ဘတ်ဂျက်လိုငွေပြနေချိန် လွှတ်တော်ကိုယ်စားလှယ်ရုံးများ ဖွင့်ပေးရန် မဖြစ်နိုင်သေး
DVB
·
January 26, 2018
အစိုးရ ဘတ်ဂျက်လိုငွေ ပြနေချိန်ဖြစ်လို့ တနိုင်ငံလုံးအနှံ့မှာ လွှတ်တော်ကိုယ်စားလှယ်ရုံးတွေ တည်ထောင်ဖွင့်လှစ်ပေးဖို့ မဖြစ်နိုင်ဘူးလို့ လွှတ်တော် အခွင့်အရေးကော်မတီက ပြောပါတယ်။
ဇန်နဝါရီ ၂၆ရက် ဒီမနက် ကျင်းပတဲ့ ပြည်သူ့လွှတ်တော်မှာ လွှတ်တော်အခွင့်အရေး ကော်မတီ အတွင်းရေးမှူး ဒေါက်တာလှမိုးက ပြောတာ ဖြစ်ပါတယ်။
“လွှတ်တော် ကိုယ်စားလှယ်ရုံးများကို တာဝန်ယူပြီး ဖွင့်လှစ်ပေးမည် ဆိုပါက မဲဆန္ဒနယ်ပေါင်း ၃၃၀ အတွက် နေရာရှာဖွေရခြင်း၊ အဆောက်အဦများ ဆောက်လုပ်ခြင်း၊ ရုံးလုပ်ငန်းများအတွက် အသုံးအဆောင်များ ဖြည့်တင်းဆောင်ရွက်ရခြင်း၊ ရုံးဝန်ထမ်း ခန့်အပ်ခြင်းများကိုပါ တပြိုင်နက်တည်း ဆောင်ရွက်ရမှာ ဖြစ်တဲ့အတွက်ကြောင့် လုပ်ငန်းပမာဏ ကြီးမားသလို ဘဏ္ဍာငွေအမြောက်အမြား သုံးစွဲရမှာလည်း ဖြစ်ပါတယ်။”
နိုင်ငံတော်မှာ လိုငွေပြ ဘတ်ဂျက်နဲ့ လည်ပတ်နေရတဲ့ကာလ ဖြစ်လို့ ဘဏ္ဍာငွေ အခက်အခဲ ရှိလာနိုင်တယ်၊ ဒါကြောင့် လတ်တလောအနေနဲ့ လွှတ်တော်ကိုယ်စားလှယ်ရုံးတွေ ဖွင့်လှစ်ပေးနိုင်ဖို့ အစီအစဉ်မရှိသေးသလို လွှတ်တော်ရုံးအတွက် နေရာထိုင်ခင်းနဲ့ ရုံးလုပ်ငန်း ကုန်ကျစရိတ်တွေကိုလည်း ကျခံဆောင်ရွက်ပေးနိုင်ခြင်း မရှိသေးဘူးလို့ ဒေါက်တာလှမိုးက ပြောပါတယ်။
ပြည်သူ့လွှတ်တော်မှာ မိုင်းရယ်အမတ် ဦးစိုင်းသီဟကျော်က လွှတ်တော်ကိုယ်စားလှယ် ရုံးတွေ ဘယ်အချိန်မှာ စတင်ဖွင့်လှစ်ပေးမယ်၊ နေရာထိုင်ခင်းနဲ့ ရုံးလုပ်ငန်းဆိုင်ရာ ကုန်ကျစရိတ်တွေကို လွှတ်တော်ရုံးက ကျခံဆောင်ရွက်ပေးဖို့ ဘယ်လို စီမံထားတယ်ဆိုတာ သိလိုတယ် ဆိုပြီး မေးခဲ့တာ ဖြစ်ပါတယ်။
ပြည်သူ့လွှတ်တော်ဆိုင်ရာ ဥပဒေပုဒ်မ ၆၄မှာ လွှတ်တော်ဟာ လိုအပ်တဲ့ မြို့နယ်တွေမှာ လွှတ်တော်ကိုယ်စားလှယ်ရုံးတွေ ဖွင့်လှစ်တည်ထောင်ခွင့်ပေးနိုင်တယ်လို့ ဖော်ပြထားပါတယ်။
ပုဒ်မ ၆၅ မှာလည်း လွှတ်တော်ကိုယ်စားလှယ်ရုံးတွေကို လွှတ်တော်က တာဝန်ယူ ဖွင့်လှစ်ပေးနိုင်ခြင်း မရှိသေးမီ လွှတ်တော်ကိုယ်စားလှယ်တွေက မိမိအစီအစဉ်နဲ့ ဖွင့်လှစ်လိုပါက နေရာထိုင်ခင်း ရုံးလုပ်ငန်းကုန်ကျစရိတ်နဲ့ ဖွင့်လှစ်နိုင်တယ်လို့ ပြဋ္ဌာန်းထားပါတယ်။
လွှတ်တော်ထဲ မေးခွန်းမေးခဲ့တဲ့ မိုင်းရယ် မဲဆန္ဒနယ်က ဦးစိုင်းသီဟကျော်က ပါတီတူ ကိုယ်စားလှယ်တွေ ရှိတဲ့ မြို့နယ်တွေမှာ ကိုယ်စားလှယ်ရုံးဖွင့်ဖို့ အဆင်ပြေပေမယ့် ပါတီမတူတဲ့ ကိုယ်စားလှယ်တွေရှိတဲ့ မြို့နယ်တွေမှာတော့ ကိုယ်စားလှယ်ရုံးဖွင့်ဖို့ အခက်အခဲရှိတယ်လို့ ပြောပါတယ်။
