တရားဥပဒေစိုးမိုးရေး၊ YBS ယာဉ်မောင်း၊ အကျင့်ဟောင်းများနဲ့ စည်းကမ်းထိန်းသိမ်းလိုက်နာရေး
DVB
·
February 16, 2017
ပြီးခဲ့တဲ့လ နောက်ဆုံးပတ်ထဲမှာ လုပ်ငန်းကိစ္စတခုအတွက် မြန်မာနိုင်ငံကို ခေတ္တပြန်ဖြစ်ခဲ့ပါတယ်။ ၁၀ ရက်လောက်သာကြာတဲ့ ခရီးစဉ်အတောအတွင်းမှာ မြန်မာနိုင်ငံရဲ့ မျက်မှောက်အခြေအနေတွေကို နီးနီးကပ်ကပ် ထိတွေ့ခွင့်ရခဲ့ပါတယ်။
တိုင်းပြည်ရဲ့ နိုင်ငံရေး၊ စီးပွားရေး၊ လူမှုရေး ဘဝအထွေထွေ အခြေအနေတွေထဲက နိုင်ငံတော်အဆင့် တရားဥပဒေစိုးမိုးရေးနဲ့ ရန်ကုန်မြို့ရဲ့ အများပြည်သူ ခရီးသွားလာရေး စနစ်လို့ ဆိုတဲ့ YBS ရဲ့ စည်းကမ်းထိန်းသိမ်းလိုက်နာမှု အားနည်းနေရတဲ့အကြောင်း ဒီဆောင်းပါးမှ ဆွေးနွေးကြည့်ရအောင်။
ပထမအချက်ဖြစ်တဲ့ တရားဥပဒေစိုးမိုးမှု မရှိတာကတော့ အားလုံး သိကြတဲ့အတိုင်း အလွန်အားနည်းနေတယ်ဆိုတာ နေ့ခင်းကြောင်တောင် နိုင်ငံ့အဝင်တံခါးဝဖြစ်တဲ့ လေယာဉ်ကွင်းအထွက် လူမြင်ကွင်းမှာ တိုင်းပြည်ရဲ့ အာဏာရပါတီကြီးရဲ့ ဥပဒေအကြံပေး ပညာရှင်တယောက်ဟာ သေနတ်နဲ့ အနီးကပ်တေ့ပြီး လုပ်ကြံသတ်ဖြတ်ခံရတာက သက်သေ ထင်ထင်ရှားရှားပြနေတယ် မဟုတ်လား။
နိုင်ငံတနိုင်ငံမှာမှာ တရားဥပဒေကို လေးစားလိုက်နာမှု မရှိဘူး၊ တရားဥပဒေ အထက်မှာ လူတချို့က အခွင့်ထူးခံနိုင်ပြီး ဥပဒေအထက်မှာ နေနိုင်မယ်၊ ရာဇ၀တ်မှု ကျူးလွန်နေသူတွေ၊ ဥပဒေချိုးဖောက်နေသူတွေကိုလည်း မြန်မြန် ထိထိရောက်ရောက် အရေးမယူနိုင်ဘူး၊ တရားဥပဒေမစိုးမိုးဘူးဆိုရင် အဲဒီနိုင်ငံရဲ့ ဖွဲ့စည်းအုပ်ချုပ်ပုံ အခြေခံဥပဒေဟာ သွက်သွက်ခါအောင် မှားယွင်းနေပြီဆိုတာ ညွှန်ပြနေတာ ဖြစ်သလို အမြန်ဆုံး မဖြစ်မနေ ပြင်ဆင်ဖို့ လိုပါတယ်။ အဲဒီဖွဲ့စည်းပုံအခြေခံဥပဒေကို ပြင်ဆင်ဖို့ အချိန်ကြာတာနဲ့အမျှ တိုင်းပြည်အတွက် ဆုံးရှုံးမှု ကြီးမားလေလေပါပဲ။ ပြီးတော့ အဲဒီဥပဒေအထက်မှာ နေသူတွေ အပါအဝင် ဘယ်နိုင်ငံသားရဲ့ဘဝမှ ရေရှည်ခံမယ့် လုံခြုံမှုလည်း မရှိနိုင်ပါဘူး။
