နမ့်ဆန်တွင်ပစ်ခတ်မှုဖြစ်ပွား၊ အထက ကျောင်းဆောင် လက်နက်ကျည်ဆန်ထိမှန်
ခွန်ဇော်ဦး
·
January 11, 2017
ရှမ်းပြည်နယ်အရှေ့မြောက်ပိုင်း ပလောင်ကိုယ်ပိုင်အုပ်ချုပ်ခွင့်ရဒေသ၊ နမ့်ဆန်မြို့နဲ့ အနီးတ၀ိုက်မှာ မြန်မာတပ်မတော်နဲ့ တအာင်းအမျိုးသား လွတ်မြောက်ရေး တပ်မတော် (တီအန်အယ်လ်အေ) တို့ မနေ့က ပစ်ခတ်တိုက်ခိုက်မှုတွေ ဖြစ်ပွားခဲ့တယ်လို့ မြို့ခံတွေက ပြောပါတယ်။
လက်နက်ပစ်ခတ်သံတွေကို မနေ့ည ၇ နာရီ၊ ၉ နာရီ၊ ၁၂ နာရီနဲ့ ဒီကနေ့ မနက်တကြိမ် ကြားရတယ်၊ ဒီနေ့ မနက်ပိုင်း ၈ နာရီလောက်မှာလည်း နမ့်ဆန်မြို့ရဲ့ ဇယန်း နတလကျောင်း အနောက်ကုန်းဘက်မှာ ပစ်ခတ်မှုဖြစ်ခဲ့တယ်လို့ ဒေသခံကပြောပါတယ်။
ပစ်ခတ်မှုတွေကြောင့် မြို့နယ်ထွေ/အုပ်ရုံးရိပ်သာဆောင်အမိုး၊ အ.ထ.က ၂ စာသင်ကျောင်းဆောင်နဲ့ ဇယန်းပန်လော့ကျေးရွာ အောင်ဘရားသားစ် စက်ရုံလည်း လက်နက်ကျည်ဆန်တချို့ ထိမှန်ခဲ့ပါတယ်။
လက်ရှိအချိန်ထိ ပစ်ခတ်မှုတွေကြောင့် မြို့ခံ ပြည်သူလူထုထိခိုက်ဒဏ်ရာရ သေဆုံးတာတော့ မကြားရသေးပါဘူး။
မနေ့ညက နမ့်ဆန်မြို့ အရှေ့တောင်ဘက်မှာ နယ်မြေလုံခြုံရေးပုံမှန်ဆောင်ရွက်နေတဲ့ တပ်မတော်စစ်ကြောင်းနဲ့ တီအန်အယ်လ်အေ အင်အား ၂၀ လောက်တို့ ထိတွေ့ တိုက်ပွဲဖြစ်ပွားခဲ့တယ်လို့ တပ်မတော်ကာကွယ်ရေးဦးစီးချုပ်ရုံးကလည်း သတင်းထုတ်ထားပါတယ်။
ည ၇နာရီကျော်လောက်မှာ နမ့်ဆန်မြို့၊ နမ္မဝေါရပ်ကွက်အနီးရှိ တာဝါတိုင်ကုန်းနေရာနဲ့ ပတ္တမြားစေတီနေရာကနေ နမ့်ဆန်မြို့တွင်းနဲ့ တပ်မတော်လက်ဖက်ခြောက်စက်ရုံကို တီအန်အယ်လ်အေက လက်နက်ကြီး၊ လက်နက်ငယ်တွေနဲ့ပစ်ခဲ့သလို ည ၈ နာရီလောက်မှာလည်း နမ့်ဆန်မြို့အ၀င် မန်ခိုက်နတ်စင်ကုန်း တစ်ဝိုက်မှာ လက်နက်ကြီးငယ်တွေနဲ့ ထပ်မံပစ်ခတ်တိုက်ခိုက်ခဲ့တယ်လို့ ဆိုပါတယ်။
ဒါ့အပြင် ကျောက်မဲမြို့နယ်ရှိ မိုင်းငေါ့တပ်စခန်းကိုလည်း တီအန်အယ်လ်အေ အင်အား ၅၀ လောက်က ၆၀ မမစိန်ပြောင်း၊ အာပီဂျီ စတာတွေနဲ့ ပစ်ခတ်တိုက်ခိုက်ခဲ့တယ်လို့လည်းဆိုပါတယ်။
တိုက်ပွဲတွေကြောင့် မနေ့က နေလယ်ပိုင်းကစလို့တော့ နမ့်ဆန်မြို့ပေါ်မှာရှိတဲ့ လူနေအိမ်တွေ ဈေးဆိုင်ခန်းတွေ စာသင်ကျောင်းတွေ ပိတ်ထားပြီး မြို့ခံတွေကတော့ နေအိမ်အတွင်းမှာပဲ အပြင်မထွက်ဘဲ နေထိုင်နေကြပါတယ်။
၂၀၁၆ ဇန်န၀ါရီ ၂၂ ရက်ကလည်း နမ့်ဆန်မြို့ရှိ ရဲစခန်းနဲ့ အစိုးရတပ်မတော်ကုန်းကို တီအန်အယ်လ်အေ တပ်ဖွဲ့တဖွဲ့က လာရောက်ပစ်ခတ်ခဲ့တာကြောင့် ရဲဝန်ထမ်းလိုင်းခန်း၊ မြန်မာစီးပွားရေးဘဏ် အဆောက်အဦနဲ့ လူနေအိမ် ၂ လုံး ကျည်ဆန်ထိမှန်ခဲ့ပြီး အရပ်သား ၄ ဦး ဒဏ်ရာရရှိခဲ့ပါတယ်။