၆ ဘီးကားနှင့် ဆိုင်ကယ် မျက်နှာချင်းဆိုင်ဝင်တိုက်၊ မိသားစု ၃ ဦး သေဆုံး
DVB
·
December 21, 2017
စစ်ကိုင်းတိုင်းဒေသကြီး၊ ဘုတလင်မြို့နယ် ပဲပြစ်တောအနောက်ရွာရှိ မုံရွာ-ရေဦး ကားလမ်းပေါ်မှာ ဒီဇင်ဘာ ၂၀ ရက်နေ့ ညနေပိုင်းက ၆ ဘီးကားနဲ့တိုက်မိတဲ့အတွက် ဆိုင်ကယ်ပေါ် ပါလာတဲ့ မိသားစုသုံးဦး နေရာမှာ သေဆုံးသွားပါတယ်။
ဖြစ်စဉ်မှာ မုံရွာ-ရေဦးလမ်းပေါ် တောင်ဘက်ကနေ မြောက်ဘက် မောင်းနှင်လာတဲ့ ၆ ဘီးယာဉ် ဟီးနိုးကားနဲ့ မြောက်ဘက်ကနေ တောင်ဘက်ကို မောင်းနှင်လာတဲ့ ဆိုင်ကယ်တို့ မျက်နှာချင်းဆိုင် ဝင်တိုက်မိကြတာပါ။
သေဆုံးသွားသူတွေဟာ ဘုတလင်မြို့နယ် မင်းတဲကျေးရွာမှာ နေထိုင်ကြတဲ့ ကိုဇော်မိုးသူ၊ ဇနီးသည် မမြင့်မြင့်မိုးနဲ့ အသက် ၅ နှစ်အရွယ် သမီးဖြစ်သူ မအေးအေးမိုးတို့ ဖြစ်တယ်လို့ သိရပါတယ်။
“အရှိန်မထိန်းနိုင်ဘဲ ဝင်တိုက်တာ၊ လမ်းအလယ် မျက်နှာချင်းဆိုင်ဆိုတော့ သေသွားတဲ့ ဆိုင်ကယ်မောင်းနှင်သူရော ကားမောင်းနှင်တဲ့သူကိုပါ နှစ်ဖက်စလုံးကို အမှုဖွင့်ထားတာပါ” လို့ ဘုတလင်မြို့မရဲစခန်းက တာဝန်ရှိသူတဦးက ပြောပါတယ်။
အခုလို ယာဉ်မျက်နှာချင်းဆိုင်တိုက်မိလို့ လူသေဆုံးရတဲ့ ကိစ္စနဲ့ပတ်သက်ပြီး ၆ ဘီး ယာဉ်မောင်း ဦးဝင်းဇော်နဲ့ ဆိုင်ကယ်မောင်းနှင်ပြီး သေဆုံးတဲ့ ကိုဇော်မိုးသူကို ဘုတလင်မြို့ရဲစခန်းက ရာဇသတ်ကြီးဥပဒေပုဒ်မ ၃၀၄ (က) နဲ့ အမှုဖွင့် အရေးယူထားတယ်လို့ သိရပါတယ်။
သတင်း - ရန်နိုင်စိုး