ဆိုလိုရင်းကတော့ နိုင်ငံတနိုင်ငံမှာ မငြိမ်းချမ်းဘူး၊ အကြမ်းဖက် အဖြေရှာနေကြ တယ်၊ တရားဥပဒေ မစိုးမိုးဘူး၊ စိုးမိုးအောင်လည်း ထိထိရောက်ရောက် မဆောင်ရွက်နိုင်ဘူး ဆိုရင် အဲဒီနိုင်ငံရဲ့ စီမံခန့်ခွဲ အုပ်ချုပ်မှုစနစ် (Management System) ကို ဖော်ညွှန်းနေတဲ့ ဖွဲ့စည်းပုံအခြေခံဥပဒေဟာ အခြေခံအားဖြင့် မှားယွင်းနေတယ်ဆိုတာ အားလုံး ရှင်းရှင်းလင်းလင်း သဘောပေါက်နိုင်ဖို့ပါပဲ။
နောက်တချက်ကတော့ အရင်စစ်အစိုးရတွေခေတ်မှာ နာမည်ဆိုးနဲ့ ကျော်ကြားခဲ့တဲ့ “မ.ထ.သ” လို့ အတိုကောက်ခေါ်ကြတဲ့ “မြို့တွင်းသယ်ယူပို့ဆောင်ရေး ကြီးကြပ်ရေးအဖွဲ့”ကို လက်ရှိ ရန်ကုန်တိုင်း အစိုးရက ဖျက်သိမ်းပြီး အများပြည်သူ ခရီးသွားလာရေးစနစ်သစ်တရပ် ဖြစ်တဲ့ YBS ကို ထူထောင်ခဲ့ရာမှာ ယာဉ်မောင်းတွေရဲ့ စည်းကမ်းလိုက်နာမှု အားနည်းနေတာကို ဘယ်လို ပြုပြင်သင့်သလဲဆိုတာ အားလုံး ဝိုင်းစဉ်းစားနိုင်အောင် ရေးသားလိုက်ပါတယ်။
ခရီးသွား အများပြည်သူတွေရဲ့ အကျိုးစီးပွားကို ဦးထိပ်မထားတဲ့အပြင် ခရီးသည်ဝန်ဆောင်မှုပေးရာမှာ ရုပ်ပျက်ဆင်းပျက် နာမည်ဆိုးရှိတဲ့ “မ.ထ.သ” အဖွဲ့ကို ဖျက်သိမ်းပြီး “YBS” ဆိုတဲ့ အများပြည်သူ ခရီးသွားလာရေးစနစ်ကို တည်ထောင်ခဲ့တဲ့ ရည်ရွယ်ချက်နဲ့ စိတ်စေတနာတွေ ကောင်းမွန်တာကြောင့် စတင်ပြောင်းလဲတော့ ပြည်သူ အများအပြားက လက်ခံကြိုဆိုကြပြီး အင်တိုက်အားတိုက် ၀ိုင်းဝန်းကူညီခဲ့ကြပါတယ်။
တရားဝင်မှတ်ပုံတင်ထားတဲ့ ဘတ်စ်ကား အစင်းရေ ၄ ထောင်ကျော်အပြင် တရားမဝင် ပြေးဆွဲနေတဲ့ ဘတ်စ်ကားအစီး အရေအတွက် ထောင်ချီရှိနိုင်တဲ့ “မ.ထ.သ” လို့ခေါ်တဲ့ မြို့တွင်းသယ်ယူပို့ဆောင်ရေး ကြီးကြပ်ရေးအဖွဲ့ရဲ့ ယာဉ်လိုင်းပေါင်း ၃၀၀ ကျော်ကို ဖျက်သိမ်းပြီး ယာဉ်လိုင်းအသစ် ၅၀ ကျော်နဲ့ စခဲ့ရာက အခုဆို ယာဉ်လိုင်း ၇၀ ကျော်နဲ့ ပြေးဆွဲနေတဲ့ အများပြည်သူ သယ်ယူပို့ဆောင်ရေးစနစ်သစ် (YBS) ရဲ့ အဓိက အခက်အခဲ တခုကတော့ အရည်အသွေးပြည့်မီတဲ့ ဘတ်စ်ကားအရေအတွက် မလုံလောက်ခြင်း ဆိုတဲ့ အချက်က ထင်ရှားလှပါတယ်။ အထူးသဖြင့် လူစီးများတဲ့ ရုံးဆင်းရုံးတက် မနက်နဲ့ ညနေပိုင်းတွေမှာ အခေါက်ရေ ပိုမိုထည့်သွင်းပြေးဆွဲပေးဖို့ အခက်အခက်ရှိပုံရပါတယ်။
