မောင်တော ရဲတပ်ဖွဲ့ဝင်များကို လုံးထွေးသတ်ပုတ်ပြီး သေနတ်များ လုယူထွက်ပြေး
DVB
·
March 12, 2017
မောင်တောမြောက်ပိုင်း နယ်မြေ ၂ အောင်ဇူကျေးရွာမှာ မတ် ၁၁ ရက်နေ့ ညနေလေးနာရီလောက်က မသင်္ကာဖွယ်တွေ့တဲ့ လူ ၅ ဦးအား ရဲစခန်းမှာ ခေါ်ယူစစ်ဆေးနေတုန်း ရဲတပ်ဖွဲ့ဝင်တွေကို လုံးထွေးသတ်ပုတ်ပြီး သေနတ် သုံးလက်လုယူသွားခဲ့ပါတယ်။
ဆိုင်ကယ် ၅ စီးနဲ့ လာတဲ့ ဒိုင်းနက်လူမျိုး ၅ ဦး သယ်ဆောင်လာတဲ့ ဆာလာအိတ်နဲ့ ကျောပိုးအိတ်တွေကို အောင်ဇူရဲကင်းမှူးနဲ့ အဖွဲ့က ရှာဖွေစစ်ဆေးတဲ့အခါ ဘီယာဘူး၊ ဆားကစ်ပြားနဲ့ ရီမုကွန်ထရိုးတွေကို တွေ့ရှိလို့ ရဲစခန်းကို ခေါ်ယူစစ်ဆေးခဲ့တာပါ။
ရဲတပ်ဖွဲ့ဝင် ၅ ဦးအား လုံးထွေးသတ်ပုတ်ပြီး ကျည်အိမ်နဲ့ ကျည်မပါတဲ့ ဘီအေ ၉၄ သေနတ် ၂ လက်၊ ကျည်အိမ်နဲ့ ကျည် ၁၅ တောင့်ပါတဲ့ ဘီဘေ ၆၃ တစ်လက်ကို လုယူပြီး ထွက်ပြေးသွားခဲ့တာပါ။
"ထွက်ပြေးသွားသူတွေနောက်ကို နယ်ခြားစောင့်ရဲတပ်ဖွဲ့နဲ့ ခမရ ၅၃၆ တို့က လိုက်လံရှာဖွေတဲ့အတွက် ဘီအေ ၉၄ သေနတ် ၂ လက်ကို ရေမြောင်းထဲက ပြန်ရထားပါတယ်" လို့ လုံခြုံရေးအရာရှိတစ်ဦးက ပြောပါတယ်။
ထွက်ပြေးသွားသူ ၅ ဦးဟာ မြန်မာဘင်္ဂလားဒေ့ရှ် နယ်ခြား မိုင်တိုင် ၄၃ ကနေ ဘင်္ဂလားဒေ့ရှ် နိုင်ငံဘက်ကို ထွက်ပြေးသွားတယ်လို့ ယူဆထားပြီး ဖမ်းဆီးရမိဖို့အတွက် ဘင်္ဂလားဒေ့ရှ် နယ်ခြားစောင့်တပ်ဖွဲ့ကို အကူအညီတောင်းထားတယ်လို့ သိရပါတယ်။
မောင်တောခရိုင်ထဲမှာ အကြမ်းဖက်မှုတွေ ထပ်မံဖြစ်ပွားလာနိုင်တယ်လို့ ရခိုင်ပြည်နယ်အစိုးရအဖွဲ့က သတိပေးထားပြီး လုံခြုံရေးတိုးမြှင့်ဆောင်ရွက်ဖို့ ညွှန်ကြားထားတဲ့အချိန်မှာ အခုလို သေနတ်လုယူခံရတာဖြစ်ပါတယ်။