ဘင်္ဂလားဒေ့ရ်ှဘက်က ဒုက္ခသည်များပြန်ပို့ရန် ရက်ရွှေ့ဆိုင်း
DVB
·
January 23, 2018
ဘင်္ဂလားဒေ့ရ်ှနိုင်ငံဘက်ထွက်ပြေးသွားတဲ့ ဒုက္ခသည်တွေကို မြန်မာနိုင်ငံဘက်က ပြန်လက်ခံဖို့ အဆင်သင့် ဖြစ်နေပေမယ့် ဘင်္ဂလားဒေ့ရ်ှဘက်က ဒုက္ခသည်ပြန်ပို့ဖို့ ရက်ရွှေ့ဆိုင်း လိုက်တယ်လို့ လူကယ်ပြန်ဌာနက ညွန်ကြားရေးမှူးက ပြောပါတယ်။
“ဟိုက်ဘက်က ရွှေ့လိုက်တာ။ ဒီဘက်ကတော့ ရွှေ့မယ့်အကြောင်း မပြောဘူး။ လာရင်တော့ လက်ခံသွားဖို့ ပြောတယ်။ ဟိုဘက်ပို့မယ့်စာရင်းကတော့ မရသေးဘူး”လို့ လူကယ်ပြန်ဌာန ညွန်ကြားရေးမှူး ဒေါက်တာအောင်သူရိန်က ဒီဗွီဘီကိုပြောပါတယ်။
ဒုက္ခသည်တွေ ပြန်လည်လက်ခံရေးအတွက် စခန်းနှစ်ခုဖြစ်တဲ့တောင်ပြိုလက်ဝဲစခန်းနဲ့ ငါးခူရစခန်းတို့ကို ဒီကနေ့ မနက်က စတင်ဖွင့်လှစ်လိုက်ပေမယ့် အခုအချိန်ထိ တယောက်မှ လက်ခံရရှိထားတာ မရှိသေးဘူးလို့လည်းဆိုပါတယ်။
“ဒီနေ့တယောက်မှ မရောက်သေးဘူးခင်ဗျ။ ကျနော်တို့ဘက်လက်ခံဖို့ အဆင့်သင့်ပါပဲ။ ဟိုဘက်ကတော့ကျနော်တို့ဘက်ကို ဘာမှ အကြောင်းပြန်တာ မရှိသေးပါဘူး။ ဒီကနေ့အချိန်အထိ တယောက်မှ ရောက်မလာသေးဘူး။ ညနေပိုင်းအထိပေါ့နော်”လို့ ဒီဗွီဘီကိုပြောပါတယ်။
ဘင်္ဂလားဒေ့ရ်ှနိုင်ငံဘက်ကတော့ ဒုက္ခသည်တွေ မြန်မာပြည်ဘက်ကိုပြန်ပို့ဖို့ အဆင်သင့် မဖြစ်ဘူးလို့ သတင်းတွေထွက်ပေါ်နေပေမယ့် မြန်မာဘက်ကတော့ တရားဝင် အကြောင်းစာ မရရှိသေးတဲ့ အတွက် သဘောတူညီချက်အရ ဆက်လက်ဆောင်ရွက်သွားမယ်လို့ ပြောထား ပါတယ်။
ပြီးခဲ့တဲ့နှစ်သြဂုတ်လက ARSA အကြမ်းဖက်သမားတွေရဲ့ တိုက်ခိုက်မှုဖြစ်ပွားပြီးနောက် ရခိုင်ပြည်နယ်တောင်ပိုင်းဒေသကနေ ဘင်္ဂလားဒေ့ရ်ှနိုင်ငံဘက်ကို သိန်းနဲ့ချီတဲ့ ဒုက္ခသည်တွေ အကြောင်းအမျိုးမျိုးကြောင့် နေရပ်စွန့်ခွာထွက်ပြေးသွားခဲ့ကြတာဖြစ်ပါတယ်။
နေရပ်စွန့်ခွာသွားသူတွေ ပြန်လည်လက်ခံရေးလုပ်ငန်းစဉ်ကို ဇန်န၀ါရီ ၂၃ ရက်မှာ စတင်ဆောင်ရွက်ဖို့ ဇန်န၀ါရီ ၁၅ရက်က နေပြည်တော်မှာ နှစ်နိုင်ငံဆွေးနွေး သဘောတူညီခဲ့ကြတာဖြစ်ပါတယ်။