စစ်ကိုင်းတိုင်းလွှတ်တော် တလကျော်ကြာ ရပ်နား
2.2K
လွှတ်တော်ကို ပါတီစုံ၊ အလွှာစုံက လာကြတာဖြစ်ပေမယ့် တဦးနဲ့တဦး ညီအစ်ကို မောင်နှမ စိတ်ဓာတ်နဲ့ ဝိုင်းဝန်းလုပ်ဆောင်ကြဖို့ စစ်ကိုင်းတိုင်းဒေသကြီး လွှတ်တော်ဥက္ကဋ္ဌက မှာကြားလိုက်ပါတယ်။
ဒုတိယအကြိမ် စစ်ကိုင်းတိုင်းဒေသကြီးလွှတ်တော် ဒသမ ပုံမှန်အစည်းအဝေးကို အောက်တိုဘာလ ၁၁ ရက်နေ့ကနေ ၂၄ ရက်နေ့ထိ ၁၄ ရက်ကြာ ကျင်းပခဲ့ပြီး လွှတ်တော်ကို ၁ လကျော်ကြာ ရပ်နားမှာဖြစ်ပါတယ်။
အခုတကြိမ် ပြန်လည်ကျင်းပတဲ့ တိုင်းဒေသကြီးလွှတ်တော် ဒသမ ပုံမှန်အစည်းအဝေးအတွင်း လွှတ်တော်ကိုယ်စားလှယ် ၄၄ ဦးက ပေးပို့တင်ပြထားတဲ့ ကြယ်ပွင့်ပြ မေးခွန်း ၇၂ ခု၊ ကြယ်ပွင့်မပြ မေးခွန်း ၂၂ ခု၊ အဆို ၄ ခု၊ ဥပဒေမူကြမ်း ၃ ခုတို့မှ ကြယ်ပွင့်ပြမေးခွန်း ၅၈ ခု၊ ကြယ်ပွင့်မပြ ၃၅ ခု၊ အဆို ၂ ခုတို့ကို စိစစ်ရွေးချယ်ပြီး ဆွေးနွေးမေးမြန်းခဲ့ကြပါတယ်။
ပို့ဆောင်ရေး၊ ဆက်သွယ်ရေးနှင့် ဆောက်လုပ်ရေးဆိုင်ရာကော်မတီရဲ့ အစီရင်ခံစာတခုကိုလည်း လွှတ်တော်က မှတ်တမ်းတင်ခဲ့ပါတယ်။ ဥပဒေမူကြမ်း ၂ ခုမှ ၁ ခုကိုသာ လွှတ်တော်က လက်ခံဆွေးနွေးရန် ဆုံးဖြတ်ခဲ့ပြီး ဥပဒေပြုရေးကော်မတီကို စိစစ်ရန် လွှဲပြောင်းပေးပို့ခဲ့ပါတယ်။
လွှတ်တော်ဥက္ကဋ္ဌ ဦးသန်းက “ကျနော်တို့လွှတ်တော်ဟာ ဥပဒေပြုရေးမဏ္ဍိုင်ဖြစ်တယ်။ လွှတ်တော်ကို ပါတီစုံ၊ အလွှာစုံက လာကြတာဖြစ်ပေမယ့် လွှတ်တော်ကိုယ်စားလှယ် အချင်းချင်းဆိုတဲ့အမြင်နဲ့ တဦးနှင့် တဦး ညီအစ်ကို မောင်နှမစိတ်ဓာတ်၊ တစိတ်တဝမ်းတည်း စည်းစည်းလုံးလုံးနဲ့ ဥပဒေတွေကို တခုပြီးတခု ပြဋ္ဌာန်းနိုင်ရေးကို အလေးထား ဆောင်ရွက်စေချင်တယ်။ တည်ဆဲဥပဒေတွေအားလုံးက ပြီးပြည့်စုံတဲ့ ဥပဒေတွေမဟုတ်လို့ ခေတ်ကာလနဲ့ လိုက်လျောညီထွေ မဖြစ်တော့တဲ့အချိန်၊ လက်တွေ့မှာ အံဝငခွင်ကျမရှိတဲ့ အခြေအနေတွေဖြစ်လာရင် ပြင်ဆင်ရမှာပါ”လို့ လွှတ်တော်ကိုယ်စားလှယ်တွေကို မှာကြားခဲ့ပါတယ်။
ဒုတိယအကြိမ်လွှတ်တော်သက်တမ်းအတွင်း ပုံမှန်အစည်းအဝေး ၁၀ကြိမ်၊ အရေးပေါ်အစည်းအဝေး ၁ကြိမ်၊ အထူးအစည်းအဝေး ၁ ကြိမ်ကျင်းပခဲ့ပြီး ကြယ်ပွင့်ပြမေးခွန်း ၅၂၂ ခု၊ ကြယ်ပွင့်မပြ ၂၁၇ ခု၊ အဆို ၁၁ ခုတို့ကို တင်သွင်းမေးမြန်းခဲ့ပါတယ်။
ဒီထဲက အဋ္ဌမပုံမှန်အစည်းအဝေးထိ စိစစ်ပြီး ကတိဖြစ်မေးခွန်း ၁၈၂ခု၊ အတည်ပြု အောင်မြင်တဲ့အဆို ၁၁ ခု ရှိပါတယ်။ ဥပဒေအနေနဲ့ အသစ်ရေးဆွဲအတည်ပြုနိုင်မှု ၁ ခု၊ ပြင်ဆင်တဲ့ဥပဒေ ၂ ခုကို ဆောင်ရွက်ထားပါတယ်။
လွှတ်တော်အစည်းအဝေးကို တလကျော်ကြာ ရပ်နားထားမှာဖြစ်ပြီး လာမယ့် ဒီဇင်ဘာလ ဆန်းမှာ ၁၁ ကြိမ်မြောက် ပုံမှန်အစည်းအဝေး ပြန်လည်ခေါ်ယူမှာ ဖြစ်ပါတယ်။
