အရက်သေစာ၊ အရက်ပုလင်းတွေ၊ အရက်ဗူးတွေ၊ စိစစ်ပါတယ်။ နောက်ပြီး ချွန်ထက်တဲ့ ဓားတို့၊ လောက်လေးခွတို့၊ ချွန်ထက်တဲ့အရာတွေ၊ လူအန္တရာယ်ဖြစ်မယ့်အရာတွေအားလုံး လိုအပ်သလိုသိမ်းဆည်းပါတယ်”
သင်္ကြန်လည်ဒေသခံတွေကတော့ ရဲတပ်ဖွဲ့ဝင်တွေအနေနဲ့လည်း ဥပဒေအတိုင်း ဆောင်ရွက်ဖို့ လိုတယ်လို့ စစ်တွေဒေသခံ အောင်ကျာ်ဇံကပြောပါတယ်။
“လုံခြုံရေးဆောင်ရွက်တာတော့ ကောင်းပါတယ်။ မဖြစ်သင့်တာတွေ မဖြစ်ရင်အောင်ပေ့ါ။ ဒါပေမယ့် မလိုအပ်ဘဲ ဖမ်းဆီးခေါ်ဆောင်သွားတာတော့ မဖြစ်သင့်ဘူး။ သင်္ကြန်မှာလူတွေက တနှစ်တာ ပင်ပန်းသမျှ အကုန်ပျော်ကြတယ်။ ရဲတပ်ဖွဲ့ဝင်တွေက ဥပဒေအတိုင်း ဆောင်ရွက်ဖို့လိုတယ်။ အကြောက်တရားတွေ လွှမ်းလာအောင် မလုပ်ဆောင်သင့်ဘူး။ ဒါလေးတခုတော့ ပြောချင်တယ်” လို့ ဆိုပါတယ်။
ရခိုင်ပြည်နယ်၊ မြို့ကျေးလက်ဒေသတွေပါမကျန် နေရာအနှံ့အပြားမှာ ရခိုင်ရိုးရာဓလေ့တခု ဖြစ်တဲ့ သင်္ကြန်မတိုင်ခင် နံ့သာသွေးပြိုင်ပွဲပြုလုပ်တာတွေ၊ ဘုရားကျောင်းကန်သွားရောက်ပြီး ဘုရားရေသပ္ပာယ်တာတွေကို မနေ့ကနဲ့ ဒီကနေ့မှာ ပြုလုပ်ခဲ့ကြပါတယ်။
သတင်း-ဓာတ်ပုံ- ဝဏ္ဏခွာညို