ဝီကီလိခ်တည်ထောင်သူ အာဆန်ကို အီကွေဒေါအစိုးရ နိုင်ငံသားအဖြစ် လက်ခံ

ဓာတ်ပုံ - ရိုက်တာ
ဝီကီလိခ်အင်တာနက်စာမျက်နှာ တည်ထောင်သူ ဂျူလီယာ အာဆန်ကို အီကွေဒေါအစိုးရက နိုင်ငံသားအဖြစ် လက်ခံလိုက်ပါတယ်။ ဗြိတိန်နိုင်ငံ လန်ဒန်မြို့က အီကွေဒေါသံရုံးထဲမှာ ငါးနှစ်ကြာ ခိုလှုံနေထိုင်တဲ့ ဝီကီလိခ် တည်ထောင်သူ ဂျူလီယာအာဆန်ကို အီကွေဒေါအစိုးရက နိုင်ငံသား ပေးလိုက်တာပါ။ အာဆန်ဟာ ဗြိတိန်နိုင်ငံအတွင်း သူ့ရဲ့ အခြေအနေအတွက် ဂုဏ်သိက္ခာရှိပြီး မျှတတဲ့ အဖြေကို ရှာနေတာပါ။ အာဆန်ကို သံတမန်ရေးအရ အနေအထားတခုပေးဖို့ အီကွေဒေါအစိုးရရဲ့ တောင်းဆိုချက်ကို ငြင်းပယ်ခဲ့တယ်လို့  ဗြိတိန်အစိုးရက ဇန်နဝါရီ ၁၁ ရက်နေ့ အစောပိုင်းက ပြောပါတယ်။ အာဆန်ဟာ အဓမ္မပြုကျင့်မှု စွဲချက်တွေအတွက် ဆွီဒင်နိုင်ငံဆီကို ရာဇဝတ်သားအဖြစ် လွှဲပြောင်းခံရမယ့် ဘေးကနေ ရှောင်ရှားဖို့ အီကွေဒေါသံရုံးထဲမှာ ၂၀၁၂ ခုနှစ်တည်းက ခိုလှုံနေခဲ့တာပါ။ ဆွီဒင်အစိုးရ ရှေ့နေတွေက စွဲချက်တွေကို ပြန်ရုပ်သိမ်းခဲ့ပါတယ်။ ဒါပေမယ့် ဗြိတိန်ရဲတွေကတော့ တကယ်လို့ အာဆန်သာ သံရုံးထဲက ထွက်ခဲ့ရင် သူ့ကို အာမခံအခြေအနေ ချိုးဖောက်မှုတွေအတွက် ဖမ်းမယ်လို့ ပြောခဲ့ပါတယ်။ အမေရိကန်နိုင်ငံသမိုင်းမှာ အကြီးမားဆုံး သတင်းအချက်အလက် ပေါက်ကြားမှုထဲက တခုဖြစ်တဲ့ စစ်ဘက်နဲ့ သံတမန်ရေး လျှို့ဝှက်စာရွက်စာတမ်းတွေ ထောင်နဲ့ချီပြီး ဖြန့်ချိခဲ့တဲ့အတွက် အမေရိကန်အစိုးရက အာဆန်ကို လိုချင်နေတာပါ။ ဒါကြောင့် ဆွီဒင်အစိုးရက အမေရိကန်အစိုးရဆီ လွှဲပေးမှာကို အာဆန်က ကြောက်နေခဲ့ပါတယ်။ တတိယနိုင်ငံတွေကြောင့် အာဆန်ရဲ့ အသက်ဘေး ထိခိုက်မှာကို အီကွေဒေါ အစိုးရက စိုးရိမ်တယ်လို့ ပြောရင်း အာဆန်အတွက် အဖြေအမျိုးမျိုးကို ရှာနေတယ်လို့ အီကွေဒေါ နိုင်ငံခြားရေးဝန်ကြီး မာရီယာဖှာနန်ဒါအဲ့စ်ပီနိုဆာက ပြောပါတယ်။ အာဆန်ကို နိုင်ငံသားပေးတာဟာ သူ့ကို ဗြိတိန်ရဲတွေက မဖမ်းအောင် ရှောင်ရာမှာ ဘယ်လိုကူညီနိုင်လဲဆိုတဲ့ အသေးစိတ် အချက်အလက်ကို သူက မပြောခဲ့ပါဘူး။ အစိုးရတွေရဲ့ အာဏာအလွဲသုံးစားလုပ်မှုကို ဖော်ထုတ်ခဲ့လို့ လွတ်လပ်စွာ ပြောဆိုခွင့်အတွက် ဆိုင်ဘာသူရဲကောင်းဖြစ်လာတဲ့ အာဆန်ဟာ တခြားတဖက်မှာတော့ လျှို့ဝှက်ချက် ဖော်ထုတ်မှုကြောင့် အနောက်နိုင်ငံတွေရဲ့ လုံခြုံရေးကို လှိုက်စားတဲ့ ရာဇဝတ်သား ဖြစ်နေခဲ့ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up