ဝန်ထမ်းသင်တန်းသား၏ စားစရိတ်နှုန်းထားတိုးမြှင့်ပေးရန် စီစဉ်
DVB
·
January 22, 2018
ဝန်ထမ်းတွေရဲ့ သင်တန်းတက် စားစရိတ်နှုန်းထား တရက် ကျပ် ၅၀၀ ကို ခေတ်ကာလနဲ့ လျော်ညီအောင် တိုးမြှင့်သတ်မှတ်ပေးသွားဖို့ စီစဉ်လုပ်ဆောင်မယ်လို့ စီမံကိန်းနဲ့ဘဏ္ဍာရေး ၀န်ကြီးဌာန၊ ဒုတိယ၀န်ကြီး ဦးမောင်မောင်ဝင်းက ပြောပါတယ်။
ဇန်န၀ါရီ ၂၂ ရက် ဒီနေ့ ပြည်သူ့လွှတ်တော်မှာ လှိုင်းဘွဲ့ မဲဆန္ဒနယ်က ဦးခင်ချိုရဲ့ ဝန်ထမ်းတွေရဲ့ သင်တန်းစားသောက်စရိတ်ကို လက်ရှိကုန်ဈေးနှုန်းနဲ့ မျှတတဲ့နှုန်းသို့ တိုးမြှင့် ခံစားခွင့်ပြုနိုင်ခြင်း ရှိ၊ မရှိ နဲ့ စပ်လျဉ်းတဲ့ မေးခွန်းကို ဖြေဆိုရင်း ဒုဝန်ကြီးက ပြောခဲ့တာ ဖြစ်ပါတယ်။
“ဌာနအဖွဲ့အစည်းများက ကြီးမှူးဖွင့်လှစ်တဲ့ ညည့်အိပ်ညည့်နေသင်တန်းများသို့ တက်ရောက်ရတဲ့ ၀န်ထမ်းများအတွက် သင်တန်းစားသောက်စရိတ်ကို လက်ရှိ ကုန်ဈေးနှုန်းနဲ့ မျှတသည့်နှုန်းသို့ တိုးမြှင့်ပေးနိုင်ရန် ခရီးသွားနေ့တွက်စရိတ်နဲ့ နှိုင်းယှဉ်ချိန်ထိုးပြီးတော့ နိုင်ငံတော်ရဲ့ဘဏ္ဍာငွေ အခြေအနေပေးမှုအပေါ်မူတည်ပြီး စီမံကိန်းနဲ့ဘဏ္ဍာရေးဝန်ကြီးဌာနက သုံးသပ်လို့ သက်ဆိုင်ရာအဖွဲ့အစည်းများ၏ သဘောထားများပါ စုစည်းရယူပြီးတော့ ပြည်ထောင်စု အစိုးရအဖွဲ့ကို အဆိုပြုတင်ပြရန် စီစဉ်ဆောင်ရွက်သွားမည်ဖြစ်ပါကြောင်းနဲ့ ပြည်ထောင်စုအစိုးရ အဖွဲ့ရဲ့ ဆုံးဖြတ်ချက်နဲ့ ဆက်လက် ဆောင်ရွက်ပေးမည်ဖြစ်ပါကြောင်း။”
လက်ရှိမှာ ၀န်ထမ်းများ ခရီးထွက်တာဝန်ထမ်းဆောင်တဲ့အခါ နေ့တွက်စရိတ် ၃၀၀၀ ကျပ် သတ်မှတ်ထားပါတယ်။
လွန်ခဲ့တဲ့ ၁၉၈၉ ခုနှစ်က ၀န်ထမ်းနေ့တွက်စရိတ် ၁၅ ကျပ် သတ်မှတ်ခဲ့တုန်းက စားစရိတ် ၈ ကျပ် သတ်မှတ်ခဲ့ပါတယ်။ တခါ ၂၀၁၄ ခုနှစ်မှာ ၀န်ထမ်းနေ့တွက်စရိတ် ၁၇၀၀ ကျပ် ပြောင်းလဲပြင်ဆင်သတ်မှတ်ခဲ့ပြီး စားစရိတ်ကိုလည်း ကျပ် ၅၀၀ အဖြစ် ပြင်ဆင်သတ်မှတ်ခဲ့ ပါတယ်။
လက်ရှိမှာ ၀န်ထမ်းနေ့တွက်စရိတ်ကို တရက် ကျပ် ၃၀၀၀ တိုးမြှင့်ထုတ်ပေးနေပေမယ့် စားစရိတ်ကတော့ ကျပ် ၅၀၀ ပဲ သတ်မှတ်ထားတာ ဖြစ်ပါတယ်။