အာဖရိက အကောင်းဆုံး ဘောလုံးသမားဆု ဒေါ့မွန်တိုက်စစ်မှူး ရေပန်းစား

ဓာတ်ပုံ - ဘီဘီစီ
၂၀၁၇ ခုနှစ်အတွက် အာဖရိက အကောင်းဆုံး ဘောလုံးသမားဆုအတွက် ဆန်ကာတင် ၅ ဦးစာရင်း ထုတ်ပြန်ရာမှာ ဒေါ့မွန်တိုက်စစ်မှူး အော်ဘာမီယန်းက ရေပန်းအစားဆုံး ဖြစ်နေပါတယ်။ ဘီဘီစီကချီးမြှင့်တဲ့ အာဖရိက အကောင်းဆုံး ဘောလုံးသမားဆုအတွက် အော်ဘာမီယန်းနဲ့အတူ လီဗာပူးက အီဂျစ်ကစားသမား ဆာလက်ခ်ျနဲ့ မာနေး၊ လိုက်ဇစ်က ဂီနီကွင်းလယ်လူ ကီတာနဲ့ ချဲလ်ဆီးက နိုင်ဂျီးရီးယား ကစားသမား မော့ဆက်တို့ ပါဝင်နေတာပါ။ အကောင်းဆုံးဆုအတွက် ရေပန်းစားနေတဲ့ ဂါဘွန်တိုက်စစ်မှူး အော်ဘာမီယန်းဟာ ပြီးခဲ့တဲ့နှစ်က ဒေါ့မွန်အသင်းအတွက် သွင်းဂိုး ၃၅ ဂိုးအထိ သွင်းခဲ့ပြီး ဂျာမန်ဘွန်ဒက်စ်လီဂါ ဂိုးသွင်းဘုရင်ဆု ရခဲ့သလို ဂျာမန်ဖလားတလုံးလည်း ဆွတ်ခူးနိုင်ခဲ့ပါတယ်။ ဒီဆုအတွက် ဘီဘီစီဝက်ဘ်ဆိုက်မှာ ပရိသတ်တွေကိုယ်တိုင် မဲပေးနိုင်ပြီး လာမယ့် ဒီဇင်ဘာ ၁၁ ရက်မှာ ဆုချီးမြှင့်မှာ ဖြစ်ပါတယ်။ ၂၀၁၆ ခုနှစ်အတွက် အာဖရိက အကောင်းဆုံး ဘောလုံးသမားဆုကိုတော့ အယ်လ်ဂျီးရီးယားနဲ့ လက်စတာ တောင်ပံကစားသမား မာရက်ဇ်က ရရှိခဲ့ပါတယ်။

More News
Up