ဘောလိဝုဒ်မင်းသမီး ဂျီယာခန်း သေဆုံးမှု အသတ်ခံရခြင်းဖြစ်နိုင်ဟု သံသယရှိနေ

ဓာတ်ပုံ - Getty - Contributor
နာမည်ကြီး ဘောလိဝုဒ်ကြယ်ပွင့်မင်းသမီး ဂျီယာခန်း သေဆုံးခဲ့မှုဟာ ဆွဲကြိုးချသေဆုံးမှု မဖြစ်နိုင်ဘဲ အသတ်ခံရတာ ဖြစ်နိုင်တယ်ဆိုပြီး မိသားစုဝင်တွေနဲ့ သူ့ရဲ့ပရိသတ်တွေက သံသယရှိနေကြပါတယ်။ အသက် ၂၅ နှစ်အရွယ် ဗြိတိန်နိုင်ငံဖွား မင်းသမီးဟာ လွန်ခဲ့တဲ့ ၂၀၁၃ ခုနှစ်၊ ဇွန်လတုန်းက မွမ်ဘိုင်းမြို့မှာ ဆွဲကြိုးချ သေဆုံးခဲ့တာဖြစ်တယ်လို့ ရဲတွေက အတည်ပြုခဲ့အပြီးမှာ နောက်တဖန် ခုလိုသတင်းတွေ ထွက်ပေါ်လာခဲ့တာပါ။ သူဟာ မွမ်ဘိုင်းမြို့မှာရှိနေချိန် ဗြိတိန်က မိသားစုတွေ သူ့ဆီ လာရောက်လည်ပတ်မယ်လို့ ပြောအပြီး နာရီပိုင်းအကြာမှာပဲ သေဆုံးခဲ့တာ ဖြစ်ပါတယ်။ မသေဆုံးခင်အချိန်အထိ အစ်မဖြစ်သူဟာ သူ့ဆီကို စိတ်ခံစားချက်ကို ဖော်ပြတဲ့ အီမိုဂျီလေးတွေကို ပို့နေခဲ့သေးတယ်လို့ ဂျီယာခန်းရဲ့ ညီမဖြစ်သူ ကာဗီတာက ပြောပါတယ်။ ၂၀၀၇ ခုနှစ်ကနေ ၂၀၁၀ ပြည့်နှစ်ကြား ကာလတွေအတွင်းမှာ ဘောလိဝုဒ် ရုပ်ရှင်လောကရဲ့ နာမည်ကြီးတဦးဖြစ်ခဲ့တဲ့ မင်းသမီးဟာ မသေဆုံးခင်မှာ စာမျက်နှာ ၆ မျက်နှာပါတဲ့ သေကြောင်းကြံစည်မှု စာတစောင်ကို ထားခဲ့တယ်လို့ အိန္ဒိယရဲတပ်ဖွဲ့က ထုတ်ပြန်ထားပါတယ်။ ဂျီယာခန်း သေဆုံးပြီး တလအကြာမှာတော့ သူမရဲ့ချစ်သူဖြစ်တဲ့ မင်းသား ဆိုရာဂ်ျ ပန်ချိုလီဟာ သေမှုသေခင်းနဲ့ ပတ်သက်မှုမရှိကြောင်း ရဲတပ်ဖွဲ့က ထုတ်ပြန်ခဲ့တာပါ။ အဲဒီနှစ် သြဂုတ်လမှာတော့ ဒါဟာ သမားရိုးကျ သေကြောင်းကြံစည်မှုသာဖြစ်တယ်လို့ အိန္ဒိယ ဗဟိုစုံစမ်းထောက်လှမ်းရေးဗျူရိုက အတည်ပြုခဲ့ပါတယ်။ ဒါပေမယ့် ညီမဖြစ်သူ ကာဗီတာကတော့ “သူ(ဂျီယာခန်း) ဒီလိုလုပ်မှာမဟုတ်ဘူးဆိုတာ ကျမတို့သိတယ်။ အစပိုင်းတုန်းကတော့ ရဲတွေကို ကျမတို့ ယုံကြည်ခဲ့ပါတယ်။ တကယ် ဘာတွေဖြစ်ခဲ့တယ်ဆိုတာရယ်၊ ဘယ်သူက ကျူးလွန်ခဲ့သလဲ ဆိုတာရယ်ကို သူတို့အနေနဲ့ လှစ်ဟပြလိမ့်မယ်လို့ ကျမတို့ ထင်ခဲ့ကြတာ” လို့ ပြောပါတယ်။ မင်းသမီးရဲ့ မိခင်ဖြစ်သူ ရက်ဘီယာကလည်း ဂျီယာရဲ့ သေဆုံးမှုနဲ့ပတ်သက်ပြီး အိန္ဒိယဝန်ကြီးချုပ် နာရန်ဒရာ မိုဒီ ဆီကို စာတစောင် ရေးခဲ့ပါတယ်။ ဂျီယာရဲ့ မျက်နှာနဲ့ လည်ပင်းတွေမှာ ထိခိုက်ဒဏ်ရာ ရနေတာတွေ၊ အခန်းတွင်းအံဆွဲ ကျိုးပျက်နေတာတွေနဲ့ သွေးတွေ နေရာအနှံ့ ပြန့်ကျဲနေတာတွေ၊ သံသယရှိစရာ တခြားအရာတွေနဲ့ ပတ်သက်ပြီးလည်း ဘာမှ ရှင်းရှင်းလင်းလင်း မသိခဲ့ရဘူးလို့ အဲဒီစာထဲမှာ ဖော်ပြပါတယ်။ စီစီတီဗွီ ကင်မရာထဲမှာတော့ ဂျီရာဟာ အားကစားဝတ်စုံတထည် ဝတ်ဆင်ထားခဲ့ပြီး သေဆုံးခဲ့ပြီးချိန်မှာ လိုအပ်တဲ့ လက်ဗွေစစ်ဆေးချက်တွေလည်း တခုမှ မပြသနိုင်ခဲ့ပါဘူး။ ပြီးခဲ့တဲ့ ၂၀၁၆ ခုနှစ်၊ စက်တင်ဘာလမှာ ရေးခဲ့တဲ့ ဒီစာထဲမှာ ဂျီရာ သေကြောင်းကြံစည်ရာမှာ အသုံးပြုတဲ့ လည်စည်းခြုံပဝါကိုလည်း ဖျောက်ထားခဲ့တဲ့အတွက် ဒီသေဆုံးမှုဟာ သေကြောင်းကြံစည်မှု မဖြစ်နိုင်ဘူးလို့ ဖော်ပြထားခဲ့တာပါ။ မသေဆုံးခင်ထိ ဆက်သွယ်မှုရှိနေခဲ့တဲ့ မိသားစုနဲ့ သူ့ရဲ့ကြား ဆက်ဆံရေးဟာလည်း သေကြောင်းကြံစည်ရလောက်တဲ့ အကြောင်းရင်းအဖြစ် မလုံလောက်ဘူးလို့ ဆိုပါတယ်။ မင်းသမီးရဲ့ မိသားစုက ငှားရမ်းခဲ့တဲ့ အလွတ်တန်း မှုခင်းဆေးပညာရှင်ကလည်း သူတို့နဲ့ တသဘောတည်းရှိနေပြီး ဒါဟာ သေကြောင်းကြံစည်မှု မဖြစ်နိုင်ဘူးလို့ အခိုင်အမာ ပြောလိုက်ပါတယ်။ “နူးညံ့တဲ့ ဝါဂွမ်းချည်သား လည်စည်းခြုံပဝါကို အသုံးပြုပြီး သေကြောင်းကြံစည်မှုဆိုတာ တော်တော့ကို ရိုးစင်းပြီး သူ့ရဲ့လည်ပင်းမှာ ထိခိုက်ဒဏ်ရာတွေ အများကြီးရတဲ့ထိတော့ မဖြစ်နိုင်ပါဘူး။”

More News
Up