မြန်မာ-ကမ္ဘောဒီးယား လေကြောင်းခရီးစဉ်များ ပြန်စတင်ရန် ခေါင်းဆောင်နှစ်ဦး ဆွေးနွေး
DVB
·
February 4, 2017
နှစ်နိုင်ငံအကြား လေကြောင်းခရီးစဉ်များ ပြန်လည်စတင်ရေး၊ ကျောင်းသားများအပြန် အလှန် စေလွှတ်ရေး အပါအ၀င် ကိစ္စရပ်အတော်များများကို မြန်မာ-ကမ္ဘောဒီးယား နှစ်နိုင်ငံခေါင်းဆောင်တို့ ဆွေးနွေးခဲ့ကြတယ်လို့ နိုင်ငံခြားရေးဌာနက သတင်းထုတ်ပါတယ်။
ကမ္ဘောဒီးယားနိုင်ငံကို ရောက်နေတဲ့ နိုင်ငံတော်သမ္မတဦးထင်ကျော်နဲ့ ကမ္ဘောဒီးယားနိုင်ငံ ဝန်ကြီးချုပ် ဆမ်ဒက် ဟွန်ဆန်တို့ဟာ ဒီနေ့မနက်ပိုင်းက ငြိမ်းချမ်းရေးနန်းတော်(Peace Palace )မှာ တွေ့ဆုံ ဆွေးနွေးခဲ့ကြတာပါ။
နှစ်နိုင်ငံအကြားကုန်သွယ်မှုနှင့်ရင်းနှီးမြုပ်နှံမှု ပိုမိုတိုးမြှင့်ရေး၊ ခရီးသွားလုပ်ငန်းကဏ္ဍ ပူပေါင်းမြှင့်တင်ရေးအတွက် နှစ်နိုင်ငံအကြား လေကြောင်းခရီးစဉ်များ ပြန်လည်စတင်ရေး၊ ပညာရေးကဏ္ဍအပိုင်းမှာ ကျောင်းသားတွေ အပြန်အလှန်စေလွှတ်ရေး၊ ဘာသာစကားများ အပြန်အလှန်လေ့လာသင်ကြားနိုင်ရေးတို့အတွက် ပူးပေါင်းဆောင်ရွက်နိုင်တဲ့ နည်းလမ်းများအပါအဝင် လက်ရှိပူးပေါင်းဆောင်ရွက်နေမှုများအား ပိုမိုတိုးမြှင့်ဆောင်ရွက်နိုင်ရေးတို့ အား အမြင်ခြင်းဖလှယ်ဆွေးနွေးခဲ့ကြတယ်လို့ နိုင်ငံခြားရေးသတင်းမှာ ဖော်ပြပါတယ်။
ဖေဖော်ဝါရီ ၃ ရက်ကစတင်ခဲ့တဲ့ သမ္မတ ဦးထင်ကျော်ရဲ့ ကမ္ဘောဒီးယားနိုင်ငံ ချစ်ကြည်ရေးခရီးဟာ ၅ ရက်တာကြာမြင့်မှာဖြစ်ပါတယ်။