အင်းတော်ရဲတပ်ဖွဲ့က မူးယစ်ဆေးသတင်းအရ နေအိမ်ကို ဘယ်လို ၀င်ရောက်ဖမ်းဆီးခဲ့သလဲ (ရုပ်သံ)
DVB
·
June 19, 2017
စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ် မန်လည်ကျေးရွာရှိ နေအိမ်တလုံးမှာ ဇွန်လ ၁၈ ရက်နေ့ ညနေ ၆ နာရီလောက်က မူးယစ်ဆေးဝါးတွေ တွေ့ရှိ ဖမ်းဆီးရမိခဲ့တယ်လို့ အင်းတော်မြို့မရဲစခန်းမှူ ဒုရဲမှူး သက်တင်ဦးက ပြောပါတယ်။
ဇွန်လ ၁၈ ရက်နေ့ ညနေ ၅ နာရီ ၄၅ မိနစ်အချိန်က အင်းတော်မြို့မရဲစခန်းမှ နယ်ထိန်းခေါင်းဆောင် ဒုရဲအုပ်အောင်အောင်နဲ့ တပ်ဖွဲ့ဝင်တွေဟာ သက်သေတွေနဲ့အတူ မူးယစ်ဆေးဝါးသတင်းအရ မန်လည်ကျေးရွာနေ အောင်ကျော်ဆန်း နေအိမ်ကို မူးယစ်ဆေးဝါး ရှာဖွေဖမ်းဆီးခွင့် ဝရမ်းအမှတ် (၃၅/၂၀၁၇) နဲ့ ဝင်ရောက်ရှာဖွေခဲ့တာပါ။
ဝင်ရောက်ရှာဖွေရာ အိမ်ရှင်အောင်ကျော်ဆန်းမှာ နေအိမ်ပေါ်မှ ခုန်ချဆင်းပြီး နေအိမ်နောက်ဖေး အိမ်သာအတွင်း ပြေးဝင်သွားရာ လိုက်လံဖမ်းဆီးခဲ့ရပါတယ်။
အောင်ကျော်ဆန်း ဝတ်ဆင်ထားတဲ့ ပန်းရောင်ရှပ်အင်္ကျီ လက်တိုအိတ်ကပ်အတွင်းက ဘိန်းဖြူ ဖြူ/ဝါ စပ်ကြားမှုန့် (၀ ဒသမ ၂) ဂရမ်ခန့်ပါ ပလတ်စတစ်ဘူး ၁ ဘူး၊ ဘိန်းဖြူ ဖြူ/ဝါ စပ်ကြားမှုန့်တွေ ထည့်ထားတဲ့ အလေးချိန် (၀ ဒသမ ၁) ဂရမ် မီးခိုရောင် ဂတ်(စ်)မီးခြစ် အပိုင်းအပြတ် ၁ ခု၊ စုစုပေါင်း ဘိန်းဖြူ (၀ ဒသမ ၃) ဂရမ်ခန့် ကာလတန်ဖိုး ၃၀၀၀၀ ကျပ်ကို တွေ့ရှိသိမ်းဆည်းရမိခဲ့တယ်လို့ အင်းတော်မြို့မရဲစခန်းမှူး ဒုရဲမှူးသက်တင်ဦးက ပြောပါတယ်။
အင်းတော်မြို့နယ်၊ မန်လည်ကျေးရွာနေ မူးယစ်ဆေးဝါး လက်ဝယ်တွေ့ရှိသူ အောင်ကျော်ဆန်း (၃၈ နှစ်) ကို အင်းတော်မြို့မရဲစခန်းက မယ(ပ)၄၇/၂၀၁၇ မူးစိတ်ပုဒ်မ ၁၅/၁၆(ဂ) အရ အရေးယူ ဆောင်ရွက်နေတယ်လို့ ဆိုပါတယ်။
သတင်းရုပ်သံ - ကိုကိုလင်း(အင်းတော်)