စိုက်ဘဏ်ချေးငွေ လာထုတ်သည့် ကားတိမ်းမှောက်၊ ၁၇ ဦး ဒဏ်ရာရ
DVB
·
July 24, 2017
မန္တလေးတိုင်းဒေသကြီး ဝမ်းတွင်းမြို့နယ် ရန်ကုန်-မန္တလေးလမ်းဟောင်း မိုင်တိုင် ၃၆၃/၁ နဲ့ ၂ ကြား ဇူလိုင် ၂၄ ရက် မနက် ၇ နာရီမှာ လူခင်းအုပ်စု ပျားစွဲကျေးရွာတောင်သူတွေ စိုက်ဘဏ် ချေးငွေ ထုတ်ယူဖို့လာတဲ့ ခြောက်ဘီးကားတစီး လမ်းချော်တိမ်းမှောက်တဲ့အတွက် ၁၇ ဦး ဒဏ်ရာရခဲ့ တယ်လို့ ၀မ်းတွင်းမြို့မရဲစခန်းက ပြောပါတယ်။
မန္တလေးမြို့ကနေ ရန်ကုန်မြို့ကို ဦးညွန့်ဆောင် မောင်းလာတဲ့ကား မိုးရေကြောင့် လမ်းချော်တိမ်းမှောက်ခဲ့တာပါ။ ကွန်ကရစ်လမ်း အရှေ့ဘက်ကိုကျသွားခဲ့တာဖြစ်ပြီး ISUZU-ELF အမျိုးအစား ခြောက်ဘီးကင်တာ ဖြစ်တယ်လို့ သိရပါတယ်။
ဒုရဲအုပ်အောင်ကိုကိုက "ကားပေါ်ပါသူ အားလုံးဒဏ်ရာရတယ်။ ခေါင်းပေါက် ပွန်းပဲ့ ဖူးရောင် ဒဏ်ရာတွေရကြတယ်။ စိုက်ဘဏ်ချေးငွေ ထုတ်ယူဖို့ အဲရွာက ကား ၄ စီး ထွက်လာတယ်။ ဒီတစီးမှောက်သွားတယ်။ ဒဏ်ရာရသူ ၁၇ ဦးလုံး ဝမ်းတွင်းဆေးရုံကို ပရဟိတအသင်းကားတွေနဲ့ ပို့ပေးရတယ်"လို့ ပြောပါတယ်။
ဝမ်းတွင်းမြို့မရဲစန်းမှာ ယာဉ်မဆင်မခြင်ပေါ့ဆစွာ မောင်းလို့ သာမာန်/ပြင်းထန် ဒဏ်ရာရစေမှု ရာဇသတ်ကြီးပုဒ်မ ၃၃၇/၃၃၈ အမှုနဲ့ ယာဉ်မောင်း ကိုညွှန့်ဆောင် ကို အမှုဖွင့်ထားပါတယ်။
သတင်း-မောင်မောင်လင်း(ဝမ်းတွင်း)