သထုံမြို့တွင် လမ်းလျှောက်လာသူ အမျိုးသမီး ကားတိုက်မိပြီး သေဆုံး
DVB
·
July 14, 2017
သထုံမြို့နယ်၊ သုဝဏ္ဏဝတီမြို့၊ သိမ်ဆိပ်ရပ်ကွက်မှာ ဇူလိုင် ၁၃ ရက်နေ့၊ ညပိုင်းက မော်တော်ယာဉ်တစ်စီး ယာဉ်မောင်းအိပ်ငိုက်ရာမှ လမ်းဘေးမှာ လမ်းလျှောက်နေတဲ့ အမျိုးသမီးတဦးကို ၀င်တိုက်မိလို့ သေဆုံးသွားကြောင်း သိမ်ဆိပ်ရဲစခန်းက ပြောပါတယ်။
ရဲစခန်းတာဝန်ရှိသူတဦးက “ကားသမားက ဘုန်းကြီးကျောင်းရှေ့အရောက်မှာ ရုတ်တရက်အိပ်ငိုက်သွားလို့ လမ်းဘေးကလမ်းလျှောက်သွားတဲ့ အမျိုးသမီးကြီးကိုဝင်တိုက်ပြီး ကားကို လမ်းပေါ်ပြန်ဆွဲတင်တာ၊ နောက်ထပ်ဆိုင်ကယ်စီးလာတဲ့ ၂ ယောက်ကို အနောက်က နေထပ်တိုက်တာပါ။ ကားသမားကိုတော့ အမှုဖွင့်အရေးယူဆောင်ရွက်သွားမှာပါ"လို့ ပြောပါတယ်။
ဖြစ်စဉ်မှာ ဇူလိူင်လ ၁၃ ရက်နေ့၊ ည ၇ နာရီခွဲအချိန်ခန့်က သထုံမြို့နယ်၊ သုဝဏ္ဏဝတီမြို့၊ သိမ်ဆိပ်ရပ်ကွက်၊ ရန်ကုန်-မော်လမြိုင်ကားလမ်းမကြီး၊ အာသောကာရုံကျာင်းရှေ့အနီး၊ မိုင်တိုင်အမှတ် ၁၃၈/၄နှင့်၁၃၈/၅ကြားတွင် သထုံမြို့နယ်ဘက်က ယဉ်မောင်းကျော်နိုင် မောင်းနှင်လာတဲ့ ယာဉ်ဟာ လမ်းလျှောက်လာသူ ဒေါ်မြင့်သန်းကို ဝင်ရောက်တိုက်မိပြီး လမ်းမပေါ်ကို ပြန်ဆွဲတင်ချိန် အရှိန်မထိန်းနိုင်ဘဲ စိုးလွင်မောင်းနှင်ပြီး နောက်မှာ ကိုမျိုးလိုက်ပါလာတဲ့ ဆိုင်ကယ်နောက်ပိုင်းကို ဆက်လက်တိုက်မိခဲ့တာဖြစ်ပါတယ်။
ယာဉ်တိုက်မှုကြောင့် ဒေါ်မြင့်သန်းဟာ အခင်းဖြစ်နေရာမှာ သေဆုံးသွားပြီး စိုးလွင်နဲ့ ကိုမျိုးတို့မှာ ဒဏ်ရာများ အသီးသီးရရှိခဲ့တယ်လို့ သိရပါတယ်။
သိမ်ဆိပ်နယ်မြေရဲစခန်းက ကျော်နိုင်ကို ရာဇသတ်ကြီးပုဒ်မ ၃၀၄-က/၃၃၈/၃၃၇ နဲ့ အမှုဖွင့် အရေးယူထားတယ်လို့ သိရပါတယ်။
သတင်း-ယူမင်းစိုး