ဆီးရီးယားနိုင်ငံ၊ ဂိုတာဒေသအရှေ့ပိုင်းက သူပုန်တွေထိန်းချုပ်ထားတဲ့ ဆာဘမြို့မှာ ပြိုကျနေတဲ့ အဆောက်အဦတခုရဲ့ အပျက်အစီးကြားထဲကနေ ဆီးရီးယား ကလေးငယ်တဦးကို ခက်ခက်ခဲခဲ ကယ်တင်ခဲ့ရပါတယ်။ ကလေးကိုကယ်တင်နေတဲ့ ဗွီဒီယိုဖိုင်ကို လူမှုကွန်ရက် မီဒီယာပေါ်မှာ လွှင့်တင်ခဲ့ပါတယ်။ အဲဒီဒေသမှာ ဇန်နဝါရီ ၉ ရက်တုန်းက ဖြစ်ပွားခဲ့တဲ့ လေကြောင်းတိုက်ခိုက်မှုတွေကြောင့် ဒဏ်ရာရသူ ၂၀ ကျော် ရှိခဲ့တယ်လို့ ဆီးရီးယား လူ့အခွင့်အရေး စောင့်ကြည့်ရေးအဖွဲ့က ပြောပါတယ်။ လေကြောင်းတိုက်ခိုက်မှုတွေဖြစ်နေတာ ၁၂ ရက်ဆက်တိုက် ရှိနေပြီလို့လည်း အဲဒီအဖွဲ့က ပြောပါတယ်။ မြို့တော် ဒမတ်စကတ် အနားမှာရှိတဲ့ ဂိုတာဒေသ အရှေ့ပိုင်းဟာ သမ္မတ ဘာရှာ အယ်လ်အာဆတ်ကို ဖြုတ်ချရေး တိုက်ပွဲဝင်နေတဲ့ လက်နက်ကိုင်သူပုန်တွေ နောက်ဆုံးခြေကုပ်ယူထားတဲ့နေရာ ဖြစ်ပါတယ်။ အဲဒီဒေသမှာနေထိုင်သူ အရပ်သား လေးသိန်းရှိတယ်လို့ ကုလသမဂ္ဂက ခန့်မှန်းထားပြီး အစားအစာနဲ့ ဆေးဝါးအထောက်အပံ့ ရောက်ရှိမှု နည်းနေတယ်လို့လည်း ပြောပါတယ်။ ဆီးရီးယားစစ်တပ်နဲ့ ဆီးရီးယားရဲ့ မဟာမိတ်တွေဖြစ်တဲ့ ရုရှား၊ အီရန်တို့ ထောက်ပံ့ပေးထားတဲ့ ပြည်သူ့စစ်တွေဟာ အဲဒီဒေသမှာ ဗုံးကြဲမှုတွေ နေ့စဉ်လုပ်နေပါတယ်။ အဲဒီမှာရှိတဲ့ သူပုန်တွေကလည်း ဒမတ်စကတ်မြို့တော်ထဲက အစိုးရထိန်းချုပ်ဒေသတွေကို လက်နက်ကြီးတွေနဲ့ တိုက်ခိုက်နေပါတယ်။ ရုပ်သံ - အေဘီစီနယူးစ်