A d v e r t i s e m e n t With Us

ကီလိုမီတာ ၂၂၀၀ ကျော် ပြေးလွှား အလှူငွေကောက်သည့် ထိုင်းအဆိုတော် ခရီးစဉ်အဆုံးသတ်

ထိုင်းနိုင်ငံရှိ ဗဟိုဆေးရုံကြီး ၁၁ ခုအတွက် လိုအပ်တဲ့ ဆေးဝါးကရိယာတွေ ထောက်ပံ့ဖို့  ထိုင်းတောင်ဘက်စွန်း မလေးရှားနယ်စပ်ကနေ မြောက်ဘက်စွန်း မြန်မာနယ်စပ် မယ်ဆိုင်ထိ တာဝေးခရီးပြေးပြီး အလှူငွေကောက်ခံနေတဲ့ ထိုင်းအဆိုတော် တွန်ဘော်ဒီးဆလမ်နဲ့ အဖွဲ့ဟာ ဒီကနေ့ညနေပိုင်း ခရီးစဉ် အဆုံးသတ်ခဲ့ပါတယ်။ တွန်ဘော်ဒီးဆလမ် ဦးဆောင်တဲ့ “လူတယောက် ခြေတလှမ်း” အလှူငွေ ရှာဖွေရေးအဖွဲ့ဟာ ဒီကနေ့ ညနေ ၂ နာရီကျော်မှာ မယ်ဆိုင်မြို့ကို ဆိုက်ရောက်လာခဲ့ပြီး မယ်ဆိုင် ပြည်သူ ၄၀၀၀ ကျော်က ကြိုဆိုခဲ့ကြပါတယ်။ ဒီမတိုင်ခင်က ချင်းရိုင်းခရိုင်မှာ ပန်းချီဆရာတွေ ပုံစံမျိုးစုံနဲ့ ဂုဏ်ပြုရေးဆွဲထားတဲ့ တွန် ဘော်ဒီးဆလမ်ရဲ့ ပုံတူပန်းချီကားချပ်ပေါင်း ၉၀ ကို  စုပေါင်းအလှူငွေ ဘတ် ၆ သိန်းကျော်နဲ့ တကွ အပ်နှင်းခဲ့ပါတယ်။ အလှူငွေရှာဖွေရေးအဖွဲ့ရဲ့ ၀က်ဘ်ဆိုက်  https://www.kaokonlakao.com/ ဖော်ပြချက်အရ ဒီဇင်ဘာလ ၂၅ ရက် ညနေ ၅ နာရီအထိ ဘတ်သန်းပေါင်း တစ်ထောင့်တစ်ရာသုံးဆယ်ကျော်  ရရှိတယ်လို့ သိရပါတယ်။ ဒါဟာ ပြီးခဲ့တဲ့ နိုဝင်ဘာလ ၁ ရက်နေ့ကစ ဒီကနေ့ထိ ရက်ပေါင်း  ၅၅ ရက်  ကီလိုမီတာပေါင်း ၂၂၀၈ ပြေးလွှားခဲ့တဲ့ တာဝေးခရီးစဉ်က ကောက်ခံရရှိခဲ့တဲ့ အလှူငွေတွေ ဖြစ်ပါတယ်။ ထိုင်းဆယ်ကျော်သက်ကြား ရေပန်းစားတဲ့ တွန်ဘော်ဒီးဆလမ်ဟာ  ပရကျူတ်ခီရီခန်ခရိုင် ဆေးရုံမှာ ဆေးဝါးကုသရေးကိရိယာ မပြည့်စုံမှုကြောင့် မသေဆုံးသင့်ဘဲ သေဆုံးခဲ့ရတဲ့ လူနာတွေ တွေ့ရှိပြီး ထိုင်းတနိုင်ငံလုံးရှိ ဗဟိုဆေးရုံကြီး ၁၁ ရုံအတွက် အလှူငွေရရှိဖို့ နည်းလမ်း ရှာဖွေခဲ့ပါတယ်။ အဲဒီနောက် နိုင်ငံသားတဦးကို ဆယ်ဘတ်စီ အလှူငွေ ထည့်ဝင်နိုင်မယ့်  “လူတယောက် ခြေတလှမ်း” လို့ အဓိပ္ပာယ်ရတဲ့ အလှူငွေကောက်ခံရေးအဖွဲ့ တဖွဲ့ ထူထောင်ပြီး တာဝေးပြေးကာ  အလှူငွေ ကောက်ခံခဲ့ပါတယ်။ သူတို့အဖွဲ့ရဲ့ ရည်မှန်းချက်မှာ သန်းပေါင်း ၇၀ ရှိ ထိုင်းလူဦးရေမှ တဦးကို ဆယ်ဘတ်စီ အလှူငွေထည့်မယ်ဆိုရင် ဘတ်သန်းပေါင်း ၇၀၀ ရဖို့ မျှော်မှန်းထားပေမယ့် ခရီးစဉ်နောက်ဆုံးနေ့မှာ ဘတ်သန်းပေါင်း တစ်ထောင့်တစ်ရာသုံးဆယ်ကျော် ရရှိခဲ့တာဖြစ်ပါတယ်။
Tags
ကီလိုမီတာ ၂၁၀၀ ကျော် ပြေးလွှား အလှူငွေကောက်သည့် ထိုင်းအဆိုတော် ခရီးစဉ်အဆုံးသတ်
© Copyright 2020 DVB Designed and Developed by Digit X Myanmar.
Up