ဘာတွေ ဖြစ်နေကြတာလဲ
DVB
·
January 8, 2018
၂ဝ၁၈ ဇန်နဝါရီလ ၄ ရက် လွတ်လပ်ရေးနေ့ဆိုတော့ ထောင်ထဲမှာ နေခဲ့ရတဲ့ နေ့တွေကို ပြန်အမှတ်ရနေမိတယ်။ အဲဒီလို နေ့ထူးနေမြတ် (အထူးသဖြင့် လွတ်လပ်ရေးနေ့) ဆိုတာ အကျဉ်းထောင်တွေထဲမှာ ရှိနေကြတဲ့ အကျဉ်းသားမှန်သမျှရဲ့ မျှော်လင့်ချက်ကြီးတွေနဲ့ နားစွင့်ခဲ့ကြရတဲ့ နေ့တနေ့ ဖြစ်ပါတယ်။ ဘာဖြစ်လို့လဲဆိုတော့ အဲဒီနေ့တွေမှာ နိုင်ငံတော်သမ္မတကြီးတွေက လွတ်ငြိမ်းချမ်းသာခွင့် သို့မဟုတ် အကျဉ်းကျ နေ့ရက်တွေကို လျှော့ချပေးတဲ့ အလေ့အထနဲ့ အစဉ်အလာတွေ ရှိခဲ့ကြလို့ပဲ ဖြစ်ပါတယ်။
ထောင်ထဲမှာ အကျဉ်းသားဘဝ ရောက်ဖူးခဲ့သူတိုင်း ဒီခံစားချက်ကို သိကြပါတယ်။ ကိုယ် မလွတ်တာတောင်မှ တခြားလူတွေ လွတ်သွားတာကို မြင်ရတဲ့အခါ အားရဝမ်းသာနဲ့ အစိုးရမင်းများကို ဝိုင်းပြီး ကျေးဇူးတင်ကြရတာ အမောပါ။ ကိုယ်နဲ့ အတိုက်အခံဖြစ်နေတဲ့ အစိုးရကိုတောင် အဲဒီလို အခါသမယတွေမှာ အကျဉ်းသား လွတ်ငြိမ်းခွင့်ပေးခဲ့တဲ့အတွက် ချီးကျူးထောမနာပြုပေးကြစမြဲ ဖြစ်ပါတယ်။
အဲဒီလိုရက်တွေဟာ ဘယ်လိုအကျဉ်းသားပဲဖြစ်ဖြစ် အကျဉ်းသားအားလုံးရဲ့ မျှော်လင့်ချက်ပဲ ဖြစ်ပါတယ်။ အဲဒီနေ့ရက်တွေနား နီးကပ်လာရင် အကျဉ်းထောင် အမှုထမ်းတွေဆီကို ဘာများထူးခြားမှု ရှိနေပါသလဲဆိုပြီး စုံစမ်းမေးမြန်းကြရတာ အကျဉ်းသားတိုင်းရဲ့ လုပ်ရိုးလုပ်စဉ် ဖြစ်ပါတယ်။ သေဒဏ်ကျခံထားရသူက သေဒဏ်က အသက်လွတ်သွားနိုင်သလို နှစ်ကြီး ထောင်ဒဏ်သမားတွေလည်း နှစ်တွေ လျော့ကျသွားနိုင်ပါတယ်။ လွတ်နီးတွေဆိုရင်လည်း အချိန်မရွေး ချက်ချင်းလက်ငင်း လွတ်မြောက်သွားနိုင်တာမို့ အားလုံးက မျှော်နေကြတဲ့နေ့ရက်တွေ ဖြစ်ပါတယ်။
ဒါပေမယ့် အခု ဆောင်းပါးရေးနေချိန် (ဇန်နဝါရီ ၅ ရက်) အထိ အကျဉ်းထောင်တွေဆီက လွတ်ငြိမ်းချမ်းသာခွင့်နဲ့ လွတ်မြောက်လာသူဆိုလို့ တယောက်မှ သတင်းမကြားရသေးပါဘူး။ အေအေပီပီကို မေးကြည့်တော့လည်း သူတို့ ဘာမှ မကြားသေးဘူးလို့ အကြောင်းပြန်ပါတယ်။
