A d v e r t i s e m e n t With Us

တတိယပင်လုံ မေလဆန်း ကျင်းပရန် ဆုံးဖြတ်

ပြည်ထောင်စုငြိမ်းချမ်းရေး ညီလာခံ-(၂၁) ရာစုပင်လုံ တတိယအစည်းအဝေးကို ဧပြီလကုန် မေလဆန်းမှာ ကျင်းပသွားမှာဖြစ်ပါတယ်။ ဖေဖော်ဝါရီ ၂၈ ရက်က နေပြည်တော်မှာလုပ်ခဲ့တဲ့ (၇) ကြိမ်မြောက် တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) မှာ မေလဆန်းကျင်းပဖို့ ဆုံးဖြတ်ခဲ့ကြတာ ဖြစ်ပါတယ်။ ဒါ့အပြင် JICM အစည်းအဝေးကနေ မွန်ပြည်သစ်ပါတီနဲ့  လားဟူဒီမိုကရက်တစ်အစည်းအရုံးတို့ လက်မှတ်ထိုးပြီး ၀င်ရောက်လာတဲ့အချိန် JICM မှာ မူလ က ၈ ဖွဲ့အစား ၉ ဖွဲ့ဖြစ်တဲ့အတွက် ၉ ဦးစီ တက်ရောက်ဖို့ သဘောတူခဲ့ကြတယ်။ UPDJC ကို အစုအဖွဲ့ တစ်ဖွဲ့စီမှာ ၁၆ ဦးနဲ့ ပြင်ဆင်ဖွဲ့စည်းတဲ့ကိစ္စကို JICM မှာ ထပ်လောင်းပြီး အတည်ပြုနိုင်ခဲ့တယ်။ ငြိမ်းချမ်းရေး ကော်မရှင်နဲ့ မွန်ပြည်သစ်ပါတီ၊ လားဟူဒီမိုကရက်တစ်အစည်းအရုံးတို့ လက်မှတ်ရေးထိုးခဲ့တဲ့ သဘောတူညီချက် ၉ ချက်ကို JICM အစည်းအဝေးက မှတ်တမ်းတင် အတည်ပြုနိုင်ခဲ့တယ်။ အလားတူ မွန်ပြည်သစ်ပါတီနဲ့ လားဟူဒီမို ကရက်တစ် အစည်းအရုံးတို့ NCA လက်မှတ်ရေးထိုးခဲ့ခြင်းကို JICM မှာ မှတ်တမ်းတင်ခဲ့တယ်လို့ အစိုးရသတင်းမှာ ဖော်ပြပါတယ်။ ဒီအတောအတွင်း  ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/ SSA) နဲ့ မွန်ပြည်သစ်ပါတီ (NMPS) တို့ရဲ့ အမျိုးသားအဆင့် နိုင်ငံရေးဆွေးနွေးပွဲတွေ ကျင်းပပြုလုပ်ကြမှာ ဖြစ်ပါတယ်။ တတိယပင်လုံငြိမ်းချမ်းရေးညီလာခံကို ၂၀၁၇ ခုနှစ် ဒီဇင်ဘာမှာ ကျင်းပဖို့ စီစဉ်ခဲ့ပေမယ့် အပစ်ရပ်တပ်ဖွဲ့တချို့ရဲ့ နိုင်ငံရေးဆွေးနွေးပွဲတွေ အဆင်ပြေပြေ ကျင်းပပြုလုပ်နိုင်ခြင်း မရှိတာကြောင့် ရွှေ့ဆိုင်းခဲ့ရပြီး အခုတော့ မေလဆန်းမှာ ကျင်းပပြုလုပ်မယ်လို့ ဆုံးဖြတ်ခဲ့ကြပြန်တာ ဖြစ်ပါတယ်။ အစိုးရသစ်လက်ထက် ၂ဝ၁၆ ခုနှစ် သြဂုတ် ၃၁ ရက်မှာ ပြည်ထောင်စု ငြိမ်းချမ်းရေးညီလာခံ-(၂၁) ရာစုပင်လုံ အမည်နဲ့ ငြိမ်းချမ်းရေးညီလာခံ ကျင်းပခဲ့ပါတယ်။ တခါ ၂ဝ၁၇ ခုနှစ် မေ ၂၄ ရက်မှာ ပြည်ထောင်စု ငြိမ်းချမ်းရေးညီလာခံ-(၂၁) ရာစုပင်လုံ ဒုတိယ အစည်းအဝေး ထပ်မံကျင်းပပြီး နိုင်ငံရေး၊ စီပွားရေး၊ လူမှုရေး၊ မြေယာနှင့်သယံဇာတ ကဏ္ဍ လေးခုမှာ အချက် ၃၇ ချက်ကို  ပြည်ထောင်စုသဘောတူစာချုပ် အစိတ်အပိုင်းတစ်ခုအဖြစ် ချုပ်ဆိုနိုင်ခဲ့ပါတယ်။

A d v e r t i s e m e n t With Us

More News
Up