နောက်တချက်က စနစ်သစ်နဲ့ ပြေးဆွဲတာ တပတ်ကျော်အကြာမှာ အရင် အကျင့်ဟောင်းတွေနဲ့ “YBS” ယာဉ်မောင်းတွေရဲ့ လမ်းစည်းကမ်း၊ ယာဉ်စည်းကမ်း၊ ယာဉ်မောင်းစည်းကမ်းနဲ့ ကျင့်ဝတ်တွေ လိုက်နာဖို့ သိသိသာသာ ပျက်ကွက်ခဲ့ပြီး အရင်လို စည်းပျက်ကမ်းပျက် လုပ်ဆောင်လာတဲ့အခြေအနေဟာ… ကောင်းလာလိမ့်မယ်လို့ မျှော်လင့်ထားတဲ့ အများပြည်သူတွေ ပြန်လည်စိတ်ပျက်သွားခဲ့ရတဲ့ အရင်းခံ အကြောင်းတရားတွေကတော့ စည်းကမ်းထိန်းသိမ်းမှု ကြပ်မတ်ဆောင်ရွက်ရေး အားနည်းချက်ကို ဖြစ်ပေါ်စေတဲ့ နိုင်ငံရေးအားပြိုင်မှု၊ အပြောင်းအလဲကို မလိုက်ပါလိုမှု၊ စီမံအုပ်ချုပ်ပုံစနစ် လျော့ရဲမှု၊ အတွေ့အကြုံအားနည်းမှု စတဲ့အချက်တွေဆိုတာ လူတိုင်း မြင်သာပါတယ်။
YBS စနစ်ကို ပြောင်းစမှာတော့ ယာဉ်မောင်းတွေ၊ ယာဉ်နောက်လိုက်တွေ စည်းကမ်း အတော်အတန် လိုက်နာကြပါသေးတယ်။ စီမံအုပ်ချုပ်ပုံစနစ် အားနည်းတဲ့အခါမှာ တပတ်ကျော်လာတော့ အရင်တုန်းကလိုပဲ မှတ်တိုင်တွေမှာ အကြာကြီး ရပ်လာတယ် ယာဉ်နှစ်ထပ်ရပ်ပြီး အတင်အချ လုပ်လာတယ်။ မှတ်တိုင်မဟုတ်တဲ့ နေရာတွေမှာ ရပ်တယ်၊ ပြိုင်မောင်းတယ်၊ မီးပွိင့်မှာ အတင်အချလုပ်တယ်၊ ဟွန်းတွေ အရမ်းတီးတယ်၊ အရင်အတိုင်း ဖြစ်လာတာ တွေ့ကြရပါတယ်။
တကယ်တော့ အကျင့်ဟောင်းကို မစွန့်လွှတ်နိုင်ကြလို့ စည်းကမ်းမရှိကြတာရယ်၊ အကျင့်ဟောင်းကို စွန့်ချင်ပေမယ့် စွန့်လွှတ်နိုင်ဖို့ အခြေအနေတွေ ဖြစ်တည် ပြည့်စုံမလာသေးတာကြောင့် စည်းကမ်းကို တန်ဖိုးမထားတတ်တာ၊ စည်းကမ်း မလိုက်နာနိုင်သေးတာဟာ YBS ယာဉ်မောင်းတွေသာ မဟုတ်ပါဘူး။ တပြည်လုံးက အုပ်ချုပ်ရေးအာဏာပိုင်တွေ၊ မြန်မာပြည်တနံတလျားက သာမန် ပြည်သူလူထုတွေ အပါအဝင် အစိုးရဝန်ထမ်းတွေ၊ ကုမ္ပဏီဝန်ထမ်းတွေထဲက အများစုဟာ စည်းကမ်းလိုက်နာမှု၊ ဥပဒေလေးစားမှု စတဲ့ အကျင့်ကောင်းတွေ အားနည်းနေသေးတယ် ဆိုတာ ထင်ထင်ရှားရှား မြင်တွေ့နေရဆဲ ဖြစ်ပါတယ်။
