မြောက်ဦး ဆန္ဒပြပွဲကို ရဲက ပစ်ခတ်လူစုခွဲ၊ ၁ ဦး သေဆုံး ၁၀ ဦးထက်မနည်း ဒဏ်ရာရ
ရခိုင်ပြည်နယ်၊ မြောက်ဦးမြို့မှာ ဇန်န၀ါရီ ၁၆ ရက်ညနေပိုင်းက လူစုလူဝေးနဲ့ ဆန္ဒပြပွဲ ဖြစ်ပွားပြီး ရဲတပ်ဖွဲ့က သေနတ်နဲ့ပစ်ခတ်လူစုခွဲခဲ့ရာမှာ လူ ၁ ဦး သေဆုံးကာ ၁၀ ဦးထက်မနည်း ဒဏ်ရာရရှိသွားတယ်လို့ မျက်မြင်သက်သေ ကိုခိုင်မိုးက ဒီဗွီဘီကို ပြောပါတယ်။
“ကျနော် ဆေးရုံလိုက်သွားတယ်။ ၁၀ ဦးထက် မနည်းဘူး။ ဒဏ်ရာရထားတာ။ ပြင်းထန်တဲ့သူတွေလည်း ရှိတယ်။ တဦးကတော့ သေဆုံးနေပြီ၊ ကျနော်ကိုယ်တိုင် မြင်ခဲ့တာ။ သူ့ရဲ့ခါးမှာ သေနတ်ဒဏ်ရာနဲ့ ဆေးရုံမှာ သေဆုံးသွားတာ။ ဆန္ဒပြတဲ့သူတွေကို ရဲက သေနတ်နဲ့ လူစုခွဲတာ”လို့ ဒီဗွီဘီကို ပြောပါတယ်။
မြောက်ဦးမြို့မှာ ၂၃၃ နှစ်မြောက် ရက္ခိုင့်ဘုရင်နိုင်ငံတော်အချုပ်အခြာအာဏာ ကျရှုံးခြင်း အခမ်းအနားကို မနေ့က ကျင်းပခွင့် မရတဲ့အတွက် မြောက်ဦးမြို့ ဒေသခံတွေက မြို့နယ်အုပ်ချုပ်ရေးမှူးရုံးနဲ့ ရဲစခန်းကို သွားရောက် စုဝေးတောင်းဆို ဆန္ဒထုတ်ဖော်ခဲ့ကြတာပါ။
သက်ဆိုင်ရာက လူစုခွဲဖို့ သတိပေး ပြောကြားခဲ့ပေမယ့် လူစုခွဲခြင်းမရှိဘဲ ခဲတွေနဲ့ ပြန်လှန်ပစ်ပေါက်ခဲ့ကြလို့ ရဲတပ်ဖွဲ့ဝင်တွေက သေနတ်ပစ်ဖောက် ဟန့်တားခဲ့ရတယ်လို့ မြောက်ဦး မြို့နယ်ရဲစခန်းက ဆိုပါတယ်။
လတ်တလောမှာ ဒဏ်ရာရရှိသူတွေကို မြောက်ဦးဆေးရုံကို ပို့ဆောင် ဆေးကုသမှု ခံယူနေတယ်လို့ မျက်မြင်သက်သေက ပြောပါတယ်။
သေဆုံးဒဏ်ရာရမှု အခြေအနေနဲ့ ပတ်သက်လို့ အတည်ပြုဖို့ မြောက်ဦး ပြည်သူ့ဆေးရုံ တာဝန်ရှိသူတွေကို ဆက်သွယ်ခဲ့မယ့် မရခဲ့ပါဘူး။
သတင်း - ဝဏ္ဏခွာညို