ထောင်ထဲမှာရှိနေကြတဲ့ အကျဉ်းသားအပေါင်းတို့ကို ကျနော် ကိုယ်ချင်းစာကြည့်လိုက်မိပါတယ်။ သူတို့ခမျာ ထုံးစံအတိုင်း သေချာပေါက် မျှော်လင့်နေကြမှာဆိုတာ အလွန်ကို သေချာပါတယ်။ မျှော်လင့်သလို ဖြစ်မလာတော့ရင် အလွန်ကိုပဲ စိတ်ထိခိုက်မှု ဖြစ်ကြရမှာပါ။ အထူးသဖြင့် ထောင်ထဲက အကျဉ်းသားတွေအတွက်ကတော့ မျှော်လင့်နိုင်တာ အဲဒီနေ့ရက်လေးတွေပဲ ရှိခဲ့လို့ ဖြစ်ပါတယ်။
အစိုးရအဖွဲ့ရဲ့ နှစ်သစ်ကူး ဆွမ်းလောင်းလှူပွဲကြီး ခြိမ့်ခြိမ့်သဲသဲ ကျင်းပနေတာတွေ၊ လူပရိသတ် တသိန်းကျော်တဲ့ တရားဓမ္မပွဲတွေ ကျင်းပနေတာ တွေ့ရတော့ အကျဉ်းသားတွေအတွက်လည်း ထည့်စဉ်းစားလိမ့်မယ်လို့ ကျနော် မျှော်လင့်ပေးခဲ့မိတာဟာ မမှားလောက်ဘူးလို့ ထင်ခဲ့ရပေမယ့် တကယ့်လက်တွေ့မှာတော့ မှားသွားခဲ့ရပါတယ်။
နိုင်ငံရေးအကျဉ်းသားဘဝကို လုံးဝ မရောက်ဘူးခဲ့တဲ့ အစိုးရမင်းများ လက်ထက်တုန်းကတောင်မှ နှစ်စဉ်နှစ်တိုင်းလိုလို လွတ်ငြိမ်းခွင့်တွေ ပေးခဲ့ပါတယ်။ လျှော့ရက်တွေ ပေးခဲ့ပါတယ်။ နိုင်ငံရေးအကျဉ်းသားများ စိစစ်ရေးကော်မတီတခုကို နိုင်ငံရေးအကျဉ်းသားဟောင်းတွေနဲ့ ဖွဲ့စည်းခဲ့ပြီး နိုင်ငံရေးအကျဉ်းသားတွေကို စိစစ်မှုတွေ လုပ်ပြီး လွတ်မြောက်ဖို့ လိုအပ်သူတွေကို လွတ်မြောက်စေခဲ့ဖူးပါတယ်။ အဲဒီနည်းတွေနဲ့ နိုင်ငံရေးအကျဉ်းသားတွေ အမြောက်အမြား လွတ်မြောက်ခဲ့တဲ့ သာဓကတွေ ရှိပါတယ်။ နိုင်ငံရေးအကျဉ်းသားတွေ လွတ်ပြီဆိုရင်လည်း သာမန်အကျဉ်းသားတွေလည်း သတ်မှတ်ချက်အတိုင်း လိုက်ပါလွတ်မြောက်ကြတာ အလေ့အထတခုလို ဖြစ်လာခဲ့ပါတယ်။
အခုလို နိုင်ငံရေးအကျဉ်းသားဘဝနဲ့ နေခဲ့ဖူးတဲ့ နိုင်ငံရေးပါတီကြီးရဲ့ အစိုးရအဖွဲ့ လက်ထက်မှာဆိုရင်တော့ နိုင်ငံရေးအကျဉ်းသား လက်ကျန်တွေကိုလည်း မလွဲမသွေ လွှတ်ပေးလိမ့်မယ်လို့ ကျနော့်ဘက်က မျှော်လင့်ခဲ့မိပါတယ်။ ကျနော့်မျှော်လင့်ချက်က မှားနေဆဲပါ။ နိုင်ငံရေးအကျဉ်းသား စိစစ်မှုတွေတောင် လုပ်တယ် မကြားရတော့ပါဘူး။
