ဘားအံမြို့တွင် ဒီဇယ်သုံး လျှပ်စစ်မီးသင်္ဂြိုဟ်စက်သစ် တည်ဆောက်
DVB
·
February 6, 2018
နာရေးမီးသဂြုင်္ိဟ်ရာမှာ ထင်းရှားပါးလာတဲ့အတွက် နာရေးအဆင်ပြေဖို့ ကျပ်သိန်း ၄၀၀ လောက်ကုန်ကျမယ့် ဒီဇယ်သုံး လျှပ်စစ်မီးသဂြုင်္ိဟ်စက်အသစ်ကို တည်ဆောက်နေတယ်လို့ မာဃ(ဘားအံ)လူမှုကူညီရေးအသင်းက သိရပါတယ်။
မာဃလူမှုကူညီရေးအသင်းတာဝန်ခံ ဦးခမ်းလင်းက “ထင်းဖိုနဲ့ဆို စောင့်ရတာ ၂ နာရီ ကြာတယ်။ ၂ ဖို ရှိတယ်။ အလောင်း ၂ လောင်း ထည့်ထားပြီဆိုရင် နောက်တနာရီကျော်လောက် စောင့်ရတော့ အခက်အခဲရှိတယ်။ မသာပို့တဲ့သူလည်း ဒုက္ခရောက် ပြန်ရလည်း ခက်။ ဒီ ဒီဇယ်ဖိုက မိနစ် ၂၀ ပဲဆိုတော့ ဘုန်းကြီး တရားနာမှာနဲ့ ရှို့တဲ့အချိန်နဲ့ ကွက်တိပဲ” လို့ ပြောပါတယ်။
နာရေးကူညီမှုအသင်းတွေက လိုအပ်ချက် များတဲ့အတွက် လာရောက်လှူဒါန်းတာလို့ ဘားအံမြို့၊ အမှတ် ၄ ရပ်ကွက် ၊ ကမ်းနားလမ်း၊ အလှူရှင် ဦးခွန်တင်ဆန်းက ပြောပါတယ်။
“လူမှုရေးအသင်းဆိုတော့ ရှင်းရှင်းပြောရရင် နိမ့်ကျပြီးတော့ ကူညီတဲ့အသင်း။ သာတာကတော့ တချို့က ငွေရှိလို့ လုပ်နိုင်လို့ သာတာပါ။ နာရေးကူညီမှုအသင်းက လိုအပ်ချက်များတယ်ဆိုတော့ မတတ်နိုင်တဲ့လူတွေ၊ မပြည့်စုံတဲ့လူတွေအတွက် အဓိက ကူညီရတဲ့အတွက်ကြောင့် ကျနော်တို့က ဒီမှာ လာလှူပေးတာ”လို့ ပြောပါတယ်။
ဒီဇယ်သုံး လျှပ်စစ်မီးသဂြုင်္ိဟ်စက်ကို သိန်း ၄၀၀ လောက် အကုန်အကျခံ တည်ဆောက်နေတာဖြစ်ပြီး ၅၀ ရာခိုင်နှုန်း ပြီးစီးပြီဖြစ်သလို ဧပြီလမှာ ပြီးစီးအောင် တည်ဆောက်သွားဖို့ အစီအစဉ်ရှိပါတယ်။
ဒီဇယ်သုံး လျှပ်စစ်မီးသဂြုင်္ိဟ်စက်အသစ်နဲ့ သဂြုင်္ိဟ်ရာမှာ အလောင်း ၁ လောင်းကို မိနစ်၂၀ ကြာမြင့်ပြီး ဒီဇယ် ၂ ဂါလန်ပဲ ကုန်ကျမှာဖြစ်တဲ့အတွက် အချိန်ကုန် သက်သာတဲ့အပြင် လေထုညစ်ညမ်းမှုကို လျှော့ချနိုင်မယ်လို့ သဂြုင်္ိဟ်စက် တာဝန်ခံက ပြောပါတယ်။
ဘားအံမြို့မှာ မာဃလူမှုကူညီရေးအသင်းက ၁ လကို နာရေး ၅၀ ဦးခန့်၊ ၁ နှစ် ၇၀၀ ဦးခန့်ကို ကူညီဆောင်ရွက်ပေးနေပြီး မရှိနွမ်းပါးတဲ့ နာရေးရှင်တွေကို ၁ ဦးကို ၄ သောင်းကျပ် အသင်းက ပြန်လည်ကူညီထောက်ပံ့ပေးပါတယ်။
မာဃ လူမှုကူညီရေးအသင်းကို ၂၀၀၂ ခုနှစ်က စတင်တည်ထောင်ခဲ့တာဖြစ်ပြီး သာရေး၊ နာရေး၊ ကျန်းမာရေး၊ သွေးလှူအသင်း၊ ကယ်ဆယ်ရေးလုပ်ငန်းတွေကို နေရာဒေသမရွေး သွားရောက် ကူညီဆောင်ရွက်ပေးနေတဲ့အပြင် နွမ်းပါး ဒေသခံ ကျောင်းသား ကျောင်းသူ ၆၀ ဦးကို နှစ်စဉ် ပညာဒါန အခမဲ့ကျောင်း ဖွင့်လှစ်ပြီး ပညာသင်ကြားပေးနေပါတယ်။
သတင်း - ရဲမင်းခေါင်
