လှိုင်သာယာ ခြေအိတ်စက်ရုံ အလုပ်သမားများ စက်ရုံပိတ်ဆန္ဒပြ
အာကာ
·
September 5, 2017
ရန်ကုန် လှိုင်သာယာ စက်မှုဇုန် ၃ရှိ Myanmar DJY ခြေအိတ်စက်ရုံက အလုပ်သမားတွေဟာ အလုပ်ထုတ်ခံရသူတွေကို အလုပ်ပြန်ခန့်ဖို့အတွက် ၁ လနီးပါး ကြာတဲ့အထိ ညှိနှိုင်းဆွေးနွေးမှု အဆင်မပြေတာကြောင့် စက်ရုံပိတ် ဆန္ဒပြနေကြပါတယ်။
ခြေအိတ်စက်ရုံ အလုပ်သမားတွေအနေနဲ့ စက်တင်ဘာ ၄ ရက် ညနေက စပြီး စက်ရုံ ဝင်ပေါက် ထွက်ပေါက် အားလုံးကို ပိတ်ဆို့ကာ ကုန်ထုတ်လုပ်မှု ရပ်ဆိုင်းတဲ့ အဆင့်အနေနဲ့ အရှိန်အဟုန်မြှင့် ဆန္ဒပြနေတာပါ။
ဆန္ဒပြ အလုပ်သမားခေါင်းဆောင် ကိုစိုးသူရကိုက “မနေ့က စက်ရုံဘက်နဲ့ ညှိတဲ့အခါ ကျနော်တို့ တောင်းဆိုတဲ့ အလုပ်သမားတွေကိုမူလ ရာထူး၊ လစာနဲ့ ပြန်ခန့်ဖို့ ဒါမှမဟုတ် လျော်ကြေး နစ်နာကြေးပေးဖို့ကို စက်ရုံဘက်က တခုမှ လက်မခံဘူး။ အဲဒါကြောင့် မနေ့က ညနေ ၅ နာရီဝန်းကျင်ကစပြီး ထိုင်သပိတ်အနေနဲ့ ဆန္ဒဖော်ထုတ်နေတာပါ”လို့ ပြောပါတယ်။
စက်ရုံမှာ အလုပ်သမားသမဂ္ဂ ဖွဲ့စည်းတာကို အကြောင်းပြုပြီး အလုပ်သမားခေါင်းဆောင်ကို အလုပ်က ထုတ်ပယ်လိုက်တဲ့အတွက် အလုပ်ပြန်ခန့်ပေးဖို့ သြဂုတ် ၇ ရက်နေ့က စပြီး စက်ရုံရှေ့မှာ ဆန္ဒဖော်ထုတ်နေတာပါ။
အဲဒီနောက် စက်ရုံက သြဂုတ် ၂၂ ရက်မှာ ဆန္ဒပြအလုပ်သမား ၂၂၉ ဦးကို အလုပ်က ထုတ်လိုက်တဲ့အတွက် အလုပ်ပြန်ခန့်ပေးဖို့ ဆက်လက်တောင်းဆိုနေကြတာ ဖြစ်ပါတယ်။ ဒီအငြင်းပွားမှုကို လာမယ့် စက်တင်ဘာ ၆ ရက်နေ့မှာ အလုပ်ရှင်နဲ့ အလုပ်သမား ထပ်မံညှိနှိုင်းသွားဖို့လည်း ရှိပါတယ်။