AAPP တို့လို၊ နိုင်/ကျဉ်းအဖွဲ့တို့လို အဖွဲ့အစည်းတွေရဲ့ စာရင်းအရ နိုင်ငံရေးအကျဉ်းသား တရာနီးနီး အကျဉ်းထောင်တွေထဲမှာ ကျန်နေဆဲလို့ သိရပါတယ်။ AAPP ကလုပ်တဲ့ နိုင်/ကျဉ်း စာရင်းတွေဆိုရင် မူလအမှုတွဲတွေအထိကို သေသေချာချာ လေ့လာပြီးမှ နိုင်ငံရေးအကျဉ်းသား စာရင်းထဲကို ထည့်သွင်းထားခဲ့တာ ဖြစ်ပါတယ်။ အဲဒီတုန်းက စိစစ်မှုတွေအရဆိုရင် တကယ့်လက်တွေ့ဖြစ်ရပ်နဲ့ တရားစွဲခံရတဲ့ ပုဒ်မတွေ တခြားစီဖြစ်နေတာ အများအပြား တွေ့ခဲ့ရပါတယ်။ ထောင်ချဖို့သက်သက်ပဲမို့ အကျဉ်းသားတွေရဲ့ တရားစွဲတဲ့ ပုဒ်မတွေကို ကြည့်ပြီး သူတို့ကို လူဆိုးလူကောင်း အလွယ်တကူ ဆုံးဖြတ်လို့ မရနိုင်ပါဘူး။ သေသေချာချာ စိစစ်ထားခဲ့တဲ့ စာရင်းတွေ ဖြစ်ပါတယ်။
လက်ရှိ ပြည်ထောင်စုလွှတ်တော်ထဲမှာဆိုရင် နိုင်ငံရေးအကျဉ်းသား ဖြစ်ခဲ့ဖူးတဲ့ လွှတ်တော်ကိုယ်စားလှယ်ပေါင်း ၁၂ဝ လောက် ရှိတယ်ဆိုတဲ့ သတင်းတွေလည်း ကြားနေရပါတယ်။ ကိုယ်ကိုယ်တိုင် နိုင်ငံရေးအကျဉ်းသားဘဝ ရောက်ခဲ့ဖူးတဲ့ လူမှန်သမျှဟာ လက်ရှိ ထောင်ထဲမှာ ကျန်နေတဲ့ နိုင်ငံရေးအကျဉ်းသားတွေကို ကိုယ်ချင်းစာစိတ် ရှိနေမှာကတော့ သံသယရှိစရာ မလိုလောက်အောင် ယုံကြည်ရပါတယ်။ ဒါပေမယ့် ဘာကြောင့် သူတို့နဲ့ ဘဝတူတွေကို ခုထိ ဆွဲမထုတ်နိုင်သေးတာလဲ။ ဘာကြောင့် ကြိုးပမ်းအားထုတ်မှု ဝါယမစိုက်တာတွေ မတွေ့ရသေးတာလဲ။ မေးစရာပါပဲ။
လွန်ခဲ့တဲ့ ဆယ်နှစ်လောက်ကဆိုရင် အတိုက်အခံ အမျိုးသားဒီမိုကရေစီအဖွဲ့ချုပ် ရုံးချုပ်မှာ လွတ်လပ်ရေးအောင်ပွဲ အခမ်းအနားကို ကျနော် တက်ရောက်တော့ ပေးလာတဲ့ ရင်ထိုးနောက်မှာ နိုင်ငံရေးအကျဉ်းသားတယောက်ရဲ့ နာမည်တွေ ပါလာပါတယ်။ မေးကြည့်တော့ အဲဒီအကျဉ်းသားရဲ့ လိုအပ်ချက်တွေကို အကူအညီပေးရအောင် (ပေးနိုင်အောင်) နာမည်တွေကို မဲဖောက်ထားတာတဲ့။ ကျနော်ရတဲ့ ကတ်နောက်ကျောက နာမည်က “မခင်ထား၊ ထားဝယ်ထောင်” လို့ ရေးထားပါတယ်။ ဒါပေမယ့် မကြာမီမှာပဲ ကျနော်ကိုယ်တိုင် နိုင်ငံရေးအကျဉ်းသားဘဝကို ရောက်သွားလို့ အဲဒီတယောက်ကို မကူညီနိုင်ခဲ့ပါဘူး။
