ဘုတလင်မြို့နယ်တွင် စိတ်ကြွမူးယစ်ဆေးဝါးများ ဖမ်းဆီးရမိ
Aung Ko Latt
·
September 25, 2017
စစ်ကိုင်းတိုင်းဒေသကြီး၊ မုံရွာခရိုင်၊ ဘုတလင်မြို့နယ်မှာ ကျပ်သိန်း ၁၀၀ နီးပါး တန်ဖိုးရှိတဲ့ 88/1 စာတန်းပါ ပန်းရောင်စိတ်ကြွဆေးပြားတွေကို စက်တင်ဘာ ၂၄ ရက်နေ့ည ၁၀ နာရီလောက်က ဖမ်းဆီးရမိခဲ့ပါတယ်။
မုံရွာ-ရေဦးလမ်း ဘုတလင်တိုးဂိတ်နားမှာ တိုင်းမှုခင်းအကူတပ်ဖွဲ့က သတင်းအရစောင့်ဆိုင်းနေစဉ် မိုးဦးမောင်နဲ့ ညီမျိုးနိုင်တို့စီးလာတဲ့ ဆိုင်ကယ်ကို ရပ်တန့်စစ်ဆေးရှာဖွေရာကနေ ကမ္ဘာလုံးတံဆိပ်ပါ အပြာရောင် အိတ်အတွင်း 88/1 စာတန်းပါ ပန်းရောင်စိတ်ကြွရူးသွပ်ဆေးပြား ၁ ထုပ်ကို ၁၉၅ ပြားပါ ၁၀ ထုပ်၊ စုစုပေါင်း ၁၉၅၀ ပြား၊ ကာလတန်ဖိုး ၉၇ သိန်း ၅ သောင်းတန်ဖိုးရှိ မူးယစ်ဆေးဝါးတွေကို ဖမ်းဆီးရမိခဲ့တာဖြစ်ပါတယ်။
"အခုဖမ်းမိတာက ဒုတိယအကြိမ်ဖမ်းမိတာပါ။ နှစ်စပိုင်းတုန်းကတော့ တကြိမ်ဖမ်းဆီး ရမိခဲ့သေးတယ်။ ဒီနှစ်အတွင်း အခုမှ ၂ မှုပဲ ရှိပါသေးတယ်" လို့ ဘုတလင်မြို့မစခန်းမှ ဒုရဲအုပ်ကိုကိုအောင်က ဒီဗွီဘီကိုပြောပါတယ်။
မူးယစ်ဆေးဝါးဖမ်းဆီးရမိမှုနဲ့ပတ်သက်ပြီး ဘုတလင်မြို့မရဲစခန်းက မယ(ပ)၂/၂၀၁၇၊ မူး/စိတ်ပုဒ်မ ၁၅/၁၉(က)/၂၁ အရ အမှုဖွင့် အရေးယူဆောင်ရွက်နေတယ်လို့ သိရပါတယ်။
