YBS စနစ် အခြားနိုင်ငံများထက် သာစေရမည်ဟု ၀န်ကြီးချုပ် ဦးဖြိုးမင်းသိန်း ကတိပြု
DVB
·
February 18, 2017
မထသကိုဖျက်သိမ်းပြီး ဇန်နဝါရီ ၁၆ ရက်ကစတင်ခဲ့တဲ့ YBS စနစ်တလပြည့်ပြီး နောက်ပိုင်းမှာ ခရီးသည်တွေအနေနဲ့ အခက်အခဲတွေ ဆက်လက်ဖြစ်ပေါ်နေပေမယ့် ရန်ကုန်တိုင်းဝန်ကြီးချုပ် ဦးဖြိုးမင်းသိန်းက YBS စနစ်ဟာ အခြားနိုင်ငံတွေရဲ့ သယ်ယူပို့ဆောင်ရေး စနစ်တွေထက် သာစေရမယ်လို့ ကတိပြုပြောကြားလိုက်ပါတယ်။
ဖေဖော်ဝါရီ ၁၇ ရက်က ရန်ကုန်တိုင်းဒေသကြီး အစိုးရအဖွဲ့ ရုံးမှာ ပြုလုပ်တဲ့ YBS နဲ့ ဆက်စပ်တဲ့ သတင်းစာရှင်းလင်းပွဲမှာ မီဒီယာတွေကို ပြောခဲ့တာပါ။
“ကျနော်တို့အားလုံး အားသာချက်တရပ်က နောက်ကျခြင်းရဲ့ နောက်ဆုံးအခွင့်အလမ်းပါပဲ။ အဲဒါက ဘာလဲဆိုတော့ နောက်ဆုံးနည်းပညာအားလုံးကို ကျနော်တို့က ယူပြီးတော့ သုံးစွဲသွားမှာဖြစ်ပါ တယ်။ တချို့နိုင်ငံတွေမှာ ကတ်စနစ်ဟာ ကျနော်တို့ အခုကျင့်သုံးမယ့် ကတ်စနစ်လောက် ကောင်းချင်မှ ကောင်းပါလိမ့်မယ်။ ဘတ်စ်အော်ပရေတာတွေပေါ်မှာ တပ်ဆင်ထားတဲ့ စနစ်ကလည်း ကျနော်တို့ အသုံးပြုမယ့် စနစ်လောက် ကောင်းချင်မှ ကောင်းပါလိမ့်မယ်။ ဘာကြောင့်လဲဆို ကျနော်တို့ဟာ နောက်ကျခဲ့တယ်။ ဒီအတွက် အကောင်းဆုံး အခွင့်အလမ်းတခုကို ရယူသုံးစွဲဖို့ ကျနော်တို့ ပြင်ဆင်သွား မှာ ဖြစ်ပါတယ်။” လို့ ဦးဖြိုးမင်းသိန်းက ပြောပါတယ်။
လက်ရှိပြေးဆွဲနေတဲ့ မော်ဒယ်နိမ့် ဘတ်စ်ကားတွေကို ၃ လအတွင်း ဘတ်စ်ကား အသစ်တွေနဲ့ အစားထိုး ပြေးဆွဲသွားမှာ ဖြစ်သလို နောက်ဆုံးပေါ်ယာဉ်စီးခ ကတ်စနစ်နဲ့ အပြင် ပြေးဆွဲနေတဲ့ ဘတ်စ်ကားတွေအားလုံးကို စက်တခုတည်းနဲ့ ထိန်းချုပ်သွားမှာလို့ ဝန်ကြီးချုပ်က ဆိုပါတယ်။
ဒါ့အပြင် ယာဉ်ကြောကြပ်တည်းမှုကို ဖြေရှင်းဖို့အတွက် water taxi လုပ်ငန်းကို မေလမှာ စတင်အကောင်အထည် ဖော်ဆောင်ရွက်သွားမှာဖြစ်ပြီး လက်ရှိမှာလည်း ကုမ္မဏီတခုကို လုပ်ကိုင်ခွင့် ချပေးထားကြောင်း ဦးဖြိုးမင်းသိန်းက ပြောပါတယ်။
“ဘတ်စ်ကားတွေကို ကျနော်တို့က အမှတ်ပေးစနစ် တပ်ဆင်သွားမှာဖြစ်ပါတယ်။ နောက်ပိုင်းမှာ ဘယ်ယာဉ်လိုင်းနံပါတ်တွေက ဧပြီမှာ ကျနော်ပြောခဲ့တဲ့ အဆင့်သုံးဆင့်လုပ်ပါမယ်။ ကုမ္ပဏီတွေထူထောင်မယ်၊ ဘတ်စ်ကားတွေ အဆင့်မြှင့်မယ်။ နောက်တချက်ကတော့ ကျနော်တို့ အော်ပရေတာ တခုကနေ ဘတ်စ်ကားတွေအကုန်လုံးကို ကျနော်တို့ မြင်ကွင်းထဲမှာပဲ ရှိနေရမယ်။ ဒီအတွက် သူတို့ဟာ မကိုက်ဘူး၊ မထွက်ဘူးဆိုတာ မရှိစေရဘူး။ ကျနော်တို့ ချုပ်ထားမယ်။ နောက်တခုက ပိုက်ဆံကို ကိုယ်စီးသလောက်ပဲ ကျတဲ့စနစ်မျိုး အဆင့်ကို ကျနော်တို့ တက်လှမ်းမယ်။”
ရန်ကုန်တိုင်းဒေသကြီး အစိုးရသစ် အကောင်အထည်ဖော် ဆောင်ရွက်ခဲ့တဲ့ အများပြည်သူ သယ်ယူပို့ဆောင်ရေး ယာဉ်လိုင်းစနစ်သစ်ဟာ လက်ရှိမှာ အချိန်တလကျော် ကြာမြင့်တဲ့အထိ ကားစီးရေ မလုံလောက်တဲ့ ပြဿနာကြောင့် ခရီးသွားပြည်သူတွေအတွက် အခက်အခဲ ရှိနေပါသေးတယ်။