မြန်မာကျောင်းသား ၂၀၀၀ တရုတ်နိုင်ငံသို့ ချစ်ကြည်ရေးအလည်အပတ် ခေါ်ယူမည်
DVB
·
November 15, 2017
တရုတ်နိုင်ငံ ပရဟိတအသင်းချူပ်ကြီးက ဖိတ်ကြားချက်အရ တရုတ်-မြန်မာနိုင်ငံ စာသင်ကျောင်း ၁၀ ကျောင်းက ကျောင်းသူ ကျောင်းသား ဦးရေ ၂၀၀၀ ကို တရုတ်နိုင်ငံကို ချစ်ကြည်ရေး ခေါ်ယူသွားဖို့ ရှိနေပါတယ်။
နေပြည်တော်၊ ရန်ကုန်၊ မန္တလေး၊ မော်လမြိုင် ကျောက်ဖြူ အစရှိတဲ့နေရာတွေမှာ မြန်မာ ပညာရေးဝန်ကြီးဌာနနဲ့အတူ အသိအမှတ်ပြု ပူးပေါင်းတည်ဆောက်ထားတဲ့ တရုတ်-မြန်မာ ချစ်ကြည်ရေး စာသင်ကျောင်း ၁၀ ကျောင်းက ကျောင်းသားကျောင်းသူ ၂၀၀၀ ခေါ်ယူဖို့ စီစဉ်ထားတာပါ။
အဲဒီအထဲမှာ ရခိုင်ပြည်နယ် ကျောက်ဖြူ အမှတ် (၁) အခြေခံပညာအထက်တန်းကျောင်းမှ ကျောင်းသားကျောင်းသူ ၂၀၀ ဦးကို ခေါ်ယူတာဖြစ်ပြီး တတိယတန်းက နဝမတန်းထိ အသက်ပိုင်းခြားအလိုက် သတ်မှတ်ထားတယ်လို့ ကျောက်ဖြူ အမှတ် (၁) အခြေခံပညာ အထက်တန်းကျောင်းက ကျောင်းအုပ်ဆရာကြီး ဦးဝင်းနိုင်က ဒီဗွီဘီကို ပြောပါတယ်။
“တရုတ်-မြန်မာ ချစ်ကြည်ရေးကျောင်း ဆိုပြီးတော့ နိုင်ငံတော်ပညာရေးဝန်ကြီးဌာနက အသိအမှတ်ပြုထားတဲ့ မြန်မာနိုင်ငံမှာ ကျောင်း ၁၀ ကျောင်း ရှိပါတယ်။ အဲဒီ ၁၀ ကျောင်းကနေ ကျောင်းသား ၂၀၀၀ ကို တရုတ်နိုင်ငံကို ချစ်ကြည့ရေးခရီးအဖြစ် ခေါ်တာပါ။ အဲဒီမှာ ကျနော်တို့ ကျောက်ဖြူ အ.ထ.က ကျောင်းက ကျောင်းသူ ကျောင်းသား ၂၀၀ ပါဝင်ပါတယ်။ ရခိုင်ဆိုလို့ ရှိရင် ကျောက်ဖြူ အ.ထ.က က ကျောင်းတကျောင်းတည်းပေ့ါလေ။ အသက် ၈ နှစ်ကနေ ၁၅ နှစ်အထိပေါလေ။”
တရုတ်နိုင်ငံ ချစ်ကြည်ရေးခရီးစဉ်ကို လက်တလော ဘယ်တော့ သွားရမလဲ ဆိုတာကိုတော့ မသိရသေးဘဲ လိုက်မယ့် ကျောင်းသူ ကျောင်းသား စာရင်းတွေကိုတော့ နေပြည်တော်ကို ပို့ပေးထားရပါတယ်။
ကျောင်းအုပ်ဆရာကြီး ဦးဝင်းနိုင်က “ဘယ်နေ့ သွားမလဲ ဆိုတာတော့ အတိအကျပြောလို့ မရသေးဘူး။ ကျောက်ဖြူကနေ လိုက်မယ့်ကျောင်းသား စာရင်းတွေကို နေပြည်တော်ကို ပို့ထားလိုက်ပြီဗျ။ အဒီက ကျောက်ဖြူ ရွေးချယ်တာက တရုတ်-မြန်မာ ချစ်ကြည်ရေးကျောင်း တနိုင်ငံလုံးမှာ ဒီလိုကျောင်းမျိုး ၁၀ ကျောင်းပဲ ရှိတယ်ပေ့ါလေ။ အဲဒီမှာ ကျောက်ဖြူ တကျောင်း ပါဝင်တာပေ့ါ။”
မြန်မာနိုင်ငံမှာ ရွေးချယ်ခံထားရတဲ့ ကျောင်းသူ ကျောင်းသားတွေကိုတော့ တရုတ်နိုင်ငံ ဘေကျင်းမြို့ရှိ ဘားရီး အထက်တန်းကျောင်းတွေ အပါအဝင် တခြားမြို့နယ်တွေက အခြေခံပညာရေးကျောင်းတွေကို သွားရောက်ရမှာ ဖြစ်ပါတယ်။
ကျောက်ဖြူမြို့မှာ တရုတ်-မြန်မာ ချစ်ကြည်ရေး စာသင်ကျောင်းကို ၂၀၁၇ ခုနှစ် မတ် ၃ ရက်နေ့က စတင်ဖွင့်လှစ်ခဲ့ကြပါတယ်။
မြန်မာတနိုင်ငံမှာ တရုတ်တို့ရဲ့ ရင်းနှီးမြှုပ်နှံမှု ပိုမိုတိုးချဲ့ဖို့ ရည်ရွယ်ပြီး အထူးသဖြင့် ရခိုင်ပြည်နယ်မှာ ရေနံပိုက်လိုင်းစီမံကိန်း၊ ရွှေဂါတ်(စ်)စီမံကိန်း အပါအဝင် ရေနက်ဆိပ်ကမ်း စီမံကိန်းလုပ်ငန်း အများအပြား ရင်းနှီးမြှုပ်နှံလုပ်ကိုင်နေပါတယ်။
ဒါပေမယ့် ၂၀၀၉ ခုနှစ်က စတင်ပြီး တရုတ်အမျိုးသားရေနံကော်ပိုရေးရှင်း(CNPC) ကုမ္ပဏီက ရေနံဆိပ်ကမ်း အပါအဝင် အခြားစီးမံကိန်းတွေအတွက် ရခိုင်ပြည်နယ်အတွင်းက အလုပ်သမားတွေ ထောင်ချီ အလုပ်အကိုင် အခွင့်အလမ်းတွေ ရရှိခဲ့ပေမယ့် ၂၀၁၄ ခုနှစ်နောက်ပိုင်း စီမံကိန်းတွေ ပြီးစီးလာတာကြောင့် အလုပ်အကိုင်တွေ တဖြည်းဖြည်းနဲ့ ရှားပါးလာတယ်လို့ ဒေသခံတွေက ပြောပါတယ်။
သတင်း - ဝဏ္ဏခွာညို