မကောင်းတဲ့အကျင့်တွေ၊ စည်းကမ်းချိုးဖောက်မှုတွေကို ဘယ်လို ပြင်နိုင်မလဲဆိုတာ မဆွေးနွေးခင်အမှာ အင်္ဂလိပ်လို (Habit) မြန်မာလို အကျင့်အထုံနဲ့ ပတ်သက်တာလေး ပြောပြချင်ပါတယ်။ ဘယ်လိုလူမျိုးမှ မွေးလာစဉ်တုန်းကတည်းက အကျင့်ပျက်မယ်၊ စည်းကမ်းချိုးဖောက်မယ်ဆိုပြီး ကြွေးကြော်အော်ဟစ်ရင်း လောကကြီးထဲ ရောက်လာတာ မဟုတ်ပါဘူး။ Habit ဆိုတဲ့ အင်္ဂလိပ်စကားကို တချို့ကတော့ Have a bit .. have a bit .. and become habit လို့ သုံးနှုန်းအဓိပ္ပာယ်ဖွင့်ကြပါတယ်။ မြန်မာလိုဆိုရင်တော့ နေ့စဉ် နည်းနည်း ... နည်းနည်း လိုက်စားရင်းနဲ့ အကျင့်အထုံ ဖြစ်လာတဲ့သဘောပါပဲ။
ဆေးလိပ်သောက်တဲ့ အကျင့်၊ ကွမ်းစားတဲ့ အကျင့်၊ ဆေးလိပ်တို ပစ်ချင်သလိုပစ်တဲ့ အကျင့်၊ ကွမ်းသွေးထွေးချင်သလို ထွေးတဲ့အကျင့်၊ အကျင့်ပျက် ခြစားတဲ့ အကျင့်၊ စည်းကမ်းမဲ့တဲ့ အကျင့်တွေဟာ တနေ့ နည်းနည်းလိုက်စားရင်း ဖျောက်ဖျက်ဖို့ ခဲယဉ်းတဲ့ အကျင့်ဆိုးတွေ ဖြစ်တည်လာတော့တာပါပဲ။ အဲဒီလို အကျင့်ပျက်တာတွေကို ပြုပြင်ပေးနိုင်ဖို့ စည်ကမ်းတကျ နေထိုင်လုပ်ကိုင်လာအောင် ကိုင်တွယ်ဆောင်ရွက်ရာမှာ အောက်ပါ နည်းလမ်းတွေကို လိုအပ်သလို အသုံးပြုနိုင်ပါတယ်။
၁) စည်းကမ်းအသိပညာ ဖြန့်ဝေပေးခြင်း (Creation of awareness)
၂) ဒဏ်ပေးခြင်း၊ အာဏာစက်ဖြင့် အရေးယူအပြစ်ပေးခြင်း (Taking disciplinary action by law & authority)
၃) ဆုပေးခြင်း (Awarding for abiding by law and discipline)
၎) အချင်းချင်း အပြန်အလှန် စောင့်ကြည့်ထိန်းကျောင်းစေခြင်း (Observation & Intervention)
ဒီနေရာမှာ အရေးကြီးတာက စည်းကမ်းဖောက်ဖျက်မှုကို ဒဏ်ပေးတာဖြစ်ဖြစ်၊ စည်းကမ်းကောင်းမှုကို ဆုပေးတာဖြစ်ဖြစ် အဂတိတရားကင်းကင်းနဲ့ မျက်နှာမလိုက်ဘဲ ဆောင်ရွက်ဖို့ လိုတယ်။ အထူးသဖြင့် ဒဏ်ပေးရာမှာ သေသေချာချာ စုံစမ်းပြီး ပထမ နှုတ်ဖြင့် သတိပေးခြင်း၊ ဒုတိယ စာဖြင့် သတိပေးခြင်း၊ တတိယ အပြစ်ပေးခြင်းတွေနဲ့ အရေးယူပုံ ညွှန်ကြားချက်အဆင့်အတိုင်း ဆောင်ရွက်ဖို့ လိုပါတယ်။
