၂ လအတွင်း အဂတိလိုက်စားမှု တိုက်ဖျက်ရေးကော်မရှင်ကို တိုင်စာ ၁၀၀၀ ခန့် ရောက်ရှိ
DVB
·
February 12, 2018
ပြီးခဲ့တဲ့ ၂ လကျော်အတွင်းမှာ အဂတိလိုက်စားမှု တိုက်ဖျက်ရေးကော်မရှင်ကို တိုင်ကြားစာ ၁၀၀၀ လောက်ရောက်ခဲ့တယ်လို့ ကော်မရှင်ရဲ့ စာရင်းတွေမှာ ဖော်ပြထားပါတယ်။
၂၀၁၇ ခုနှစ် အောက်တိုဘာ ၂၄ ရက်ကနေ ၂၀၁၈ ခုနှစ် ဇန်နဝါရီ ၃၁ ရက်အထိ တိုင်ကြားစာ ၉၄၉ စောင် ရရှိခဲ့ပါတယ်။
ဒီထဲက တိုင်ကြားစာ ၅ စောင်ကို စုံစမ်းစစ်ဆေးခဲ့ပြီး ၂ စောင်ရဲ့ အပေါ်မှာတော့ အရေးယူဆောင်ရွက်ခဲ့တယ်လို့ ဆိုပါတယ်။
ပြီးတော့ ၅၆၆ စောင်ကို စိစစ်နေဆဲ ဖြစ်ပြီး သက်ဆိုင်ရာ ဝန်ကြီးဌာနနဲ့ ပြည်နယ်၊ တိုင်းအစိုးရအဖွဲ့တွေကို လွှဲပေးခဲ့တာက ၁၄၇ စောင်ရှိပါတယ်။
အရေးကြီးတဲ့ သက်သေခံချက်တွေ မပါတာ၊ တရားရုံးရင်ဆိုင်ဆဲကိစ္စဖြစ်တာ၊ ကော်မရှင်ကို မိတ္တူအနေနဲ့ ပို့တာ စတဲ့ စာ ၂၃၁ စောင်ကိုတော့ မှတ်တမ်းထားရှိတယ်လို့ ဆိုပါတယ်။
ကော်မရှင်ကို တိုင်ကြားတဲ့အခါမှာ ၂၀၁၃ ခုနှစ်၊ စက်တင်ဘာ ၁၇ ရက်နောက်ပိုင်းမှာ ဖြစ်တဲ့ အဂတိလိုက်စားမှုတွေ ဖြစ်ဖို့၊ အရေးကြီးတဲ့ သက်သေခံချက်တွေပါဖို့၊ တိုင်ကြားသူကို ဆက်သွယ်နိုင်မယ့် အချက်အလက်တွေ ဖော်ပြဖို့ ကော်မရှင်က တိုက်တွန်းထားပါတယ်။ ပြီးတော့ ကော်မရှင်ဆီကို မိတ္တူအနေနဲ့ပဲ ပို့တယ်ဆိုရင် အရေးယူဆောင်ရွက်ပေးနိုင်မှာ မဟုတ်တဲ့ အတွက် တိုက်ရိုက်လိပ်မူပို့ဖို့လည်း လိုအပ်ပါတယ်။