ဖောင်ကူး-အင်ဒိုင်းကြီးလမ်းပိုင်း ချဲ့ထွင်ဖောက်လုပ်မှု ဒေသခံအချို့ ဝေဖန်
DVB
·
February 7, 2018
ကလေးမြို့နဲ့ တမူးကားလမ်းပိုင်းမှာ ပါဝင်တဲ့ ဖောင်ကူးနဲ့ အင်ဒိုင်းကြီးရွာ ကတ္တရာလမ်း ချဲ့ထွင်မှုမှာ လုပ်ငန်းမပြီးဆုံးခင် ဖေ့စ်ဘွတ်ခ် လူမှုကွန်ရက်ကနေ ဝေဖန်မှုအချို့ ခံနေရတယ်လို့ လမ်းပိုင်းဆိုင်ရာ တာဝန်ရှိသူက ပြောပါတယ်။
လမ်းပိုင်း တာဝန်ယူထားတဲ့ အငယ်တန်းအင်ဂျင်နီယာကိုဝေမွန်ဦးက “ကျနော်တို့ လမ်းချဲ့လုပ်ငန်းက မပြီးသေးပါဘူး။ အခြေခံကျောက်လွှာ နှစ်လွှာခင်းပြီး ကတ္တရာခင်းဖို့ လုပ်ငန်းအတွက် ပစ္စည်းစုဆောင်းနေတာ ၁ ပတ်လောက် ကြာသွားတယ်။ အဲဒီမှာ လုပ်သားတွေလည်း မမြင်တော့ ဒါကို လမ်းက ပြီးပြီထင်ပြီး ဝေဖန်ကြတာလို့ ထင်ပါတယ်။ ကျနော်တို့အနေနဲ့က နောက်ဆုံး ကတ္တရာခင်းပြီး ကျောက်မှုန့် မဖြန့်နိုင်ခင် လမ်းသွားလာတွေ အဆင်ပြေဖို့ ယာယီသဲကြမ်းခင်းထားတာကို ဝေဖန်ခံရတာပါ။ ခုပ်ငန်းလည်း ပြန်စနေပါပြီ။ ခဏဖြန့်ထားတဲ့ သဲကြမ်းတွေဖယ် လေမှုတ်ထုတ်ပြီး ကတ္တရာထပ်ပိုးနေပါပြီ” လို့ ပြောပါတယ်။
ကလေးနယ် ဖောင်ကူး-အင်ဒိုင်းကြီးလမ်းပိုင်း ၂ မိုင် ၄ ဖာလုံအရှည်ကို မူလလမ်းသား ၁၂ ပေကနေ ၁၈ ပေချဲ့ထွင်ဖို့အတွက် ၁ မိုင် ၂ ဖာလုံ လမ်းပိုင်းကို တိုင်းဒေသကြီး ရန်ပုံငွေ ၉၉ သန်း အသုံးပြုနေတာဖြစ်တယ်လို့ သိရပါတယ်။
“ကတ္တရာလမ်း တိုးချဲ့လုပ်ငန်းကို ၂၀၁၇ အောက်တိုဘာ ၂၀ ရက်ကနေ စတင်ကာ ခန့်မှန်းပြီးဆုံးချိန်ကို အခုနှစ် ၁ လပိုင်း ၃၀ ရက်လို့ ဆိုင်းဘုတ်ထောင်ထားတဲ့အတွက် ၃၀ ရက်နားမှာ ခဏနားတဲ့အချိန်နဲ့ တိုက်ဆိုင်တော့ ပြီးပြီအထင်နဲ့ လမ်းကွာလတီကို ဝေဖန်ခံရတဲ့ ပုံစံပါ။ လမ်းလုပ်သားတွေလည်း အရင်လို အင်နဲ့ အားနဲ့ မမြင်ရတော့လည်း ပြီးပြီထင်ကြတာပေါ့” လို့ ကိုဝေမွန်ဦးက ပြောပါတယ်။
လက်ရှိမှာတော့ ကတ္တရာထပ်ပိုးခြင်းနဲ့ ကျောက်မှုန့်ဖြူးခြင်းလုပ်ငန်းကို ဖေဖော်ဝါလ ၃ ရက်နေ့မှာ ပြန်လည်စတင်နေပြီး ၆ ရက်နေ့အထိ လုပ်ငန်းပြီးစီးမှု ၂ ဖာလုံ ကျော်နေပြီဖြစ်ပါတယ်။
သတင်း - မင်းရဲစစ်နိုင်
