ရန်ကုန်တိုင်းဒေသကြီးနှင့် ရခိုင်ပြည်နယ်မှာ ယခုနှစ် သွေးလွန်တုပ်ကွေးရောဂါ အဖြစ်များ
DVB
·
June 10, 2017
အခုနှစ် သွေးလွန်တုပ်ကွေးရောဂါ ဖြစ်ပွားတာဟာ ရန်ကုန်တိုင်းဒေသကြီးက အများဆုံး ဖြစ်နေပြီး ရခိုင်ပြည်နယ်မှာ ဒုတိယအများဆုံး ဖြစ်ပွားနေတယ်လို့ ရန်ကုန်တိုင်း ပြည်သူ့ကျန်းမာရေးဦးစီးဌာနက ဇွန် ၉ ရက်နေ့မှာ သတင်းစာရှင်းလင်းပွဲ ပြုလုပ် ပြောဆိုသွားပါတယ်။
လက်ရှိအချိန်ထိ ရန်ကုန်တိုင်းမှာ သွေးလွန်တုပ်ကွေးရောဂါ ဖြစ်ပွားသူဦးရေ ၁၄၀၀ ကျော် ရှိနေပြီး ရခိုင်ပြည်နယ်မှာတော့ ရောဂါဖြစ်ပွားသူဦးရေ ၄၀၀ ကျော် ရှိနေတာ ဖြစ်ပါတယ်။
ရန်ကုန်တိုင်းဒေသကြီးမှာ သွေးလွန်တုပ်ကွေးရောဂါကြောင့် သေဆုံးသူဦးရေဟာ မနှစ်ကထက် ၂ ဆမြင့်တက်နေပြီး သေဆုံးသူဦးရေ ၉ ဦးထိ ရှိနေတာပါ။ သေဆုံးသူ အများစုဟာ အသက် ၅ နှစ်က ၉ နှစ်အရွယ် ကလေးငယ်တွေ ဖြစ်ပါတယ်။
သွေးလွန်တုပ်ကွေးရောဂါဟာ အသက်အရွယ်မရွေး ဖြစ်ပွားနိုင်ပြီး အသက် ၁၅ နှစ်အောက် အရွယ်တွေမှာ ပိုပြီး အဖြစ်များပါတယ်။
လက်ရှိ ရန်ကုန်တိုင်းဒေသကြီးမှာ သွေးလွန်တုပ်ကွေးရောဂါဟာ ဆိပ်ကြီးခနောင်တို မြို့နယ်မှာ အများဆုံး ဖြစ်နေပြီး လှိုင်သာယာ၊ တောင်ဒဂုံ၊ သာကေတ၊ ဒေါပုံ၊ ဒလ စတဲ့ မြို့နယ်တွေမှာလည်း အဖြစ်များနေတယ်လို့ ဆိုပါတယ်။