Home
မြန်မာသတင်း
သယ်ယူပို့ဆောင်ရေးစနစ်သစ်တွင် ခရီးသွားပြည်သူများ ပူးပေါင်းပါဝင်ရန် တိုက်တွန်း
DVB
·
January 11, 2017
အများပိုင်သယ်ယူပို့ဆောင်ရေး စနစ်သစ်မှာ ခရီးသွားပြည်သူတွေ ပူးပေါင်းပါဝင်ဖို့ ယာဉ်လိုင်းပိုင်ရှင်တွေက တိုက်တွန်းပြောကြားခဲ့ပါတယ်။ အရင်က SRT ဘတ်စ်ကားလိုင်းနဲ့ တချို့ဘတ်စ်ကားလိုင်းတွေက နိုင်ငံတကာမှာ အသုံးပြုတဲ့ ကတ်စနစ်နဲ့ ဘတ်စ်ကားခ ငွေပေးချစနစ် ဆောင်ရွက်ခဲ့ပေမယ့်လည်း ခရီးသွားပြည်သူတွေ ပူးပေါင်းပါဝင်မှု အားနည်းခဲ့တာကြောင့် ယာဉ်လိုင်းတွေ ဖျက်သိမ်းခဲ့ရတာတွေ ရှိတဲ့အတွက် အခုကျင့်သုံးတဲ့ စနစ်သစ်မှာ ပြည်သူအားလုံး ပူးပေါင်းပါဝင်ဆောင်ရွက်ကြဖို့ အရေးကြီးတယ်လို့ ယာဉ်ပိုင်ရှင်တဦးဖြစ်သူ ကိုတရုတ်လေးက တိုက်တွန်းပြောကြားခဲ့တာပါ။ “သယ်ယူပို့ဆောင်ရေးလုပ်ငန်းမှာ ခရီးသွားပြည်သူတွေရဲ့ ပူးပေါင်းပါဝင်မှု အင်မတန် အရေးကြီးပါတယ်။ ကျနော်တို့ System တခုကို အသုံးပြုတော့မယ်ဆိုရင် ကျနော်တို့လုပ်ငန်းတွေရဲ့ လိုက်လျောညီထွေ ရှိ၊ မရှိကို တော်တော် အလေးအနက်ထားရပါတယ်။ ဥပမာ လူတွေရဲ့ Culture ကိုလည်း ဖြည်းဖြည်းချင်း ပြောင်းယူပြီးတော့ ဆွဲခေါ်သွားရပါတယ်။ ဒီ System တွေကို အသုံးပြုမယ်ဆိုရင် ကျနော်တို့ လေ့လာကြည့်ပါတယ်။ ခရီးသွားပြည်သူတွေရဲ့ ပူးပေါင်းပါဝင်မှု တော်တော်အရေးကြီးပါတယ်။” အသစ်ပြန်လည်ဖွဲ့စည်းထားတဲ့ ယာဉ်လိုင်းတွေနဲ့ ယာဉ်လမ်းကြောင်းခရီးစဉ်တွေကို ဘတ်စ်ကားမှတ်တိုင်တွေ၊ ဝက်ဘ်ဆိုက်နဲ့ ဖေ့စ်ဘွတ်ခ်တွေပေါ်မှာ ဖော်ပြထားမယ့်အပြင် မိုဘိုင်း အက်ပလီကေးရှင်းပါ ထုတ်ပြန်ပေးသွားမယ်လို့ အစိုးရအဖွဲ့က ထုတ်ပြန်ထားပါတယ်။ ဒါ့အပြင် ဘတ်စ်ကားစနစ်သစ် ပြေးဆွဲမယ့်ကာလမှာ ကောလ်စင်တာတခု ဖွင့်လှစ်ပေးသွားမှာဖြစ်ပြီး ဘတ်စ်ကားဂိတ်တွေနဲ့ ခရီးစဉ်အခြေအနေများကို ပြောပြပေးသွားမှာ ဖြစ်ပါတယ်။ "ကောင်းဖို့လုပ်နေတဲ့ ကိစ္စတခုက အကောင်းဆုံးဖြစ်သွားမှာပါ။ အကောင်းဆုံးဖြစ်အောင် ကြိုးစားနေတဲ့အချိန်ဆိုတော့ အဓိကကတော့ ခရီးသွားပြည်သူတွေဟာ အရင်ထက်စာရင် အခုအချိန်ဟာ အစစအရာရာ အဆင်ပြေဖို့ အကောင်းဆုံးဖြစ်မယ်လို့ ယူဆပါတယ်" လို့ ရန်ကုန်မြောက်ပိုင်း တိုက်ကြီးသားယာဉ်လိုင်း တွဲဖက်ဒါရိုက်တာ ဦးစိုးမြင့်ကြည်က ပြောပါတယ်။ အသစ်ဖွဲ့စည်းလိုက်တဲ့ ဘတ်စ်ကားစနစ်မှာ မထသ စီမံအုပ်ချုပ်တဲ့စနစ်ကနေ ယာဉ်ပိုင်ရှင်တွေ စီမံအုပ်ချုပ်တဲ့စနစ်ကို ပြောင်းလဲပြီး ယာဉ်ပိုင်ရှင်တွေရဲ့အပေါ်မှာ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှုအဖွဲ့က တိုက်ရိုက်အုပ်ချုပ်မှာပါ။ စတင်ပြေးဆွဲမယ့်ရက်မှာ ယာဉ်တံဆိပ်တွေကို ပြောင်းလဲမှာဖြစ်ပြီး YRTA စာတန်းနဲ့ ယာဉ်လမ်းကြောင်းနံပါတ်တွေကို တံဆိပ်တပ်ထားပါမယ်။ ရန်ကုန်တိုင်းဒေသကြီးမှာ အခုလ ၁၅ ရက်နေ့ကစတင်ပြီး လက်ရှိ ပြေးဆွဲနေတဲ့ ယာဉ်လိုင်းအားလုံးကို ဖျက်သိမ်းပြီး အများပိုင်ယာဉ်လိုင်း ခရီးစဉ်လမ်းကြောင်း ၆၀ နဲ့ အစားထိုး ပြေးဆွဲသွားမယ်လို့ ကြေညာထားပါတယ်။ အခုပြေးဆွဲမယ့် စနစ်သစ်ဟာ ယာဉ်လိုင်းတွေ စုပေါင်းပြီး ပြေးဆွဲတဲ့စနစ်ဖြစ်ပြီး ပြေးဆွဲတဲ့ယာဉ်တွေမှာ ဒုတိယအဆင့်အနေနဲ့ ဂျီပီအက်စ်၊ စီစီတီဗွီနဲ့ ကတ်နဲ့ ငွေပေးချင်တဲ့စနစ်တွေ ပါဝင်မယ်လို့ ရန်ကုန်တိုင်းအစိုးရက တရားဝင် ကြေညာထားပါတယ်။ ပြည့်ဘုန်းအောင်

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024