ဒါပေမယ့် ကျနော် ထောင်ထဲရောက်ပြီး နှစ်နှစ်လောက်ကြာတော့ အဲဒီ အမျိုးသားဒီမိုကရေစီအဖွဲ့ချုပ်ရုံးမှာ မဲပေါက်လို့ဆိုပြီး ကျနော့်မိသားစုဆီ အကူအညီပေးဖို့ တယောက် ရောက်လာပါတယ်။ နာမည်က ဒေါ်စပယ်တဲ့။ နိုင်/ကျဉ်း ကျနော့်ကို ဘာများ ကူညီရမလဲဆိုပြီး မိသားစုဆီ လာမေးပါတယ်။ နောက်ပိုင်းမှာ မိသားစုနဲ့ ညှိနှိုင်းပြီးတော့ ကျနော်ဖတ်ဖို့ စာအုပ်တွေ ပို့ပေးခဲ့တယ်။ အဲဒီအကူအညီမျိုးဟာ ထောင်ထဲမှာနေနေတဲ့ လူတယောက်အတွက် အလွန်ကိုပဲ ခွန်အားဖြစ်တယ်။ မျှော်လင့်ချက် အားမာန်တွေကို မွေးဖွားပေးနိုင်ခဲ့တယ်။ နောက်ပိုင်းမှာတော့ အဲဒီ ဒေါ်စပယ်ဟာ ကျနော့်သားနဲ့ ချွေးမတို့ရဲ့ ဆရာမအရင်းကြီးဖြစ်နေလို့ ကျနော်တို့ မိတ်ဆွေဘဝက ပိုပြီးတော့တောင်မှ မိသားစုဆန်တဲ့ အနေအထားကို ရောက်ခဲ့ရတယ်။
အတိုက်အခံဘဝတုန်းက ရှိခဲ့တဲ့ ကူညီဖေးမမှုတွေဟာ ကိုယ်တိုင် အစိုးရ ဖြစ်လာခဲ့တဲ့အခါမှာ ဘာဆိုဘာမျှ မတွေ့ရတော့ စိတ်ထဲမှာ ဝမ်းနည်းနေမိပါတယ်။
နိုင်ငံရေးအကျဉ်းသား လွတ်မြောက်ရေးအတွက် ဆောင်ရွက်ပေးနိုင်တဲ့ လုပ်ပိုင်ခွင့်တွေဟာ အစိုးရမှာ အပြည့်အဝရှိတယ်လို့ ကျနော် ယုံကြည်မိပါတယ်။ ဘယ်သူကမှ ဝင်ရောက်တားဆီး ပိတ်ပင်တာမျိုး မလုပ်နိုင်ဘူးလို့လည်း ခိုင်ခိုင်မာမာ ယူဆမိပါတယ်။ ဘာကြောင့် ဖြစ်မလာတာလဲဆိုတာ စိတ်မကောင်း ဖြစ်ရုံမှတပါး ကျနော် စဉ်းစားမရတော့ပါဘူး။
စဉ်းစားကြည့်လေ။ နိုင်/ကျဉ်းဟောင်း ၁၂ဝ က လက်ရှိ နိုင်/ကျဉ်း ၁ဝဝ အောက်ကို မကယ်နိုင်တာဟာ သမိုင်းကြောင်းမှာ ရေးရရင် အလွန်ကိုပဲ အကျည်းတန်လှပါပြီ။
ဘာတွေ ဖြစ်ကုန်ကြပြီလဲ။ ကိုင်း ….. ဝိုင်းပြီး ဖြေပေးကြပါဦး။
စိုင်းညွန့်လွင်
(နှစ်ရှည် နိုင်ငံရေးအကျဉ်းသားဟောင်း ရှမ်းတိုင်းရင်းသားများဒီမိုကရေစီအဖွဲ့ချုပ် အထွေထွေအတွင်းရေးမှူး ဦးစိုင်းညွန့်လွင်ရဲ့ ဖေ့စ်ဘွတ်ခ် လူမှုကွန်ရက်စာမျက်နှာမှာ ရေးသားထားသည့် ဆောင်းပါးကို ခွင့်ပြုချက်ဖြင့် ပြန်လည်ဖော်ပြပါသည်။)