မုံရွာမြို့တွင် ငြိမ်းချမ်းရေးချိုးငှက် စတိုးဆိုင်ဝန်ထမ်းဟောင်းများ ဆန္ဒပြ
Aung Ko Latt
·
January 8, 2018
မုံရွာမြို့မှာ စတိုးဆိုင်ပိုင်ရှင်နဲ့ ဆိုင်ဝန်ထမ်းဟောင်းတွေရဲ့အမှုကို တရားရုံးရဲ့ ဆုံးဖြတ်ချက်အပေါ်ကျေနပ်မှုမရှိလို့ ဆိုင်ဝန်ထမ်းဟောင်းတွေနဲ့ မိသားစုဝင်တွေက ဒီကနေ့ မြိုကတွင်း စီတန်းလှည့်လည် ဆန္ဒပြခဲ့ကြပါတယ်။
မုံရွာမြို့ ငြိမ်းချမ်းရေးချိုးငှက်စတိုးဆိုင်က ငွေကျပ်သိန်း ၁၇၀၀ ကျော်တန်ဖိုးရှိ အဝတ်အထည်တွေ ပျောက်ဆုံးမှုနဲ့ပတ်သက်ပြီး မုံရွာမြို့နယ်တရားရုံးမှာ နိုဝင်ဘာ ၁၆ ရက်က တရားခံအဖြစ် စွပ်စွဲခံရသူ ဆိုင်ဝန်ထမ်းဟောင်း မဖြိုးဖြိုးဝေကို ပုဒ်မ-၃၈၁ အရ ထောင်ဒဏ် ၁ နှစ်၊ ကိုသန်းထိုက်အောင်၊ ကိုဖြိုးဝေအောင်တို့ကို ပုဒ်မ-၃၈၁/၁၄၄ အရ ထောင်ဒဏ် ၁ နှစ် အသီးသီးချမှတ်ခဲ့တာပါ။
ဒီကိစ္စနဲ့ပတ်သက်ပြီး ကျေနပ်မှုမရှိတာကြောင့် ပြစ်ဒဏ်ကျခံခဲ့ရတဲ့ ဆိုင်ဝန်ထမ်းဟောင်းနဲ့ မိသားစုဝင် ၂၀ ဦးခန့်က ဇန်နဝါရီ ၈ ရက်နေ့မှာ မုံရွာမြို့နယ်တရားရုံးရှေ့ကနေစတင်ကာ ရုံးကြီးလမ်း၊ ဘူတာလမ်း၊ ဗိုလ်ချုပ်လမ်း၊ ဇရပ်ဝိုင်းလမ်းတို့အတိုင်း မြို့မရဲစခန်း၊ ငြိမ်းချမ်းရေးချိုးငှက်စတိုးဆိုင်တို့ရှေ့ကဖြတ်လျှောက်ပြီး လမ်းလျှောက်ချီတက် ဆန္ဒပြခဲ့ကြပါတယ်။
ဆန္ဒပြသူတွေက “အမှုစစ်ရဲ အလိုမရှိ”၊ “တရားဥပဒေစိုးမိုးရေး”၊ “မှန်ကန်မျှတတဲ့ စီရင်ချက် ချမှတ်ပေးရေး”၊ “အရောင်းဝန်ထမ်းတွေဘဝ လုံခြုံမှုရရှိရေး”စတဲ့ ကြွေးကြော်သံတွေကိုလည်း ဆန္ဒပြရာလမ်းတလျှောက် ကြွေးကြော်ခဲ့ကြပါတယ်။
ဒီအမှုနဲ့ပတ်သက်ပြီုး မြို့နယ်တရားရုံးက ထောင်ဒဏ် ၁ နှစ်စီချမှတ်တဲ့အပေါ် တရားမျှတမှု မရှိတာကြောင့် ခရိုင်တရားရုံးကို အယူခံဝင်သွားမှာဖြစ်သလို ပြည်ထောင်စု အဆင့်ဆင့်ကိုလည်း တိုင်ကြားစာတွေ ပေးပို့သွားဖို့ ပြစ်ဒဏ်ကျခံခဲ့ရတဲ့ ဆိုင်ဝန်ထမ်းဟောင်းတွေက စီစဉ်နေသလို ထောင်ဒဏ် ၁ နှစ်က ပြစ်ဒဏ်နည်းလို့ဆိုပြီး စတိုးဆိုင်ပိုင်ရှင်ဘက်ကလည်း ပြစ်ဒဏ်ထပ်တိုးချမှတ်ပေးရေး ဆက်လက်အယူခံဝင်ထားပါတယ်။
ဒီအမှုကို တရားရင်ဆိုင်နေစဉ် ကာလအတွင်း မဖြိုးဖြိုးဝေက ၁ နှစ်နဲ့ ၃ ရက် အချုပ်ခံထားခဲ့ရသလို ကျန် ၂ ယောက်မှာလည်း ၁ နှစ်နဲ့ ၇ လထိ အမှုရင်ဆိုင်နေစဉ် ကာလအတွင်း အချုပ်ခံခဲ့ရတာပါ။
အခုလို မတရားမှုတွေ များနေတဲ့အတွက် ဒီနေ့ဆန္ဒပြပွဲကို ပြုလုပ်ရတာ ဖြစ်တယ်လို့လည်း ဆန္ဒပြသူတွေက ပြောပါတယ်။ ဒီနေ့ဆန္ဒပြပွဲကို မုံရွာမြို့ခံ အရပ်ဘက်အဖွဲ့အစည်းတွေ၊ တရားဥပဒေစိုးမိုးရေးအတွက် လှုပ်ရှားနေသူတွေကလည်း လာရောက်ဝန်းရံခဲ့ကြပါတယ်။