အသည်းရောဂါ ဘီပိုး၊ စီပိုးဝေဒနာရှင်များ အိန္ဒိယဘက် ထွက်ခွာကုသမှုများလာ
DVB
·
April 3, 2017
အိန္ဒိယနယ်စပ်နဲ့ ကပ်နေတဲ့ မြန်မာနိုင်ငံမြို့တွေမှာနေထိုင်တဲ့ အသည်းရောဂါ၊ ဘီပိုး၊ စီပိုး ဝေဒနာရှင်တွေ အနေနဲ့ ပြည်တွင်းမှာ ဆေးကုသစရိတ် ဆေးဝါးစရိတ် များပြားနေတာကြောင့် အိန္ဒိယနယ်စပ်မြို့ မိုးရေးဒေသကို သွားရေ ကုသသူတွေ များပြားလာတယ်လို့ သိရပါတယ်။
အသည်းရောဂါကို ကုသပေးနေတဲ့ ဆေးခန်းက အိန္ဒိယနိုင်ငံ မိုးရေးမြို့ထဲမှာ ရှိပြီး LIC ဆေးခန်းဆိုပြီး လူသိများတဲ့ ဆေးခန်းတခု ဖြစ်ပါတယ်။
အိန္ဒိယနိုင်ငံ မိုးရေးမြို့ကို ဆေးသွားကုခဲ့တဲ့ ဒေါ်အုန်းက“ပထမတော့ မန္တလေး ဆေးရုံတခုမှာ သွားစစ်တယ်။ စီပိုး တွေ့တယ်။ ဆေးကုရင် သိန်း ၇၀ လောက်တော့ အနည်းဆုံးကုန်မယ် ပြောတယ်။ အဲဒါနဲ့ မတတ်နိုင်လို့ မကုဘဲ ပြန်လာပြီး ဗမာဆေးလေးတွေ စားနေတာ။ အဲဒါပြီး ဆေးကုဖို့ စုံစမ်းရင်း ကလေးဝက သူငယ်ချင်းတယောက်နဲ့ တွေပြီး အဲဒီ သွားကုတာ စုစုပေါင်း ဆေးစရိတ် သွားလာစရိတ် စားစရိတ်နဲ့ဆို ၁၀ သိန်းလောက်တော့ ကုန်တယ်။ သုံးလ လေးခါ သွားရတယ်။ ခု ကျမမှာ စီပိုးမရှိတော့ဘူး။ သုံးလနဲ့ ပြတ်သွားတယ်” လို့ ပြောပါတယ်။
နန်းဖာလုံနယ်စပ်ဂိတ် ရောက်တာနဲ့ မြန်မာဘက်အခြမ်းမှာ ကားရပ်ထားခဲ့ပြီး ဆေးခန်းရှိရာနေရာကို ခြေကျင်ခရီးနဲ့ သွားနိုင်တယ်လို့လည်း သိရပါတယ်။
ဘီပိုး၊ စီပိုးရောဂါ ဝေဒနာရှင်တွေကို ကူညီပေးနေတဲ့ ကလေးဝမြို့နေ မဇာက “ကျမတို့ လူစုပြီး ကားငှားသွားကြတယ်။ ကလေးဝကနေ အဲဒီအထိ အသွားအပြန် ၁ သောင်းကုန်တယ်။ အဲဒီဆေးခန်းရောက်တော့ ကျမက ဘာသာပြန်ပေးတယ်။ အဲဒီဆေးခန်းက ဆရာဝန်တွေက အိန္ဒိယစကားအပြင် မီဇိုးချင်းစကားလည်း တတ်တော့ အဲဒီစကားနဲ့ပဲ ပြောတယ်။ အခုဆို ကျမ ကူညီခဲ့တာ ကလေးဝမှာတင် အခေါက်ရေ ၅ ခေါက်ရှိနေပြီ။ လူကလည်း ၃၀ လောက်ရှိနေပြီ” လို့ ပြောပါတယ်။
ကလေးဝမြို့မှာ အသည်းရောဂါ၊ ဘီပိုး၊ စီပိုး ဖြစ်ပွားမှုများပြားနေတဲ့ သဘောရှိနေပြီး ဒေသခံတချို့ကတော့ ရေမသန့်တာကြောင့်လို့ ထင်မြင်ယူဆနေပြီး စီပိုးကူးစက်မှုဟာ ရေကြောင့် ဖြစ်ပွားတာမဟုတ်ဘဲ သွေးကတဆင့်သာ ကူးစက်နိုင်တာဖြစ်ကြောင်း လိင်ဆက်ဆံခြင်း၊ သွေးထိခြင်း၊ ဆေးထိုးအပ်တို့ကလည်း ကူးနိုင်ကြောင်း ဆေးဘက်ဆိုင်ရာ ဒေါက်တာခင်မောင်မြင့်က ပြောပါတယ်။
အိန္ဒိယနယ်စပ်နားက ကလေး၊ ကလေးဝ မြို့တွေသာမကပဲ ရန်ကုန်၊ မန္တလေး၊ မြစ်ကြီးနား၊ ကောင့်သောင်း၊ စတဲ့မြို့တွေဆီက ဘီပိုး၊ စီပိုး ဝေဒနာရှင်များပါ အိန္ဒိယနိုင်ငံ မိုးရေးမြို့က အိုင်စီတီ ဆေးခန်းမှာ လာရောက်ကုသနေပြီး အိုင်စီတီဆေးခန်းမှာ လစဉ် ရာချီတဲ့ ဝေဒနာရှင်တွေကို ကုသပေးနေရတယ်လို့လည်း ဆေးကုသမှု ခံယူနေသူတွေထံက သိရပါတယ်။
သတင်း - မင်းရဲစစ်နိုင်