ကျောက်မဲမြို့တွင် ဂက်စ်ဘူးငယ်ပေါက်ကွဲမှု ဖြစ်ပွား
နန်းမြနဒီ
·
April 19, 2017
ရှမ်းပြည်မြောက်ပိုင်း ကျောက်မဲမြို့ပေါ်မှာ မနေ့ မွန်းလွဲပိုင်းက ဂက်စ်ဘူးပေါက်ကွဲမှု ဖြစ်ပွားခဲ့ပြီး လူတွေတော့ ထိခိုက်ဒဏ်ရာရတာ မရှိဘူးလို့ ကျောက်မဲမြို့မရဲစခန်းက ပြောပါတယ်။
ဧပြီ ၁၈ ရက် နေ့လယ် ၁၂ နာရီကျော်က မင်းလမ်းမကြီးပေါ်ရှိ ကောင်းကောင်းစားသောက်ဆိုင်ရှေ့မှာ ရပ်ထားတဲ့ ပစ်ကပ်ကားတစီးပေါ်ကနေ ဂက်စ်ဘူးပေါက်ကွဲတာလို့ ကျောက်မဲမြို့မရဲစခန်း တာဝန်ကျရဲဝန်ထမ်းတဦးက ဒီဗွီဘီကို ပြောပါတယ်။
“ကားပေါ်တင်ထားတဲ့ ဂက်စ်ဘူးကနေပြီးတော့မှ ပေါက်တာပါ။ ဟိုလိုမျိုး ကျနော်တို့ မီးဖိုချောင်မှာသုံးတဲ့ ဂက်စ်ဘူးအသေးလေးတွေပေါ့။ ဘာကြောင့်လဲဆိုတော့ နေအပူရှိန်ကြောင့်ပေါ့။ ကားက နေပူထဲမှာ ရပ်ထားတာလေ၊ သူတို့က အိမ်သုံးတဲ့ဂက်စ်သွားဖြည့်ပြီး ပြန်လာရင်းနဲ့ ရပ်ထားတော့ ပေါက်သွားတယ်။ ထိခိုက်ဒဏ်ရာရတဲ့လူလည်း မရှိဘူး၊ ပျက်စီးဆုံးရှုံးမှုလည်း မရှိပါဘူး။ ဘူးသေးဆိုတော့ ပြင်းထန်မှုမရှိဘူးပေါ့၊ ကားနောက်ခန်းမှာ အမိုးလည်းမရှိဘူးလေ၊ အသံပဲထွက်တာပေါ့။”
အဲဒီပေါက်ကွဲမှုနဲ့ ပတ်သက်ပြီး အမှုဖွင့်အရေးယူတာလည်း မရှိဘူးလို့ ရဲစခန်းက ပြောပါတယ်။