မီတာမရသေးသည့် ပြည်သူ သန်း ၃၀ အတွက် မီတာ ၄ မျိုးစနစ် စတင်ဟု လျှပ်စစ်ဝန်ကြီး ပြော
DVB
·
March 14, 2018
မီတာ ၄ မျိုးစနစ်ဟာ နိုင်ငံတော်ရဲ့ပေါ်လစီဖြစ်ပြီး မီတာမရသေးတဲ့ သန်း ၃၀ သော ပြည်သူလူထုတွေအတွက် ဦးတည်ပြီး ဆောင်ရွက်ခြင်းဖြစ်တယ်လို့ လျှပ်စစ်နှင့် စွမ်းအင်ဝန်ကြီး ဌာန ပြည်ထောင်စုဝန်ကြီး ဦးဝင်းခိုင်က ပြောပါတယ်။
မတ်လ ၁၄ ရက်က နေပြည်တော်မှာလုပ်ခဲ့တဲ့ လျှပ်စစ်နဲ့စွမ်းအင်ဝန်ကြီးဌာနရဲ့ သတင်းစာရှင်းလင်းပွဲမှာ ၀န်ကြီးက ပြောခဲ့တာ ဖြစ်ပါတယ်။
“လူဦးရေ သန်း ၃၀ ကို ရည်ရွယ်ပြီး ပြောနေတာ၊ နောက်ထပ် မီတာလုံးဝ မရှိသေးတဲ့ လူဦးရေ၊ ဗမာပြည်လူဦးရေ ၅၄ သန်းထဲက သန်း ၃၀ ကို ကျနော်က ပြည်ထောင်စုဝန်ကြီး တယောက်အနေနဲ့ ကျနော်က သူတို့ကိုပဲ ဦးစားပေးမှာပါ။ သူတို့ကို မီတာဈေး အပေါဆုံးနဲ့ ရအောင် ကျနော်တို့ လုပ်မှာပဲ။ ဒါက ပေါ်လစီပိုင်း၊ မီတာ ၄ မျိုးစနစ်ဟာ နိုင်ငံတော်ရဲ့ ပေါ်လစီ ဖြစ်ပါတယ်။ သန်း ၃၀သော မီတာမရသေးသော ပြည်သူလူထုတွေအတွက် ဦးတည်ပြီး ဆောင်ရွက်ခြင်း ဖြစ်ပါတယ်။”
ဧပြီလ ၁ ရက်မှာ စတင်မယ့် မီတာ ၄ မျိုးစနစ်မှာ ကျေးလက်၊ မြို့ကလေးတွေ၊ ပုံမှန်နဲ့ စက်မှုလက်မှုသုံး ဆိုပြီး ပါဝင်တယ်။
လျှပ်စစ်မီး သုံးစွဲမယ့် ပြည်သူတွေအနေနဲ့ မီတာ ၄ မျိုးထဲက နှစ်သက်ရာတခုကို ရွေးချယ်ခွင့် ရှိတယ်လို့လည်း ပြည်ထောင်စုဝန်ကြီး က ပြောပါတယ်။
ပြည်တွင်းမှာ လက်ရှိ လျှပ်စစ်ဓာတ်အား မဂ္ဂါဝပ် ၃၀၀၀ ကျော် ထုတ်လုပ်နိုင်နေပြီး လာမယ့် ၃နှစ်အတွင်း နောက်ထပ် မဂ္ဂါဝပ် ၃၀၀၀ ထုတ်လုပ်ဖို့ ရည်မှန်း ဆောင်ရွက်နေပါတယ်။
ဒီလို လုပ်ဆောင်ရာမှာ လတ်တလော ပြည်တွင်း လျှပ်စစ်ဓာတ်အားလိုအပ်ချက်အရ LNG ဓာတ်ငွေ့သုံးလျှပ်စစ်ထုတ်စနစ်နဲ့ လုပ်ဆောင်မှာဖြစ်ပြီး ရေရှည်လိုအပ်ချက်အရတော့ ရေအား လျှပ်စစ်ကနေ လျှပ်စစ်ဓာတ်အား ထုတ်လုပ်သွားမှာ ဖြစ်ပါတယ်။
မြန်မာနိုင်ငံမြောက်ပိုင်းမှာ ရေအားလျှပ်စစ်ထုတ်ဖို့ အရင် အစိုးရတွေနဲ့ ကုမ္ပဏီတချို့ ချုပ်ဆိုထားတဲ့ ကိန်းဂဏန်းစာရင်းဇယားတွေအရ လျှပ်စစ်ဓာတ်အား မဂ္ဂါဝပ် ၄၂ ၀၀၀ ကျော် ရှိပေမယ့် လက်တွေ ထုတ်လုပ်နိုင်ခြင်း မရှိသေးကြောင်းလည်း ဒီနေ့ သတင်းစာရှင်းလင်းပွဲမှာ ပြည်ထောင်စုဝန်ကြီး ဦးဝင်းခိုင်က ထည့်သွင်း ပြောသွားပါတယ်။