ကျောက်မျက်ဥပဒေကို ကချင်ပါတီများ ပူးပေါင်းကန့်ကွက် ဆန္ဒပြ
DVB
·
March 19, 2018
ပြီးခဲ့တဲ့နှစ်က ပြည်ထောင်စုလွှတ်တော်မှာ အတည်ပြုခဲ့တဲ့ ၂၀၁၇ မြန်မာ့ကျောက်မျက်ရတနာ ဥပဒေကြမ်းဟာ ဒေသခံတိုင်းရင်းသားတွေအတွက် အကျိုးမရှိဘူးဆိုပြီး ကချင်ပါတီတွေက ကန့်ကွက်လိုက်ကြပါတယ်။
ကချင်အမျိုးသားကွန်ကရက်ပါတီ(ကေအန်စီ)၊ ကချင်ပြည်နယ်ဒီမိုကရေစီပါတီ (ကေအက်စဒီပီ)နဲ့ ကချင်ဒီမိုကရက်တစ်ပါတီ (ကေဒီပီ)တို့ ပူးပေါင်းပြီး ဒီကနေ့ ဖားကန့်မြို့မှာ လှည့်လည်ဆန္ဒထုတ်ဖော်ကန့်ကွက်ခဲ့ကြတာပါ။
ဆန္ဒဖော်ထုတ်ရတာနဲ့ပတ်သက်ပြီး ကချင်အမျိုးသားကွန်ကရက်ပါတီ ဥက္ကဋ္ဌ ဒေါက်တာ အမ်ကော်လက အဓိက အချက် ၅ ချက်ကို ထောက်ပြပြီးဆန္ဒထုတ်ဖော်ရတာဖြစ်တယ်လို့ ပြောပါတယ်။
“၂၀၁၇ မတ်လ ၁၃ ရက်က ဥပဒေထွက်ပြီးကတည်းက ကျနော်တို့ ကချင်အဖွဲ့တွေ ပြည်သူ့လွှတ်တော်ရော အမျိုးသားလွှတ်တော်ကို ဆွေးနွေးတင်ပြထားတာရှိတယ်။ အဲဒီမှာက အဓိကလုပ်ကွက်ကို ပြန်လည်ဖော်ထုတ်လာတယ်။ ဧက ၅၀ ၊ ၁၀ နှစ်ပေါ့နော်။ နံပါတ် ၂ က စက်ယန္တရားကန့်သတ်ချက် လုံးဝမပါဘူး။ နံပါတ် ၃ ကကျတော့ အချိန်ကန့်သတ်ချက်ပေါ့နေ်ာ။ အချိန်ကန့်သတ်ချက်ဆိုတာ နေ့ဆိုင်း ညဆိုင်း လုပ်နေတဲ့ဟာကို ၁၉၉၉ နအဖ လက်ထက်ကတည်းကနေပြီးတော့မှ ပြဋ္ဌာန်းလိုက်တဲ့ ဥပဒေအရပဲ ဆက်လက်ကျင့်သုံးနေတယ်။ နံပါတ် ၄ ကကျတော့ လုပ်ကွက် အဆိုပြုလွှာမှာ တရားမျှတမှု ကင်းမဲ့နေတယ်။ ကင်းမဲ့နေတဲ့အခါ ကျတော့ ကျနော်တို့ ဒေသခံတိုင်းရင်းသားတွေက အဲဒီမှာ ဝင်ရောက်လုပ်ကိုင်ခွင့်မရှိဘူး။ နံပါတ် ၅ အချက်ကတော့ ဥပဒေအမြန်ပြဋ္ဌာန်းဖို့ အရေးကြီးတယ်။ ဥပဒေကို အချိန်စွဲလေလေ၊ ဥပေဒေမဲ့ ထုတ်လုပ်မှုက ပိုပြီးကြီးမားလေလေပဲ။ ကျောက်ကြောတွေက ကုန်တော့မယ်။ မကုန်ခင်မှာ ကျနော်တို့ရဲ့ သယံဇာတကို ထိန်းသိမ်းဖို့လိုတယ်။ အကျိုးအမြတ်က နိုင်ငံတော်ဆီမှာ ဝင်ဖို့လိုတယ်။ ကျနော်တို့ နိုင်ငံသား တိုင်းရင်းသားတွေ အကုန်ခံစားဖို့လိုတယ်။ အဲဒီအချက် ၅ ချက်ကို ကျနော်တို့ အဓိကထားပြီး ပြောတာဖြစ်တယ်။”
သူတို့ဆန္ဒထုတ်ဖော်မှုမှာ အကြီးစား လုပ်ကွက်အလိုမရှိ၊ ကျောင်မျက်ဥပဒေသစ် အမြန်ပြဋ္ဌာန်းပေးရေး၊ စက်ယန္တရားတွေကန့်သက်ပေးရေး၊ ကျောက်မျက်ထုတ်လုပ်ရောင်းချမှုကို နိုင်ငံသားတိုင်းရင်းသားလက်ထဲရရှိရေး၊ တန်းတူအခွင့်အရေးရရှိရေး၊ ရေမဆေးလုပ်သားတွေ အန္တရာယ် ကင်းရှင်းရေးအစရှိတဲ့ ကြွေးကြော်သံတွေနဲ့ ဆန္ဒပြခဲ့ကြပါတယ်။
ဒီလို အလားတူဆန္ဒပြပွဲကို ပြီးခဲ့တဲ့လကလည်း မြစ်ကြီးနားမြို့မှာ ပြုလုပ်ခဲ့ကြပါတယ်။
ဓာတ်ပုံ - Zaw Win Maung