မင်းကင်းတွင် အမျိုးသမီးတဦးအား နားရွက်နှစ်ဖက်ကို ဓားဖြင့်လှီးဖြတ်ပြီး နားကပ်လုယူ
DVB
·
June 16, 2017
ကလေးခရိုင် မင်းကင်းမြို့နယ် ပိတ်ချင်းတောရွာသူတဦးဟာ ဇွန် ၁၄ ရက်က နားရွက်နှစ်ဖက်အား ဓားနဲ့လှီးဖြတ်ခံရကာ နားကပ်လုယူခံခဲ့ရတယ်လို့ ကလေးခရိုင်ရဲတပ်ဖွဲ့က ပြောပါတယ်။
လုယက်ခံရသူ အမျိုးသမီးဟာ လယ်တောသွားပြီး ပြန်မလာလို့ ခင်ပွန်းဖြစ်သူက လယ်တောကို သွားရောက်လိုက်ကြည့်ရာမှ လယ်တောတဲနဲ့ အတောင် ၅၀ အကွာလောက်မှာ ဒဏ်ရာတွေနဲ့ အမျိုးသမီးကို တွေ့ခဲ့ရတာ ဖြစ်ပါတယ်။
လုယက်ခံရတဲ့ အမျိုးသမီးဟာ ပိတ်ချင်းတောကျေးရွာနဲ့ တမိုင်လောက်အကွာ လယ်တောမှာရှိတဲ့ တဲအနီးမှာ လုယက်ခံရတာဖြစ်ပြီး လုယက်မှုမှာ အမျိုးသမီးရဲ့ နားနှစ်ဖက်ကို ဓားနဲ့ လှီးဖြတ်ပြီး နားကပ်တရံကို ယူသွားခဲ့တာလို့ ရဲတပ်ဖွဲ့က ပြောပါတယ်။
လုယက်ခံရသူဟာ ဒေါ်မြင့်ရှိန်ဖြစ်ပြီး တန်ဖိုး ၂ သိန်းရှိ ကျောက်နီချယ် နားကပ်တရံ လုယက်သူထံ ပါသွားခဲ့ကာ လုယက်မှု ကျူးလွန်သူကိုတော့ ဖမ်းဆီးရမိခြင်းမရှိဘဲ စုံစမ်းဆဲဖြစ်ပြီး လုယက်ခံရမှုမှာ ပစ္စည်းယူရုံတင် မဟုတ်ဘဲ လူကိုပါ နှိပ်စက်မှုတွေ ပြုလုပ်ခဲ့တာကြောင့် ခန္ဓာကိုယ်ပေါ်မှာ ဒဏ်ရာ ၁၀ ချက်လောက် ရရှိခဲ့လို့ ဆေးကုသမှု ခံယူနေတယ်လို့ သိရပါတယ်။
လုယက်မှုနဲ့ ပတ်သက်ပြီး မင်းကယ်မြို့နယ် မောက္ကတော် နယ်မြေစခန်းမှာ ဒေါ်မြင့်ရှိန်ရဲ့ ခင်ပွန်းဖြစ်သူ ကိုယ်တိုင် အမှုဖွင့် တိုင်တန်းထားပြီး ရဲတပ်ဖွဲ့က ရာဇသတ်ကြီးပုဒ်မ-၃၉၄ နဲ့ အမှုဖွင့်ဆောင်ရွက်နေတယ်လို့ သိရပါတယ်။
အခုဖြစ်စဉ်မတိုင်ခင် ဇွန် ၁၀ ရက်နေ့ကလည်း မင်းကင်းမြို့နယ် မောက္ကတော်နယ်ထဲမှာ အမျိုးသမီးတဦး မုဒိမ်းကျင့် သတ်ဖြတ်ခံခဲ့ရပြီး အဲဒီ ဖြစ်စဉ်တွေက တရားခံတွေကို အမြန်ဖမ်းဆီးနိုင်ရေး ကလေးခရိုင် ရဲတပ်ဖွဲ့မှူးကိုယ်တိုင် ကြီးကြပ်ဆောင်ရွက်နေတယ်လို့လည်း သိရပါတယ်။
မင်းရဲစစ်နိုင်