မိုးညှင်းမြို့ မြို့ရှောင်လမ်းအနီး ဥယျာဉ်ခြံတွင် မိုင်းတွေ့ရှိ
DVB
·
March 7, 2017
ကချင်ပြည်နယ်၊ မိုးညှင်းမြို့ မြို့ရှောင်လမ်းအနီး၊ အောင်သပြေအုပ်စု ဥယျာဉ်ခြံမှာ မိုင်းတလုံး တွေ့ရှိခဲ့တယ်လို့ မိုးညှင်းရဲစခန်းမှ သိရပါတယ်။
ဖြစ်စဉ်မှာ မတ်လ ၅ ရက်နေ့ ညနေ ၂ နာရီခန့်မှာ အောင်သပြေ ရပ်ကွက်အုပ်ချုပ်ရေးမှူး ဦးနော်လာမှ အောင်သပြေအုပ်စု၊ မြို့ရှောင်လမ်းအနီး ဥယျာဉ်ခြံအတွင်း မိုင်းတွေ့ရှိတယ်လို့ အကြောင်းကြားလာတာကြောင့် ဒုခရိုင် ရဲတပ်ဖွဲ့မှူး ရဲမှူးမြင့်ဝေ၊ ခရိုင်မှုခင်းနှိမ်နှင်းရေးမှ ရဲအုပ်မြင့်သူနဲ့အဖွဲ့၊ မြို့မ ရဲစခန်းမှူးနဲ့အဖွဲ့တို့က သွားရောက်စစ်ဆေးခဲ့ကြပါတယ်။
မိုးညှင်းမြို့ အောင်သပြေရပ်နေသူ ဦးခင်မောင်အေးက မိုင်းစတင်တွေ့ရှိပြီး မြစ်ကြီးနား-မန္တလေး ကားလမ်းမကြီး၊ မိုးညှင်းမြို့ရှောင်လမ်း အရှေ့ဘက် ၁ မိုင်ခန့်က ဥယျာဉ်ခြံမှာ မနက် ပေါင်းနုတ်ရှင်းလင်းရာက ပြန်လာချိန်မှာ ဒေါ်နန်တောင် ပိုင်ဥယျာဉ်အတွင်းမှာ မီးလောင်ထားတဲ့ နှစ်ပင်လိမ်အဝါရောင် ဝါယာကြိုး ၃ ပေခန့် တပ်ဆင်လျက် ကြွပ်ကြွပ်အိတ် အနက်ရောင်နဲ့ ပတ်ထားတဲ့ အရှည် ၉ လက်မ၊ လုံးပတ် ၈ လက်မ ခန့် မိုင်းတလုံး တွေ့ရှိခဲ့တာကြောင့် သစ်ရွက်တွေနဲ့အုပ်ထားခဲ့ပြီး သားဖြစ်သူမှတဆင့် အုပ်ချုပ်ရေးမှူး ဦးနော်လာဆီကို သတင်းပေးပို့ခဲ့တာပါ။
မိုင်းတွေ့ရှိရာနေရာကို တာဝန်ရှိသူတွေက စစ်ဆေးပြီး ညနေ ၅ နာရီမှာ ခလရ (၁၅) မှ တပ်ရေးဗိုလ်ကြီးက ၉၀၄ တပ်နယ်ကို သတင်းပေးပို့ခဲ့ပြီး ၎င်းမှတဆင့် မပခ ကို အကြောင်းကြားပြီး မိုင်းကို ပေါက်ကွဲမှုမဖြစ်အောင် ဆောင်ရွက်ရမှာ ဖြစ်တယ်လို့ သိရပါတယ်။
သတင်း - မုန်းမုန်းမင်း