အဲဒီလို စနစ်တကျ ကိုင်တွယ်ဖြေရှင်းနိုင်ဖို့ဆိုရင် “YBS” မှ မဟုတ်ပါဘူး။ မြန်မာနိုင်တဝန်းလုံးမှာ ရှိရှိသမျှ အဖွဲ့အစည်းပေါင်းစုံ၊ အစိုးရဌာနဆိုင်ရာတွေ၊ ကုမ္ပဏီတွေမှာ မှန်ကန်ပြည့်စုံတဲ့ စီမံခန့်ခွဲ အုပ်ချုပ်စနစ် (Management System) တရပ်ကို အပြသဘောမဟုတ်ဘဲ စနစ်တကျ ထူထောင်ကျင့်သုံးနိုင်ဖို့ လိုပါတယ်။
မကြုံဖူးကြသေးတဲ့ စာဖတ်သူတွေအတွက် ဗဟုသုတအလို့ငှာ နိုင်ငံတကာမှာ အသုံးပြုနေတဲ့ စီမံခန့်ခွဲ အုပ်ချုပ်စနစ် (Management System) နမူနာတခုရဲ့ အခြေခံအစိတ်အပိုင်း ၈ ခုကို ရေးသားပေးလိုက်ပါတယ်။
၁) တာဝန်ယူမှု၊ ခေါင်းဆောင်မှုနှင့် တာဝန်ခံမှု
၂) မူဝါဒများနှင့် ရည်မှန်းချက်များ၊
၃) အသင်းဖွဲ့စည်းပုံနှင့် အရင်းအမြစ်များ၊
၎) ကန်ထရိုက်တာနှင့်ပစ္စည်း၊ ဝန်ဆောင်ှုပေးသူများကို စီမံခန့်ခွဲခြင်း၊
၅) စွန့် စားမှုကို စီမံခန့်ခွဲခြင်း
၆) လုပ်ငန်းဆောင်တာ လုပ်ငန်းစဉ်အဆင့်ဆင့်များ
၇) စွမ်းဆောင်ရည်၊ စောင့်ကြည့်ခြင်းနဲ့ အဆင့်မြှင့်တင်ခြင်း၊
၈) စစ်ဆေးစိစစ်ခြင်းနဲ့ ပြန်လည်သုံးသပ်ခြင်း၊ စတာတွေပါပဲ။ အဲဒီ အခြေခံအစိတ်အပိုင်း ၈ ခု အကြောင်း အသေးစိတ်ကိုတော့ နောက်ဆောင်းပါးတွေမှပဲ ရေးပါ့မယ်။
အခု ဒီဆောင်းပါးကို နိဂုံးသတ်ရရင် ဥပဒေချိုးဖော်က်မှု၊ တရားဥပဒေကို လိုရာအသုံးချမှု၊ ဥပဒေအထက်မှာ နေထိုင်မှု၊ စည်းကမ်းချိုးဖောက်မှု၊ စည်းကမ်းပျက်မှု တွေဟာ မြန်မာနိုင်ငံမှာ လွန်ခဲ့တဲ့နှစ် ၅၀ ကျော်ကာလ စစ်အာဏာရှင် အဆက်ဆက်ကတည်းက တနေ့နည်းနည်း ကျင့်သုံးလာရာက အခုဆို ကျွတ်တက်နေတဲ့ အကျင့်ဆိုးအဖြစ် စွဲလာခဲ့ကြတာ ဖြစ်တယ်။
ဒီလို အရေထူနေတဲ့ စည်းပျက်ကမ်းပျက် အကျင့်ဆိုး၊ စရိုက်ဆိုးတွေ ပျောက်ပျက်အောင် ချေချွတ်နိုင်ဖို့ဆိုရင် စီမံခန့်ခွဲ အုပ်ချုပ်စနစ် (Management System) နမူနာတခုရဲ့ အခြေခံအစိတ်အပိုင်း ၈ ခုထဲက နံပါတ် (၁) တာဝန်ယူမှု၊ ခေါင်းဆောင်မှုနဲ့ တာဝန်ခံမှု၊ နံပါတ် (၂) မူဝါဒများနှင့် ရည်မှန်းချက်များ၊ နံပါတ် (၃) အသင်းဖွဲ့စည်းပုံနှင့် အရင်းအမြစ်များ ဆိုတဲ့ အစိတ်အပိုင်းတွေ အားကောင်းခိုင်မာနေဖို့ လိုပါတယ်။
