ချင်းတွင်းမြစ်ရေ ပြန်ကျ၊ ကယ်ဆယ်ရေးစခန်းတွင် ရေဘေးဒုက္ခသည် ၇ ထောင်ကျော် ခိုလှုံနေရဆဲ
ပိုင်စိုး
·
July 16, 2017
စစ်ကိုင်းတိုင်းက ခန္တီးမြို့နဲ့ ဟုမ္မလင်းမြို့တွေမှာ ရေကျသွားပေမယ့် ကျန် ၆ မြို့မှာတော့ ရေကြီးနေတုန်းပဲ ဖြစ်သလို ရေဘေးရှောင်စခန်းတွေမှာ လူ ၇ ထောင်ကျော်ရှိနေတုန်းပဲ ဖြစ်ပါတယ်။
တိုင်း လူမှုဝန်ထမ်း၊ ကယ်ဆယ်ရေးနဲ့ ပြန်လည်နေရာချထားရေး ညွှန်ကြားရေးမှူး ဦးဝီလီဖရန့်က “ရေပြန်ကျသွားတော့ အိမ်တွေကို ရှင်းနေရတယ်လေ။ အဲဒါကြောင့် စခန်းမှာ နေကြတုန်းပဲ။ ဒီနေ့အထိတော့ မြို့ ၆ မြို့ကတော့ ရေကြီးနေတုန်းပဲ။ ဟုမ္မလင်းမှာတော့ ကယ်ဆယ်ရေးစခန်းမှာ လူမရှိတော့ဘူး။ ခန္တီးမှာ ၈၀၀ ကျော် ကျန်သေးတယ်။ အားလုံးပေါင်းရင် လူ ၇ ထောင်ကျော်ရှိမယ်” လို့ ဒီဗွီဘီကို ပြောပါတယ်။
ရေကျပြီးသွားရင်တော့ သောက်ရေ သုံးရေကိစ္စတွေအတွက် တခြားဌာနတွေနဲ့ ပူးပေါင်းဆောင်ရွက် သွားဖို့ ရှိတယ်လို့လည်း သူက ပြောပါတယ်။
ချင်းတွင်းမြစ်ရေဟာ မော်လိုက်မြို့မှာ ၅ ပေလောက်၊ မင်းကင်းမြို့မှာ ၄ ပေခွဲလောက်၊ ကလေးဝမြို့မှာ ၄ ပေလောက်၊ မုံရွာမြို့မှာ ၂ ပေလောက်၊ ဖောင်းပြင်မြို့မှာ ၁ ပေလောက်၊ ကနီမြို့မှာ ပေဝက်လောက် စိုးရိမ်ရေမှတ်ထက် မြင့်နေတယ်လို့ မိုးလေဝသနဲ့ ဇလဗေဒဦးစီးဌာနက ထုတ်ပြန်ထားပါတယ်။
ပြီးတော့ ဧရာဝတီမြစ်ရေလည်း မြင့်တက်လာနေလို့ ပခုက္ကူမြို့နယ်၊ ညောင်ဦးမြို့နယ်၊ ဟင်္သာတမြို့နယ်နဲ့ ဇလွန်မြို့နယ်တွေက မြစ်ကမ်းနားနဲ့ မြေနိမ့်ပိုင်းနေထိုင်သူတွေ သတိပြုဖို့ လည်း သတိပေးထားပါတယ်။
