အိန္ဒိယနိုင်ငံမြောက်ပိုင်း ဥတ္တာပရာဒေ့ရှ် ပြည်နယ်ဆေးရုံမှာ ၄၈ နာရီအတွင်း  မွေးကင်းစကလေး အယောက် ၃၀ သေဆုံးခဲ့တယ်လို့ ဆေးကောလိပ်က နိုဝင်ဘာ ၅ ရက်မှာ အတည်ပြု ပြောဆိုပါတယ်။ ကလေး ၁၅ ဦးက ဂူရတ်ပူရ်မြို့ဆေးရုံ မွေးကင်းစ အထူးကုသဆောင်မှာ သေဆုံးခဲ့ပြီး တခြားကလေး ၁၅ ဦးကတော့ ကလေးအထူးကုသဆောင်မှာ သေဆုံးခဲ့တာပါ။ သေဆုံးမှု ၆ ခုက ဦးနှောက်ရောင်ရမ်းမှုကြောင့် ဖြစ်ပြီး တခြား မွေးကင်းစ သေဆုံးမှုတွေကတော့ တခြားအကြောင်းတွေကြောင့်လို့ ဘာဘာရာဂတ်စ်ဒဲ့ဗ် ဆေးကောလိပ်မှ ပါမောက္ခ ဒေါက်တာ ဒီကေ ရှရီဗာ စတာဗာက ပြောပါတယ်။ ဒီဆေးရုံမှာပဲ လွန်ခဲ့တဲ့ ၂ လက မွေးကင်းစနဲ့ ကလေးငယ် အများစုဖြစ်တဲ့ လူ ၁၀၅ ဦး သေဆုံးခဲ့ပါသေးတယ်။