ဆိုလိုတာက ထိပ်တန်းအုပ်ချုပ်သူတွေကိုယ်တိုင်က အဲဒီစည်းကမ်းချိုးဖောက်မှု တွေကို တကယ်ကို မဖြစ်မနေ ပြုပြင်မယ်ဆိုတဲ့ ပြင်းပြတဲ့ဆန္ဒနဲ့ ဦးဆောင်မှုပေးဖို့၊ တာဝန်ယူတတ်ဖို့၊ တာဝန်မကျေရင်လည်း တာဝန်ခံမှုတွေပြုဖို့ နံပါတ် (၁) အစိတ်အပိုင်းဖြစ်တဲ့ တာဝန်ယူမှု၊ ခေါင်းဆောင်မှုနဲ့ တာဝန်ခံမှုတွေကို တိတိကျကျ သတ်မှတ်လိုက်နာဖို့့လိုအပ်ပါတယ်။
ဒီနေရာမှာ အရေးကြီးတဲ့ စိတ်ဓာတ်ပြောင်းလဲဖို့ လိုတာက အရင် စစ်အာဏာရှင်ဟောင်းတွေလို ငါ ပြောသလိုလုပ်၊ ငါ လုပ်သလိုမလုပ်နဲ့လို့ ကဲ့ရဲ့မခံရအောင် အောက်ခြေကိုသာ ပြုပြင်ဖို့ အမိန့်ပေးနေသလို ကိုယ်တိုင်ကလည်း စည်းကမ်းမဲ့နေ၊ ဥပဒေအထက်မှာနေတဲ့ အကျင့်စိတ်ဓာတ်တွေကို ဖျောက်ဖျက်ပြုပြင်ကြဖို့ လိုပါတယ်။
နောက်တခါ အသင်းအဖွဲ့ရဲ့ မူဝါဒ၊ ရည်မှန်းချက်တွေဖြစ်တဲ့ ဥပမာ … အများပြည်သူကို ဝန်ဆောင်မှုပေးဖို့၊ သက်သောင့်သက်သာ ခရီးသွားလာနိုင်ဖို့၊ ဈေးနှုန်းချိုသာစွာနဲ့ ခရီးသွားလာရေး အဆင်ပြေချောမွေ့ဖို့၊ လိုရာခရီးကို အချိန်မှန်ရောက်ဖို့ စတာတွေကိုကို ဖြည့်ဆည်းအကောင်အထည်ဖော်နိုင်ဖို့ အမြင် (Vision)၊ မစ်ရှင် (Mission)၊ စံရည်စံညွှန်းတွေ (Standards)၊ လုပ်ကိုင်နည်းအဆင့်ဆင့် (Procedure)၊ လုပ်ငန်းလမ်းညွှန် (Guideline) ချက်တွေကို နံပါတ် (၂) မူဝါဒများနှင့် ရည်မှန်းချက်များ (Policies and Objectives) အခန်းမှာ ရှင်းရှင်းလင်းလင်း ရေးဆွဲရမှာ ဖြစ်ပါတယ်။
ပြီးရင် အကျင့်ပျက်မှုတွေ၊ စည်းကမ်းမလိုက်နာမှုတွေကို ထိထိရောက်ရောက် ပြုပြင်အရေးယူနိုင်ဖို့၊ အုပ်ချုပ်သူတွေ၊ ဝန်ထမ်းတွေ၊ ယာဉ်မောင်း၊ ယာဉ်လိုက်တွေ လိုက်နာရမယ့် ကျင့်ဝတ်၊ စည်းကမ်းတွေ၊ တာဝန်ဝတ္တရားတွေ၊ အရေးယူမှုလမ်းညွှန် (Discplinary Guideline) ကို တိတိကျကျ သတ်မှတ်ဖို့အတွက် နံပါတ် (၃) အစိတ်အပိုင်း ဖြစ်တဲ့ အသင်းဖွဲ့စည်းပုံနှင့် အရင်းအမြစ်များကို မှန်မှန်ကန်ကန် ရေးဆွဲဖို့ လိုပါကြောင်း ရေးသား အသိပေးလိုက်ပါတယ်။
မင်းကောင်းချစ်
ဖေဖော်ဝါရီလ ၉ ရက်နေ့ ၂၀၁၇ ခုနှစ်