မြိတ်မြို့ရှိ ကျူးကျော်များကို အငှားအိမ်ရာစနစ် ချပေးမည်
DVB
·
January 14, 2018
မြိတ်မြို့ရှိ ကျူးကျော်တွေကို ဦးစားပေးပြီး အခန်းပေါင်း ၁၆၈ ခန်းရှိ ပင်လုံအိမ်ရာမှာ အငှားအိမ်ရာစနစ် ချပေးမှာဖြစ်တယ်လို့ တနင်္သာရီတိုင်းဒေသကြီး ၀န်ကြီးချုပ် ဒေါက်တာလဲ့လဲ့မော်က ပြောပါတယ်။
တနင်္သာရီတိုင်းဒေသကြီး ၀န်ကြီးချုပ် ဒေါက်တာလဲ့လဲ့မော်က ဇန်န၀ါရီ ၁၃ ရက်နေ့ အိမ်ရာဖွင့်ပွဲအခမ်းအနားမှာ အခုလို ပြောကြားခဲ့တာပါ။
လက်ရှိအနေထားမှာ ၄ လွှာအထိရှိတဲ့ အိမ်ရာ ၂ လုံးပြီးစီးနေပြီဖြစ်ရာ မြေယာမဲ့ ကျူးကျော်တွေကို စာရင်းစတင်ကောက်ယူပြီး စနစ်တကျနေရာချထားပေးဖို့ ၀န်ကြီးချုပ်က တိုက်တွန်းပြောကြားခဲ့ပါတယ်။
“ကျမ အနေနဲ့ သေသေချာချာ စိစစ်ပေးစေချင်ပါတယ်။ အခုဆိုရင် နောက်ထပ် ဆောက်မယ့် အဆောက်အအုံက ၅ လုံး၊ လက်ရှိအဆောက်အအုံ ၂ လုံး၊ အားလုံးအခန်းပေါင်း ၁၆၈ ခန်းရှိလာမှာဖြစ်ပြီး မိသားစု ၁၆၈ စုကို အိမ်နေရာပေးမှာဖြစ်ပါတယ်။ သက်ဆိုင်ရာလူကြီးတွေက ကော်မတီဖွဲ့ပြီး ဆောင်ရွက်နေပါတယ်။ ပြည်သူတွေအတွက် ကွက်လပ်ဖြည့်တယ်ဆိုတာ ထိရောက်မှုရှိဖို့ လိုအပ်တယ်။ တကယ်လိုအပ်နေတဲ့ ပြည်သူတွေဆီကို ရောက်ရှိဖို့ လိုအပ်ပါတယ်။”
တနင်္သာရီတိုင်းဒေသကြီးအတွင်း ကျူးကျော်အများဆုံးမှာ မြိတ်မြို့ကဖြစ်ပြီး ရပ်/ကျေးအုပ်ချုပ်ရေးမှူးတွေကလည်း တနေ့တခြားများပြားလာနေတဲ့ ကျူးကျော်တွေကို ခက်ခဲစွာ ထိန်းကျောင်းနေရကြောင်း ၀န်ကြီးချုပ်နဲ့ တွေ့ဆုံရာမှာ ပြောကြားခဲ့ကြပါတယ်။
အခုဆောက်လုပ်ထားတဲ့ အငှားအိမ်ရာ စီမံကိန်းကို တခန်းကို ကျပ် ၃ သောင်းနှုန်းနဲ့ လစဉ်အခန်းခ ပေးသွင်းရမယ်လို့ သိရပါတယ်။
မြတ်ထွဋ် (မြိတ်)
